দৰং :
দৰং-ওদালগুৰিৰ সীমান্তৰ কুঁহিয়াৰকুছিত এটি মৃতদেহক কেন্দ্ৰ কৰি এক উত্তেজনাময় পৰিস্থিতিৰ সৃষ্টি হয়। খৈৰাবাৰী আৰক্ষী থানা এলেকাৰ এই গাঁওখনত প্ৰশাসনে আৰক্ষী মোটায়েম কৰি পৰিস্থিতি নিয়ন্ত্ৰণ কৰে। ঘটনা বিবৰণী মতে, লক ডাউনৰ বাবে ভূপেন ডেকা নামৰ কয়দীজনক ওদালগুৰি জিলা কাৰাগাৰৰ পৰা ঘৰলৈ পঠিয়াইছিল প্ৰশাসনে। সেই অনুসৰি ভূপেন ডেকা নিজগৃহত থকা অৱস্থাত শনিবাৰে ৰহস্যজনকভাৱে মৃত্যু হয় লোকজনৰ৷ মদ্যপান কৰি পত্নীক নিৰ্যাতন চলোৱা অভিযোগত কাৰবাস খাতিবলগীয়া হৈছিল ভূপেন ডেকা নামৰ লোকজনে৷ জানিব পৰা মতে ভূপেনৰ মৃত্যুৰ সময়ত ঘৰত নাছিল আশা হিচাপে কৰ্মৰত পত্নী উষা ৰাণী ডেকা। এটি পুত্ৰ সন্তানৰ পিতৃ ভূপেনৰ মৃত্যু হোৱাৰ পিছত স্থানীয় একাংশ লোক আৰু পৰিয়ালৰ সদস্যসকলে ভূপেন ডেকাক বিহপান কৰোৱাই পৰিকল্পিতভাৱে হত্যা কৰাৰ অভিযোগ তুলি পৰিস্থিতি উত্তপ্ত কৰি তোলে। মৰণোত্তৰ পৰীক্ষা কৰি আৰক্ষীয়ে মৃতদেহ ঘৰলৈ অনাত ৰাইজে বাতৰি লিখা পৰলৈ সৎকাৰ কৰিবলৈ অস্বীকাৰ কৰিছে মৃতদেহ। ঘটনাস্থলীত ভেৰগাঁওৰ দণ্ডাধীশ নিৰ্মল কুমাৰ শৰ্মা উপস্থিত হৈ উত্তপ্ত পৰিস্থিতি নিয়ন্ত্ৰণ কৰে।
