এক শোকাৱহ পথ দুর্ঘটনাত আঘাতপ্ৰাপ্ত হৈ অসম চিকিৎসা মহাবিদ্যালয় হাস্পতালত চিকিৎসাধীন হৈ থকা ডিব্ৰুগড় জিলাৰ মৰাণৰ সমীপৰ শালমাৰি চাহ বাগিচাৰ বাসিন্দা, ৰাষ্ট্ৰীয় পৰ্যায়ৰ মহিলা ফুটবলাৰ চাবিনা মিঞ্জৰৰ আজি মৃত্যু হয়। প্ৰতিভাবান মহিলা ফুটবল খেলুৱৈ গৰাকীৰ বিয়োগৰ বাতৰি পাই অতিকৈ মৰ্মাহত হৈ পৰে ক্ৰীড়া মন্ত্ৰী বিমল বড়া। প্ৰতিভাৱান ফুটবলাৰগৰাকীৰ বিয়োগ অসমৰ ক্ৰীড়া জগতৰ বাবে এক অপূৰণীয় ক্ষতি বুলি কয় মন্ত্ৰী বিমল বড়াই। চাবিনা মিঞ্জৰ উন্নত চিকিৎসাৰ বাবে মন্ত্ৰী গৰাকীয়ে সৰ্বতোপ্ৰকাৰে চেষ্টা চলাইছিল। প্ৰয়োজন সাপেক্ষে বাহিৰলৈ নিয়াৰ বাবেও মুখ্যমন্ত্ৰী ড° হিমন্ত বিশ্ব শৰ্মাৰ নিৰ্দেশত এয়াৰ এম্বুলেন্সকে আদি কৰি সকলোখিনি ব্যৱস্থা কৰিছিল।
অৱস্থাৰ অৱনতি ঘটাত চিকিৎসকসকলে দিয়া পৰামৰ্শমতে সম্ভাৱ্য সকলো ব্যৱস্থা গ্ৰহণ কৰা হৈছিল। কিন্তু, সকলোখিনি সাজু হৈ থকাৰ পিছতো দুৰ্ভাগ্যবশতঃ খেলুৱৈ গৰাকীয়ে চিৰবিদায় মাগিলে।তেখেতৰ বিদেহ আত্মাৰ চিৰশান্তি কামনাৰে ঈশ্বৰক প্ৰাৰ্থনা জনোৱাৰ লগতে শোকস্তব্ধ পৰিয়াল আৰু বন্ধুবৰ্গলৈ গভীৰ সমবেদনা জ্ঞাপন কৰে মন্ত্ৰী বিমল বড়াই।আনহাতে মৰাণ সমষ্টিৰ বিধায়ক চক্ৰধৰ গগৈৰ লগতে ৰাষ্ট্ৰীয় পৰ্য্যায়ৰ খেলুৱৈৰ গৰাকীৰ মৃত্যুত আজি বিভিন্ন দল সংগঠনে শেষ শ্ৰদ্ধাৰ্ঘ জ্ঞাপন কৰে।