পথ সুৰক্ষা সজাগতা উপলক্ষে যোৱা ১১ মাৰ্চত দুলীয়াজানত এক চাইকেল ৰেলী বাহিৰ কৰা হয়৷ অইল ইণ্ডিয়া লিমিটেডৰ লজিষ্টিকচ্ বিভাগৰ উদ্যোগত আয়োজন কৰা চাইকেল ৰেলীৰ ফ্লে’গ অফ কৰে অইল ইণ্ডিয়া লিমিটেডৰ কাৰ্যবাহী সঞ্চালক এছ পি ডেকাই৷
পুৱা ৬ বজাত আৰম্ভ কৰা চাইকেল ৰেলীত লজিষ্টিকচ্ বিভাগৰ মুৰব্বী তথা চি জি এম অৰুনাভ বৰুৱা, জি এম অতনু কুমাৰ ভাগৱতী, জি এম শুভ্ৰ ৰঞ্জন ছামাদ্দাৰ, ডি জি এম অপূৰ্ব আৰন্ধৰা, বেদান্ত বৰঠাকুৰকে মুখ্য কৰি লজিষ্টিকচ্ বিভাগৰ অভিযন্তা-বিষয়া, কৰ্মচাৰীসকলৰ লগতে অইল ইণ্ডিয়া লিমিটেডৰ অভিযন্তা, বিষয়া, কৰ্মচাৰী, কেন্দ্ৰীয় ঔদ্যোগিক সুৰক্ষা বাহিনীৰ বিষয়া-কনিষ্টবল, বিদ্যালয়ৰ-মহাবিদ্যালয়ৰ শিক্ষক-শিক্ষয়িত্ৰী, ছাত্ৰ-ছাত্ৰীয়ে অংশগ্ৰহণ কৰে৷
চাইকেল ৰেলীত মুঠ ১২০ গৰাকীয়ে অংশগ্ৰহণ কৰে৷ দুলীয়াজানৰ নেহৰু মৈদানৰ পৰা প্ৰতিখন চাইকেলত পথ সুৰক্ষাৰ শ্ল’গানৰ প্লে কাৰ্ড ওলমাই আৰম্ভ কৰা চাইকেল ৰেলী প্ৰায় ৯ কিলোমিটাৰ পথ অতিক্ৰম কৰি পুনৰ নেহৰু মৈদানত সমাপ্ত হয়৷ অনুষ্ঠানটো আঁতধৰে কনিষ্ঠ অভিযন্তা প্ৰকাশ ৰায়ে৷ উল্লেখ্য যে অইল ইণ্ডিয়া লিমিটেডৰ লজিষ্টিকচ্ বিভাগৰ উদ্যোগত পথ সুৰক্ষাৰ বাবে বিভিন্ন সজাগতামূলক কাৰ্যসূচী আয়োজন কৰি আহিছে৷