মাজুলীৰ গড়কাপ্টানী বিভাগত ব্যাপক দুৰ্নীতি : মাজুলীৰ পহুমৰা-গুৱালবাৰী সংযোগী পকী দলং নিৰ্মানত ব্যাপক অনিয়মৰ অভিযোগ ; ৰাইজে বন্ধ কৰিলে কাম ।

উজনি-মাজুলী : মুখ্যমন্ত্ৰীৰ সমষ্টি মাজুলীৰ গড়কাপ্তানী বিভাগত চলি থকা নৱনিৰ্মীত বাট, পথ, উন্নয়নমূলক কাম সমূহত ব্যাপক অনিয়ম সংঘটিত হৈ অহাৰ বাতৰি প্ৰকাশ হৈ অহাৰ পিছতো বিভাগৰ উচ্চ পদস্থ বিষয়া সকলে নিৰব ভূমিকা গ্ৰহন কৰাৰ অভিযোগ উঠিছে ৷ শাসকীয় দলৰ একাংশ নেতা, পালিনেতা, মাজুলীৰ বিভাগীয় একাংশ বিষয়াৰে মিলি ঠিকাদাৰে চলাইছে ব্যাপক লুণ্ঠনৰাজ ৷ মুখ্যমন্ত্ৰীৰ সমষ্টি মাজুলীৰ গড়কাপ্টানী বিভাগত দুৰ্নীতিৰে পাহাৰ গঢ়িছে জৈনেক হাজৰিকা উপাধিৰ ঠিকাদাৰ জনে ৷ ঠিকাদাৰ জনৰ তত্বাৱধানত চলি থকা প্ৰায়বোৰ কামতেই ব্যাপক দুৰ্নীতি সংঘটিত হৈছে ৷ কোনো পথ নিৰ্মীয়মান অৱস্থাতেই খহি পৰাৰ উপৰি চাইডবান্ধ নিদিয়া কৈ নিৰ্মান কৰিছে বাট, পথ ৷ উল্লেখ্য যে এই ঠিকাদাৰ জনৰ তত্বাৱধানত ৬,৩৬,৬৭,৭৮৫ টকাৰ ব্যয় সাপেক্ষে নিৰ্মান কাৰ্য চলি থকা মাজুলীৰ পহুমৰা-গুৱালবাৰী সংযোগী পথটোত নিৰ্মান কৰি থকা পকী দলংত ব্যাপক অনিয়ম সংঘটিত কৰাৰ অভিযোগ স্থানীয় ৰাইজৰ ৷ দলং নিৰ্মানৰ আৰম্ভনিৰে পৰা ম্যাদ উকলা চিমেন্ট, বোকা মিশ্ৰিত বালি আৰু শিলেৰে দলং নিৰ্মান কৰাক লৈ সৰব হৈ পৰিছে স্থানীয় ৰাইজ ৷ ঠিক একেদৰে এককাঁল পানীতে দলংৰ খুটাঁ নিৰ্মানৰ চেষ্টা চলোৱা ঠিকাদাৰৰ বিৰোধে গৰজি উঠিছে স্থানীয় দল সংগঠন ৷ উল্লেখ্য যে অলপতে এই দলংখনত সংঘটিত হোৱা অনিয়ম প্ৰত্যক্ষ কৰি স্থানীয় সচেতন মহলে দলং নিৰ্মানৰ কাম বন্ধ কৰি দিয়াৰ লগতে দলং নিৰ্মানত হোৱা অনিয়ম, আৰু দুৰ্নীতিৰ এক ক্ষীপ্ৰ তদন্তৰ দাবী তুলিছে ৷ মাজুলীত এনেদৰে এতিয়া গড়কাপ্টানী বিভাগত হোৱা চৰম দুৰ্নীতিৰ অঘোষিত প্ৰতিযোগিতা চলা বুলিহে মাজুলীৰ সৰ্বতে চৰ্চা চলিছে ৷ মখ্যমন্ত্ৰীৰ সমষ্টি হিচাপে মাজুলীৰ চুকে কোনে অভাৱনীয় ভাবে পকী পথ, দলং, বিভিন্ন বিভাগত উন্নয়নমূলক আঁচনিৰ কাম চলি আছে যদিও শাসকীয় দলৰ একাংশ নেতা , বিভাগীয় বিষয়াৰ কমিচন ৰাজৰ পৰিনতিতেই জনসাধাৰনৰ মনপুত কাম নোহোৱাৰ অভিযোগ উঠিছে ৷ উঠি ৰজা, বহি ৰজা হৈ মাজুলীৰ একাংশ ঠিকাদাৰে নিজে মই-মতালী , খেয়াল-খুচিৰে কাম সম্পাদন কৰাৰ ফলতেই নিৰ্মীয়মান অৱস্থাতেই কাম সমূহত কেৰোন লগাৰ অভিযোগ তুলিছে বিভিন্ন দল সংগঠন, আৰু সচেতন মহলে ৷