ক’ৰোনা ভাইৰাছ : ইউজিচিক শিক্ষাবর্ষ, ছেমিষ্টাৰ গাইডলাইন পুনৰ বিবেচনাৰ নিৰ্দেশ কেন্দ্ৰৰ ।

দৈনন্দিন বাৰ্তাৰ ডেস্ক:

ক’ৰোনাৰ বাবে এইবাৰ ক্ষতি হোৱাৰ সম্ভাৱনা শিক্ষাবৰ্ষৰ৷ মানৱসম্পদ উন্নয়নমন্ত্রী ৰমেশ পোখৰেৱালে বিশ্ববিদ্যালয় মঞ্জুৰী আয়োগ (ইউজিচি)ক ২০২০ চনৰ পৰীক্ষাৰ গাইডলাইন পর্যালোচনা কৰিবলৈ নিৰ্দেশ দিছে৷ তদুপৰি শিক্ষাবৰ্ষ পুনৰ্বিবেচনা কৰিবলৈও মন্ত্ৰীজনে নিৰ্দেশ দিছে৷ কেন্দ্ৰীয় মন্ত্ৰীজনৰ এই নিৰ্দেশৰ পাছত লক্ষ্য কৰা হৈছে যে ক’ৰোনাৰ কাৰণে এই বছৰ চূড়ান্ত পৰীক্ষা বাতিল হ’ব পাৰে৷ উল্লেখ্য যি ইউজিচিয়ে এপ্ৰিলত শিক্ষার্থীসকলৰ পৰীক্ষাৰ বাবে ছেমিষ্টাৰৰ বিকল্প পদ্ধতিৰ বিষয়ে নির্দেশিকা প্রকাশ কৰে৷ লগতে জনাইছিল যে চূড়ান্ত বর্ষৰ শিক্ষার্থীয়ে পৰীক্ষাত অংশ ল’ব পাৰে৷ কিন্তু মহাৰাষ্ট্ৰ, ওড়িশ্যা, হাৰিয়ানা আদি ৰাজ্যত ক’ৰোনা ভাইৰাছৰ বাবে বিশ্ববিদ্যালয়ৰ পৰীক্ষা পিছুৱাই দিছে৷ আনকি শিক্ষাৰ্থীয়েও মানৱসম্পদ উন্নয়ন মন্ত্ৰালয়ৰ ওচৰত এই লৈ আবেদন কৰিছে৷ ইয়াৰ পাছত মানৱসম্পদ উন্নয়ন মন্ত্ৰীয়ে জনায়, ইউজিচিক ছেমিষ্টাৰ পৰীক্ষা আৰু শিক্ষাবর্ষ পুনর্বিবেচনাৰ নির্দেশ দিছে৷ শিক্ষার্থী, শিক্ষক আৰু কর্মচাৰীৰ কথা মনত ৰাখিয়ে তেওঁ এই পৰামৰ্শ দিয়ে৷ উল্লেখ্য যে এই পৰিস্থিতিত ইণ্টাৰনেল এছেছমেণ্ট আৰু আগৰ ছেমিষ্টাৰৰ ফলাফলৰ ওপৰত ভিত্তি কৰি কোনো বিকল্প ব্যৱস্থা কৰিব পাৰে ইউজিচিয়ে৷ ইয়াৰ গাইডলাইনৰ মাজত আছে পৰীক্ষা  পৰিচালনা, পৰীক্ষাৰ পদ্ধতি, শিক্ষাবর্ষ ইত্যাদি। এআইচিটিইৰ সভাপতিয়ে এই সন্দৰ্ভত কয়, ক’ৰোনাৰ কথা মনত ৰাখি যি সিদ্ধান্তবোৰ লোৱা হৈছিল তাক নতুনকৈ বিবেচনা কৰা হ’ব ৷ প্ৰাপ্ত খবৰ মতে, এআইচিটিই, বাৰ কাউন্সিল, ফাৰ্মাচী কাউন্সিল আৰু আৰ্কিটেকছাৰ কাউন্সিলৰ দৰে প্ৰতিষ্ঠান আৰু আন বহুৱে গাইডলাইন পুনৰ বিচাৰ কৰিছে৷ ইয়াৰ পূৰ্বে ইউজিচিয়ে ছেপ্টেম্বৰৰ পৰা নতুন শিক্ষাবৰ্ষ আৰম্ভ কৰাৰ কথা ভাবিছিল ৷ সেই ক্ষেত্ৰত জুলাইৰ মাজত পৰীক্ষা শেষ হোৱা বাঞ্ছনীয়। কিন্তু দেশত ক’ৰোনা ভাইৰাছৰ বাবে সৃষ্টি হোৱা পৰিস্থিতিত জুলাই মাহত মহাবিদ্যালয়, বিশ্ববিদ্যালয় খোলা সম্ভৱ নহয় ৷