দুদিনীয়া কাৰ্যসূচীৰে চিলাপথাৰ সৰুপাম হাজং প্ৰাথমিক বিদ্যালয়ৰ প্ৰাঙ্গণত বৃহত্তৰ সৰুপাম যুৱক সমাজৰ উদ্যোগত আৰু সৰুপামবাসী ৰাইজৰ সহযোগত আজিৰে পৰা দ্বিতীয় বাৰ্ষিক সৰুপাম আঞ্চলিক ব’হাগী আদৰণি অনুষ্ঠান অনুষ্ঠিত হয় । কাৰ্যসূচী অনুসৰি পুৱা পৰিৱেশ নিকাকৰণ, পতাকা উত্তোলন, স্মৃতি তৰ্পণ, বৃক্ষ ৰোপনকে ধৰি উদ্যাপন সমিতিৰ কাৰ্যকৰী সভাপতি প্ৰমোদ চুতীয়াৰ নেতৃত্বত বাৰেৰহনীয়া সাংস্কৃতিক শোভাযাত্ৰা উলিয়াই । ইয়াৰ পাছতে অঞ্চলৰ যুৱক-যুৱতী সকলৰ মাজত কণী যুঁজ প্ৰতিযোগিতা অনুষ্ঠিত হয় ।সৰুপাম বোৱাৰী জেং বিহু দলৰ বিহুতলী উন্মোচনৰ পাছতেই কণমানি বিহুৱতী প্ৰতিযোগিতা , বিহুগীত , ঢোলবাদন , পেপাবাদন , বাঁহী বাদন প্ৰতিযোগিতা আৰম্ভ হয় ।সন্ধিয়া ৬ বজাত প্ৰভাত গগৈৰ দ্বাৰা বন্তি প্ৰজ্বলনৰ পাছতেই গগনা বাদন প্ৰতিযোগিতা , চেমনীয়া বিহুৱতী প্ৰতিযোগিতা আৰু জেং বিহু প্ৰতিযোগিতা অনুষ্ঠিত হয় ।
কালিলৈ দ্বিতীয় দিনাৰ মুকলি সভাত প্ৰতিযোগিতাত স্হানপ্ৰাপ্ত সকলক পুৰস্কৃত কৰাৰ লগতে ৰাতিলৈ সাংস্কৃতিক সন্ধিয়াৰ বিশেষ আকৰ্ষণ হিচাপে থাকিব অসমৰ জনপ্ৰিয় কণ্ঠশিল্পী ৰূপম দাস আৰু পুনৰ চমুৱাৰ গীতৰ লহৰ।