হনুমান জয়ন্ত্ৰীৰ শোভাযাত্ৰাত এক বিশেষ সম্প্ৰদায়ৰ লোকে আক্ৰমণ কৰাৰ ঘটনাকলৈ আজিও উত্তপ্ত হৈ আছে দেশৰ ৰাজধানী চহৰ নতুন দিল্লীৰ জাহাংগীৰপুৰী অঞ্চল। কালি আক্ৰমণৰ ঘটনাৰে জৰিত ২১ জন লোকক আৰক্ষীয়ে গ্ৰেপ্তাৰ কৰিছিল। আৰক্ষীয়ে আজি জাহাংগীৰপুৰীত গুলীচালনা কৰা অভিযুক্ত জনৰ ঘৰলৈ তদন্তৰ বাবে যোৱাৰ সময়তে অভিযুক্তৰ পৰিয়ালে আৰক্ষীৰ ওপৰত আক্ৰমণ চলায়।অভিযুক্তৰ পৰিয়ালে দিল্লী আৰক্ষীৰ ওপৰত শিলাবৰ্ষণ কৰা বুলি দিল্লী আৰক্ষীৰ সূত্ৰই প্ৰকাশ কৰিছে। সূত্ৰটোৱে প্ৰকাশ কৰা মতে হনুমান জয়ন্তীৰ শোভাযাত্ৰাৰ সময়ত দিল্লীত হোৱা সাম্প্ৰদায়িক সংঘৰ্ষ সন্দৰ্ভত আজি দিল্লী আৰক্ষীৰ এটা তদন্তকাৰী দলে ঘটনাটোৰ এজন অভিযুক্তৰ ঘৰলৈ গৈছিল। কিন্তু তদন্তত সহযোগ কৰাৰ পৰিৱৰ্তে অভিযুক্তৰ পৰিয়ালে আৰক্ষীক শিলাবৰ্ষণ কৰি আক্ৰমণহে কৰে।উক্ত অভিযুক্ত লোক জনে সংঘৰ্ষৰ সময়ত গুলীচালনা কৰাৰ কথা পোহৰলৈ আহিছে।এটা ভিডিঅ’ত জাহাংগীৰপুৰীত সংঘৰ্ষৰ সময়ত নীলা চাৰ্ট পিন্ধা এজন ব্যক্তিয়ে গুলীচালনা কৰা দেখা গৈছিল৷ আৰক্ষী উপ-আয়ুক্ত (উত্তৰ-পশ্চিম) উষা ৰংনানীয়ে কয় যে দিল্লী আৰক্ষীৰ এটা দলে চিডি পাৰ্ক ৰোডত থকা সন্দেহজনক ব্যক্তিজনৰ ঘৰলৈ গৈ তেওঁৰ পৰিয়ালৰ সদস্যসকলক সোধা-পোছা কৰিবলৈ গৈছিল। তেওঁৰ পৰিয়ালৰ সদস্যসকলে আৰক্ষীৰ দলটোলৈ ওলোটাই শিল নিক্ষেপ কৰে। এই আক্ৰমণৰ ঘটনা সন্দৰ্ভত আইনী ব্যৱস্থা গ্ৰহণ কৰা হৈছে বুলিও তেওঁ কয়। অভিযুক্ৰ পৰিয়ালৰ এজন লোকক আৰক্ষীয়ে আটক কৰিছে। দিল্লী আৰক্ষীয়ে এতিয়ালৈকে সাম্প্ৰদায়িক সংঘৰ্ষৰ সৈতে জৰিত থকা মুঠ ২১ জন লোকক গ্ৰেপ্তাৰ কৰিছে। গ্ৰেপ্তাৰ কৰা লোকসকলৰ ভিতৰত দুটি কিশোৰো আছে।
উল্লেখ্য কেৱল দিল্লীতে নহয়, হনুমান জয়ন্তীৰ দিনা উত্তৰাখণ্ড, কৰ্ণাটক আৰু অন্ধ্ৰপ্ৰদেশকে ধৰি আন কেইবাখনো ৰাজ্যত সাম্প্ৰদায়িক হিংসাৰ খবৰ পোৱা গৈছে৷ ইয়াৰ আগতে ৰাম নৱমীৰ শোভাযাত্ৰাৰ সময়তো মধ্য প্ৰদেশ আৰু পশ্চিম বংগত সংঘৰ্ষ হৈছিল। জাহাংগীৰপুৰীৰ আক্ৰমণত কেইবাজনো আৰক্ষীৰ লোকৰ লগতে আন সাধাৰণ লোকো আহত হৈছিল।