অসমীয়াৰ প্ৰাণৰো প্ৰাণ বাপতি সাহোন বহাগ মাহৰ ৰঙালী বিহু এইবৰ্ষও কামৰূপ জিলাৰ বকোত বকো আঞ্চলিক ৰঙালী বিহু সন্মিলনীৰ উদ্যোগত পালন কৰা হৈছে। এই বেলি বকো আঞ্চলিক ৰঙালী বিহু সন্মিলনীয়ে ৫৪ সংখ্যক বৰ্ষৰ বাবে বিহুৰ আয়োজন কৰে। প্ৰতি বছৰে ৩০ চ’তৰ পৰা ৩ বহাগলৈ উদযাপন কৰা ৰঙালী বিহু সন্মিলন খন এই বৰ্ষও পৰিচালনা কৰিবলৈ বকোৰ সমাজ সংগঠনৰ নেতৃবৃন্দৰ সহযোগত বিহু সন্মিলনীৰ পৰিচালনা সমিতি আৰু বহু কেইখন উপ সমিতিত অভিজ্ঞ কৰ্মীক দায়িত্ব দি গঠন কৰা হৈছে সমিতি খন। ইফালে বিহু উদযাপন সমিতিৰ সাধাৰণ সম্পাদক পৱন কলিতা আৰু সহকাৰী সম্পাদক মহেন্দ্ৰ ৰাভাই জনোৱা মতে বিহুৰ শুভাৰম্ভণিত পতাকা উত্তোলন ; শ্বহীদ তৰ্পণ ; বক্ষ ৰোপণ ; খেল ধেমালি ; চিত্ৰাংকন প্ৰতিযোগিতা আৰু ভেকশ্বন প্ৰতিযোগিতা অনুষ্ঠিত হয়। ইফালে বিহুৰ শেষৰ দিনা সাংস্কৃতিক সন্ধিয়াৰ কণ্ঠশিল্পী দিক্ষু আৰু ইউৰেকাৰ সংগীতানুষ্ঠানে দৰ্শক ৰাইজক অধিক আনন্দিত কৰে। ইফালে এই বেলি বকো আঞ্চলিক ৰঙালী বিহু সন্মিলনীৰ বিশেষ আকৰ্ষণ আছিল ভলীবল প্ৰতিযোগিতা। উল্লেখ্য যে ; যোৱা ২ বহাগত আয়োজন কৰা হৈছিল ভলীবল প্ৰতিযোগিতা খন।
কিন্তু প্ৰাকৃতিক দুৰ্যোগৰ বাবে উক্ত দিনাৰ খেল খন স্থগিত ৰখা হৈছিল বাবে আজি অনুষ্ঠিত কৰা হয় ভলীবল প্ৰতিযোগিতা খন। খেল খনত মুঠ সাতটা খেলুৱৈ দ’ল যোগদান কৰে। খেল খনৰ চূড়ান্ত পৰ্য্যায়ত উপনীত হয় বকো ভলীবল ক্লাৱ বনাম শোলামুখ ভলীবল ক্লাৱে। খেলৰ অন্তত বকো ভলীবল ক্লাৱ বিজয়ী হয়। বিহু উদযাপন সমিতিৰ সাধাৰণ সম্পাদক পৱন কলিতাই আত ধৰা খেলৰ বটা বিতৰণী সভাত পৌৰহিত্য কৰে সভাপতি প্ৰবীণ তালুকদাৰে। অনুস্থানত উপস্থিত থাকে বকো ক্ৰীড়া সন্থাৰ সভাপতি তথা বকো আঞ্চলিক ৰঙালী বিহু সন্মিলনীৰ উপ সভাপতি জগত চন্দ্ৰ দাস ; বিশিষ্ট যুৱ ক্ৰীড়া সংগঠক সঞ্জয় চৌধুৰী ; ৰঞ্জিত দলৈ ; দ্বিতীয় পুৰস্কাৰৰ দাতাৰ পৰিয়ালৰ ৰতন সাউদকে ধৰি বহু সংখ্যক খেলুৱৈ আৰু ক্ৰীড়া সংগঠক। ভলীবল প্ৰতিযোগিতাত মুখ্য বিচাৰক হিচাপে বঙাইগাঁও জিলা ক্ৰীড়া বিষয়া খগেন চন্দ্ৰ নাথ আৰু ৰাষ্ট্ৰীয় ৰেফাৰী নয়ন চৌধুৰীয়ে অংশগ্ৰহণ কৰে।