বাক্সা জিলাৰ মুছলপুৰত আজি ৰাজ্য চৰকাৰৰ ক্ৰীড়া আৰু যুৱ কল্যাণ বিভাগৰ উদ্যোগত জিলাখনৰ চাপগুৰি বিধানসভা সমষ্টিৰ অন্তৰ্গত কেবাটাও ক্ৰীড়া ক্লাৱলৈ বিভিন্ন ক্ৰীড়া সামগ্ৰী বিতৰণ কৰা হয় ৷ এই উপলক্ষে মুছলপুৰৰ সমীপৰ বাথৌপুৰীত থকা জিলা ক্ৰীড়া প্ৰকল্প চৌহদত অনুষ্ঠিত এক অনুষ্ঠানত ক্ৰীড়া ক্লাৱ সমূহৰ মাজত ক্ৰীড়া সামগ্ৰী বিতৰণ কৰে ৰাজ্য চৰকাৰৰ হস্ততাঁত আৰু বস্ত্ৰশিল্প বিভাগৰ মন্ত্ৰী উৰ্খাও গৌৰা ব্ৰহ্মই ৷ বিতৰণী অনুষ্ঠানত মুখ্য অতিথিৰূপে অংশগ্ৰহণ কৰি মন্ত্ৰী ব্ৰহ্মই কয় যে ক্ৰীড়া বৰ্তমান সময়ত এনে এটি গুৰুত্বপূৰ্ণ বিষয় হৈ পৰিছে যে পঢ়া-শুনাৰ লগতে এই বিষয়টো জীৱনৰ কেৰিয়াৰ হৈ পৰিছে। সেইবাবেই বৰ্তমান ক্ৰীড়াক সকলোৱে গুৰুত্ব সহকাৰে গ্ৰহণ কৰি শিশুসকলকো খেল-ধেমালিৰ সৈতেও জড়িত কৰাব বিচাৰে ৷ খেল-ধেমালিয়ে শাৰীৰিক, মানসিক আৰু আধ্যাত্মিক দিশত এজন মানুহক সম্পূৰ্ণ সুস্থ, সবল আৰু সক্ষম কৰি ৰাখে বুলি মন্তব্য কৰি ৰাজ্যখনৰ দহ খন জিলাৰ ভিতৰত বাক্সা জিলাৰ মুছলপুৰত এটা জিলাভিত্তিক ক্ৰীড়া প্ৰকল্প স্থাপন হ’ব বুলি উল্লেখ ৷
৫০ কোটি টকা ব্যয় সাপেক্ষে নিৰ্মাণ হ’বলগীয়া ইতিমধ্যে এই অভিলাসী ক্ৰীড়া প্ৰকল্পটো বৰ্তমানৰ বাথৌপুৰীত থকা ক্ৰীড়া প্ৰকল্পৰ স্থানতে নিৰ্মাণ কৰাৰ বাবে পৰিকল্পনা যুগুত কৰা বুলি কয় মন্ত্ৰী গৰাকীয়ে ৷ নিৰ্মাণ হ’বলগীয়া উক্ত ক্ৰীড়া প্ৰকল্পত ৰাষ্ট্ৰীয় পৰ্যায়ৰ ইভেন্টৰ লগতে সময় সাপেক্ষে আন্তঃৰাষ্ট্ৰীয় পৰ্যায়ৰ সৰু সৰু ইভেন্টো অনুষ্ঠিত কৰিব পৰা যাব বুলি মন্তব্য কৰে ৷ যিটো বাক্সা জিলাৰ ক্ৰীড়াপ্ৰেমী ৰাইজৰ বাবে এক সুখবৰ বুলি অভিহিত কৰে মন্ত্ৰী ব্ৰহ্মই ৷ আনহাতে অসম চৰকাৰে ৰাজ্যখনৰ ব্লক পৰ্যায়তো গ্ৰাম্য ক্ৰীড়া প্ৰকল্প স্থাপন কৰাৰ আঁচনি হাতত লোৱা বুলি উল্লেখ কৰে মন্ত্ৰী ব্ৰহ্মই ৷ আজিৰ এই ক্ৰীড়া সামগ্ৰী বিতৰণী অনুষ্ঠানত চাপাগুৰি বিধানসভা সমষ্টিৰ অন্তৰ্গত মুঠ ৬৮ টা ক্ৰীড়া ক্লাৱৰ মাজত ফুটবল, ভলীবলৰ লগতে নেট বিতৰণ কৰা হয় ৷ আজিৰ উক্ত অনুষ্ঠানত জিলা নিৰ্বাচনী বিষয়া মানৱেন্দ্ৰ ভৰালী, জিলা ক্ৰীড়া বিষয়া দেবাংগ মহলীয়া, ইউপিপিএল দলৰ কেন্দ্ৰীয় উপসভাপতি দীপক কুমাৰ বসুমতাৰী, মুছলপুৰ জিলা সমিতিৰ সভাপতি নৃপেন বড়ো, সম্পাদক মইনুল আলীৰ লগতে কেবাগৰাকীও বিশিষ্ট ব্যক্তি উপস্থিত থাকে।