বিজেপি নেতা তেজিন্দৰ পাল বাগ্গাৰ গ্ৰেপ্তাৰকলৈ উত্তপ্ত পৰিস্থিতি

এগৰাকী বিজেপি নেতাৰ গ্ৰেপ্তাৰকলৈ উত্তপ্ত হৈ পৰিছে দিল্লী আৰু হাৰিয়ানা।বিজেপি নেতা তেজিন্দৰ পাল বাগ্গাক দিল্লীৰ পৰা গ্ৰেপ্তাৰ কৰাত পঞ্জাৱ আৰক্ষীৰ বিৰুদ্ধে অপহৰণৰ অভিযোগ তুলি দিল্লী আৰক্ষীয়ে এজাহাৰ দাখিল কৰিছে।আনহাতে, বিজেপি নেতা তেজিন্দৰক দিল্লীৰ পৰা পঞ্জাৱলৈ লৈ যোৱা গাড়ীখন বিজেপি শাসিত হাৰিয়ানাৰ আৰক্ষীয়ে আটক কৰি ৰাখে।সমগ্ৰ ঘটনাটোকলৈ আম আদমি পাৰ্টি আৰু বিজেপিৰ মাজত তীব্ৰ সংঘাতৰ সৃষ্টি হৈছে। বিজেপি নেতাসকলৰ অভিযোগ যে পঞ্জাৱ আৰক্ষীয়ে তেজিন্দৰৰ পিতৃক অপদস্থ কৰিছে। পঞ্জাৱৰ এখন আৰক্ষী থানাৰ সন্মুখত বিজেপি নেত-কৰ্মীয়ে প্ৰতিবাদো সাৱ্যস্ত কৰিছে।ইপিনে, দিল্লীৰ মুখ্যমন্ত্ৰী অৰবিন্দ কেজৰিৱালৰ ঘৰৰ সন্মুখত বিজেপি নেতা-কৰ্মীসকলে প্ৰতিবাদী ধৰ্ণা কাৰ্যসূচী ৰূপায়ন কৰে।পঞ্জাৱ আৰক্ষীয়ে জানিবলৈ দিছে যে তেজিন্দৰ বাগ্গাক ৰাজ্যখনত তেওঁৰ বিৰুদ্ধে দাখিল হোৱা এটা গোচৰৰ তদন্তত সহযোগ নকৰাৰ বাবে গ্ৰেপ্তাৰ কৰা হৈছে।

পঞ্জাৱ আৰক্ষীয়ে জানিবলৈ দিয়ে যে অভিযুক্ত তেজিন্দৰ বাগ্গাক তদন্তত সহযোগ কৰাৰ বাবে পাঁচখন জাননী দিয়া হৈছিল যদিও তেওঁ ইচ্ছাকৃতভাৱে তদন্তত উপস্থিত হোৱা নাছিল।সেয়ে আজি পুৱাই আইনী প্ৰক্ৰিয়া অনুসৰণ কৰি তেজিন্দৰ পাল বাগ্গাক তেওঁৰ দিল্লীৰ বাসগৃহৰ পৰা গ্ৰেপ্তাৰ কৰা হৈছিল।