গুৱাহাটী : কটন ৰাজ্যিক বিশ্ববিদ্যালয়ৰ এৰাবিক বিভাগৰ অৱসৰপ্ৰাপ্ত মুৰব্বী অধ্যাপক ডঃ আতাউৰ ৰহমানৰ মৃত্যুক বিভিন্ন জনে শোক প্ৰকাশ কৰিছে। সোমবাৰে নিশা ১০.৩০ বজাত গুৱাহাটীৰ গাড়ী গাৱৰ নিজ বাসগৃহত মৃত্যু ঘটে অৱসৰপ্ৰাপ্ত অধ্যাপক জনৰ। কটন কলেজ তথা কটন ৰাজ্যিক বিশ্ববিদ্যালয়ৰ এৰাবিক, উৰ্দু আৰু ফাৰ্ছী বিভাগৰ মূৰব্বী অধ্যাপক হিচাপে ২০১৫ চনৰ ৩০ ছেপ্তেম্বৰত অৱসৰ গ্ৰহণ কৰিছিল। কটন কলেজত প্ৰায় ৩১ বছৰ কাল অধ্যাপনা কৰিছিল মহান শিক্ষাবিদ গৰাকীয়ে। তেওঁ আৰবী, উৰ্দু, ফাৰ্ছী ভাষাৰ সুদক্ষ প্ৰবক্তা থকাৰ লগতে আৰৱী ব্যাকৰণৰ পণ্ডিত আছিল। কটন মহাবিদ্যালয়ৰ আৰবী আৰু ফাৰ্চী আৰু উৰ্দু বিভাগৰ মুৰব্বী অধ্যাপক ডঃ আতাউৰ ৰহমান ধুবুৰী জিলাত জন্ম গ্ৰহণ কৰে। ড৹ আতাউৰ ৰহমান গোটেই অসমৰ ভিতৰত এজন বিখ্যাত আৰবী ব্যাকৰণবিদ আৰু দাৰ্শনিক তথা বিদগ্ধ পণ্ডিত আছিল যিটো বৌদ্ধিক মহলৰ মাজত সৰ্বজনবিধিত।শিক্ষা জীৱনত গুৱাহাটি বিশ্ববিদ্যালয়ৰ পৰা সোণৰ পদকৰে পুৰস্কৃত হোৱা ড৹ আতাউৰ ৰহমানৰ বিয়োগত এক বৃহৎ ক্ষতি হোৱাৰ অনুভৱ কৰিছে বিভিন্ন জনে। বিদ্যালয়, মহাবিদ্যালয় তথা বিশ্ববিদ্যালয়ৰ আৰবী ভাষা-সাহিত্য তথা পাঠ্যক্ৰমৰ ওপৰত তেখেতৰ যথেষ্ঠ অৱদান আছিল। তেওঁৰ মৃত্যুৰ সময়ত দুগৰাকী পুত্ৰ, এজনী কন্যা, সহধৰ্মিনীসহ অজস্ৰ জনক এৰি থৈ যায়। শোক সন্তপ্ত পৰিয়াল বৰ্গলৈ গভীৰ সমবেদনা জ্ঞাপন কৰিছে আমছু’ৰ সাধাৰণ সম্পাদক মুশ্বাৰফ হুছেইন কবিৰ, উপদেষ্টা আজিজুৰ ৰহমান, আমছাৰ প্ৰাক্তন সভাপতি মৃদুল হক, সাধাৰণ সম্পাদক আব্দুল হাকিম, অধ্যাপক ডঃ নুৰ উদ্দিন আহমেদ, ড০ আবুবক্কৰ চিদ্দিকৰ লগতে বিভিন্ন দল সংগঠনে।প্ৰয়াত ড০ আতাউৰ ৰহমানক গুৱাহাটীৰ পৰা জন্মস্থান ধুবুৰীলৈ যোৱাৰ পৰিকল্পনা কৰিছে পৰিয়ালৰ লোকে। ধুবুৰীতেই সমাধিস্থ কৰাৰ পৰিকল্পনা কৰিছে বুলি জানিব পৰা গৈছে।
