উন্নয়নৰ জীয়া ফোঁপোলা ছবি ! জৰাজীৰ্ণ বাঁহৰ সাঁকোৱে জীয়াতু ভোগাইছে দুৰদুৰীয়াবাসীক ; এখন বাঁহৰ সাঁকো মেৰামতি কৰিবলৈয়ো অপৰাগ গাঁও পঞ্চায়ত ।
এখন জৰাজীৰ্ণ বাঁহৰ সাঁকোৰে দেশৰ স্বৰাজোত্তৰ ৭৫ টা বছৰে যাতায়াত কৰি আহিছে এখন গাঁওবাসী ৰাইজে।এইখন অসমৰে দৰঙৰ ছিপাঝাৰ উন্নয়ন খণ্ডৰ চেঙেলীয়াঝাৰ গাঁও পঞ্চায়ত এলেকাৰ দুৰদুৰীয়া নামৰ গাঁওখনৰ কথাকে ক’ব বিচৰা হৈছে।নাওপোটা-দিমীলা নদীৰ সংগম স্থলীত থকা এখন জৰাজীৰ্ণ বাঁহৰ সাঁকোৰ বিপৰীতে একেখন গাঁওতে গাড়ী ঘাট আৰু দিমীলা নদীৰ মথাউৰিত আছে আন দুখন বাঁহৰ সাঁকো।ইয়াৰে দিমীলা নদীৰ বাঁহৰ সাঁকো খন কিছুদিন আগতে বানপানীৰ উটি যোৱা বুলি প্ৰকাশ।
গাড়ীঘাটৰ বাঁহৰ সাঁকোৰে যাতায়াত কৰিব নোৱাৰে ৰাইজে। এই গাঁওখনত থকা তিনিখনকৈ জৰাজীৰ্ণ বাঁহৰ সাঁকোৱে জন জীৱন স্তব্ধ কৰি পণবন্ধী কৰি তুলিছে গাঁওবাসীক।পঞ্চায়ত ব্যৱস্থাই এনে বাঁহৰ সাঁকো সমূহ মেৰামতি কৰিব পাৰে যদিও টকা নাই বুলি টুলুঙা কথাৰে বছৰৰ পিছত বছৰ ধৰি পেলাই থোৱা বুলি অভিযোগ উঠিছে। বানৰ কৱলত পৰাৰ পিছত পানী শুকাইছে যদিও যাতায়াত, বেপাৰ বাণিজ্য, ছাত্ৰ ছাত্ৰী সকলে বিদ্যালয়লৈ যোৱাত সমস্যাৰ সৃষ্টি হৈছে। স্থানীয় বিধায়ক ডঃ পৰমানন্দ ৰাজবংশীয়ে গাঁওবাসীকলৈ গুৰুত্ব নিদিয়াৰ উঠিছে অভিযোগ।