হেৰাই গ’ল এক যাদুকৰী কণ্ঠ।ৰহস্যৰ আৱৰ্তত সোমাই পৰিছে জনপ্ৰিয় কণ্ঠশিল্পী কে কেৰ আকস্মিক মৃত্যু।মঙলবাৰে নিশা কলকাতাত এক সংগীতানুষ্ঠান পৰিৱেশন কৰি থকাৰ সময়তে অসুস্থ হৈ পৰা বলিউডৰ জনপ্ৰিয় কণ্ঠশিল্পী কে কেৰ আকস্মিক মৃত্যু হয়।অসুস্থ হৈ পৰাত তেওঁক হাস্পতালত ভৰ্তি কৰোৱা হৈছিল।
হাস্পতালত চিকিৎসকে কণ্ঠশিল্পীগৰাকীক মৃত ঘোষণা কৰে।কিন্তু তেওঁৰ মৃত্যু এতিয়া ৰহস্যৰ আৱৰ্তত সোমাই পৰিছে।তেওঁৰ মৃত্যুৰ সন্দৰ্ভত কলকাতাৰ নিউ মাৰ্কেট থানাত ৰুজু হৈছে অস্বাভাৱিক মৃত্যুৰ গোচৰ।আজি এছ এছ কে এমত প্ৰয়াত সংগীতশিল্পী কে কেৰ মৃতদেহৰ মৰণোত্তৰ পৰীক্ষা কৰা হ’ব।শাৰীৰিক অসুস্থতা নে অন্য কাৰণত মৃত্যু হৈছে সেয়া তদন্ত কৰি আছে আৰক্ষীয়ে।মৰণোত্তৰ পৰীক্ষাৰ প্ৰতিবেদন লাভ কৰাৰ পিছত জনপ্রিয় শিল্পীগৰাকীৰ মৃত্যুৰ কাৰণ কি আছিল ঠিক সেই কথা বুজিব পৰা যাব।
কেকেৰ ওঁঠ আৰু মূৰত ক’লা দাগ পোৱাৰ বিষয়টো আৰক্ষীয়ে বিশেষ ভাবে অনুসন্ধান কৰিব বুলি জানিব পৰা গৈছে।বিগত দুদিন কলকাতাৰ নজৰুল মঞ্চত আছিল তেওঁৰ অনুষ্ঠান।মঙলবাৰেও হাঁহিমুখীয়া আৰু সজীৱ শিল্পীগৰাকীয়ে মঞ্চত ইটোৰ পিছত সিটো গীত গাইছিল।
মাজে সময়ে তেওঁক ঘাম মচি থকা দেখা গৈছে।লগতে টেবুলৰ তলত ৰখা পানীৰ বটলৰ পৰা পানী খোৱা দেখা গৈছে শিল্পীগৰাকীক।তীব্ৰ গৰমত তেওঁ যে অস্বস্তি বোধ কৰিছিল,সেয়া স্পষ্টকৈ বুজা গৈছে।প্ৰচণ্ড গৰম বুলি কোৱাও শুনা যায় তেওঁক।ইংগিতেৰে মঞ্চৰ ওপৰৰ লাইটবোৰ দেখুৱাই কৈছিল, ‘‘নুমাই দিয়ক।’’জনপ্ৰিয় শিল্পীগৰাকীৰ এনে মৃত্যুক মুঠেও সহজ ভাবে ল’ব পৰা নাই তেওঁৰ অনুৰাগীসকলে৷শিল্পীগৰাকীৰ ওঁঠ আৰু মূৰত ক’লা দাগ পোৱাৰ কথাই তেওঁৰ মৃত্যুক অধিক সন্দেহৰ মাজলৈ ঠেলি দিছে৷এইগৰাকী যাদুকৰী কণ্ঠৰ গায়কৰ এই আকস্মিক মৃত্যুত এতিয়া দেশৰ লাখ-লাখ অনুৰাগী শোকত ম্ৰিয়মান হৈ পৰিছে।
জানিব পৰা মতে, কে কেৰ পত্নী আৰু পুত্ৰ ৰাতিপুৱাই কলকাতাত উপস্থিত হৈছে।মৰণোত্তৰ পৰীক্ষাৰ পিছত, তেওঁৰ মৃতদেহ পৰিয়ালক চমজাই দিয়ে ।