দেশৰ অন্যতম প্ৰসিদ্ধ ফেশ্বন ডিজাইনাৰ প্ৰত্যুষা গাৰিমেল্লাৰ মৃতদেহ হায়দৰাবাদৰ বনজাৰা হিলছৰ পৰা উদ্ধাৰ কৰা হয়। প্ৰাথমিকভাৱে আৰক্ষীয়ে ধাৰণা কৰিছে যে ৩৫ বছৰীয়া প্ৰত্যুষাই আত্মহত্যা কৰিছে। অৱশ্যে তেওঁৰ মৃত্যুকলৈ একাধিক ৰহস্য ঘণীভূত হৈছে।
বৰ্তমান দেশৰ জনপ্ৰিয় ফেশ্বন ডিজাইনাৰসকলৰ মাজৰ এজন আছিল প্ৰত্যুষা। তেওঁৰ ক্লায়েন্টৰ ভিতৰত আছে বলীউডৰ পৰা টলিউডলৈকে চেলিব্ৰেটীসকল।
কেৱল ৰূপালী পৰ্দাৰ চেলিব্ৰেটীয়েই নহয়, আন ক্ষেত্ৰৰো বহু চেলিব্ৰেটী তেওঁৰ ব্ৰেণ্ডৰ প্ৰতি আকৰ্ষিত আছিল।
আৰক্ষী সূত্ৰই জনোৱা অনুসৰি শনিবাৰে দুপৰীয়াৰ পিছত বনজাৰা হিলছত প্ৰত্যুষাৰ ফ্লেটটোত দীৰ্ঘসময় ধৰি কোনো সঁহাৰি নোপোৱাৰ পিছত নিৰাপত্তাৰক্ষীয়ে স্থানীয় আৰক্ষী থানাক ঘটনাটো অৱগত কৰে। খৱৰ পোৱাৰ পিছত আৰক্ষী আহি আৰু দুৱাৰ ভাঙি তেওঁৰ মৃতদেহ উদ্ধাৰ কৰে। ফ্লেটটোৰ বাথৰুমৰ পৰা প্ৰত্যুষাৰ মৃতদেহ উদ্ধাৰ কৰা হয়।
তদন্তৰ সময়ত আৰক্ষীয়ে তেওঁৰ কোঠাৰ পৰা বিহৰ বটল এটা উদ্ধাৰ কৰে। প্ৰাথমিকভাৱে প্ৰত্যুষাৰ মৃত্যু বিষক্ৰিয়াৰ বাবে বাবে হ’ব পাৰে বুলি ধাৰণা কৰা হৈছে। অৱশ্যে আৰক্ষীয়ে এতিয়ালৈকে এয়া আত্মহত্যা নে হত্যা কৰা হৈছে সেয়া নিশ্চিত কৰা নাই।
আৰক্ষীয়ে প্ৰত্যুষাৰ ঘনিষ্ঠ পৰিচিতসকলৰ পৰা জানিব পাৰে যে তেওঁ যোৱা কিছুদিন ধৰি মানসিক হতাশাত ভুগি আছিল। তেওঁৰ ঘনিষ্ঠসকলৰ ধাৰণা যে তেওঁৰ সেই হতাশা তেওঁৰ কামটোৰ সৈতে জড়িত আছিল।