নাজিৰা : দেশ তথা ৰাজ্যত মহামাৰী কৰ’নাৰ বিভীষিকাৰ বিৰুদ্ধে যুঁজ অব্যাহত থকাৰ সময়তে নাজিৰা মহকুমাত আৰম্ভ হৈছে জাপানীজ এনকেফেলাইটিছৰ সংহাৰ। যি সময়ত ক’ভিড-১৯ৰ বিভীষিকাৰ বাবে সমগ্ৰ দেশ তথা ৰাজ্যৰ জনসাধাৰণ আতংকিত হৈ আছে সেই সময়ত জাপানীজ এনকেফেলাইটিছৰ দৰে আন এক মহামাৰী আৰম্ভ হোৱাকলৈ আতংকিত হৈ পৰিছে সমগ্র নাজিৰা মহকুমাৰ জনসাধাৰণৰ। কালি ডিব্ৰুগড় আদিত্য নাৰ্ছিং হোমত ৰাজ্য তথা শিৱসাগৰ জিলাৰ বছৰটোৰ প্ৰথমজন জাপানীজ এনকেফেলাইটিছ ৰোগীৰ মৃত্যু হয়। নাজিৰা নগৰৰ ৯ নং ৱাৰ্ডৰ বাসিন্দা অ’এনজিচিৰ অৱসৰপ্ৰাপ্ত বিষয়া সত্য পালৰ পত্নী শান্তি পাল (৫৭)ক যোৱা ৩০ জুনৰ নিশা অতিপাত জ্বৰত আক্ৰান্ত হোৱাত শিৱসাগৰস্থিত অ’এনজিচি চিকিৎসালয়ত ভৰ্তি কৰা হয়। ২ জুলাই পৰ্যন্ত শান্তি পালৰ জ্বৰৰ ৰকোপ নকমাত চিকিৎসকে ডিব্ৰুগড় চিকিৎসা মহাবিদ্যালয়ৰ চিকিৎসালয়লৈ প্ৰেৰণ কৰে। চিকিৎসা মহাবিদ্যালয়ত ৩ জুলাইত শান্তি পালৰ ক’ভিড-১৯ৰ পৰীক্ষা কৰাত পালৰ কৰ’নাৰ ফলাফল নিগেটিভ আহে যদিও পাল জাপানীজ এনকেফেলাইটিছ ৰোগত আক্ৰান্ত হোৱাৰ ফলাফল লাভ কৰে। আনহাতে স্বামীয়ে কৰা অভিযোগ অনুসৰি চিকিৎসা মহাবিদ্যালয়খনৰয় সাধাৰণ কক্ষত এক অস্বাস্থ্যকৰ পৰিৱেশত চিকিৎসাধীন হৈ থকা শান্তি পালক ইতিমধ্যে জাপানীজ এনকেফেলাইটিছে মস্তিষ্ক, বৃক্ক আদি এক প্ৰকাৰ বিকল কৰি তোলে। পালৰ স্বাস্থ্য অধিক অৱনতি ঘটাত ৪ জুলাইত পালক ডিব্ৰুগড় আদিত্য নাৰ্ছিং হোমলৈ সংকটজনক অৱস্থাত স্থানান্তৰ কৰে। চিকিৎসালয়খনত চিকিৎসকে ৪ জুলাইৰ পৰাই পালক আৰোগ্যৰ অপ্ৰাণ চেষ্টা কৰে যদিও যোৱা কালি শান্তি পালৰ মৃত্যু হয়। ইফালে শান্তি পালৰ জাপানীজ এনকেফেলাইটিছত মৃত্যুৰ খবৰ বিয়পি পৰাৰ লগে লগে সমগ্ৰ নাজিৰা মহকুমাৰ জনসাধাৰণ আতংকিত হৈ পৰিছে পূৰ্বে মহামাৰীৰ ৰূপ ধাৰণ কৰি বহুতৰ প্ৰাণ কাঢ়ি নিয়া জাপানীজ এনকেফেলাইটিছৰ পুনৰ আৰ্বিভাৱকলৈ। উল্লেখ যে, নাজিৰা নগৰৰ ৯ নং ৱাডকে ধৰি নগৰখনৰ বিভিন্ন ৱাৰ্ড কদৰ্যময় পৰিৱেশে নাজিৰা পৌৰ প্ৰশাসনৰ স্বচ্ছ ভাৰতৰ স্বৰূপ উদঙাই দিছে।
