উজনি-মাজুলী : এখুদ ককাইদেউ খ্যাত ককাদেউতাৰ হাড়ৰ স্ৰষ্টা নৱকান্ত বৰুৱাৰ ১৯ সংখ্যক মৃত্যু দিৱসটি মঙ্গলবাৰে ‘সুৰ-শব্দ-কথা’ৰে পালন কৰা হয়। উত্তৰ কমলাবাৰী শাখা সাহিত্য সভাৰ উদ্যোগত আলিপুখুৰী শাখা সাহিত্য সভাৰ সহযোগত আয়োজিত এখনি ভ্ৰাম্যভাষিক সাহিত্য সন্মিলনত অসম সাহিত্য সভাৰ ১৯৯০ চনৰ বিশ্বনাথ চাৰিআলি অধিৱেশনৰ সভাপতি নৱকান্ত বৰুৱাদেৱলৈ শ্ৰদ্ধাঞ্জলি আগবঢ়ায়। আলিপুখুৰী শাখা সাহিত্য সভাৰ প্ৰাক্তন সম্পাদক কন্দৰ্প কুমাৰ কলিতাই আঁত ধৰা অনুষ্ঠানটিৰ উদ্দেশ্য ব্যাখ্যা কৰে উত্তৰ কমলাবাৰী শাখা সাহিত্য সভাৰ সম্পাদক শংকুসিদ্ধ নাথে| পদ্মভূষণ উপাধিৰে বিভূষিত আৰু অসম প্ৰকাশন পৰিষদ বঁটাৰে সন্মানিত মহীৰূহগৰাকীৰ কৰ্মময় জীৱনৰ আলোকপাত কৰে মাজুলী জিলা সাহিত্য সভাৰ নৱনিৰ্বাচিত সম্পাদক মনোজ্যোতি ৰেগন আৰু নগাঁও জিলাৰ সাহিত্য সভাৰ সভাপতি পৰাণ কুমাৰ বৰুৱাই। ব্যতিক্ৰমী অনুষ্ঠানটিত মাজুলী জিলা সাহিত্য সভাৰ কবি সন্মিলনৰ আহ্বায়ক মহিম চন্দ্ৰ নাথ, কবি গাৰ্গী ভূঞা, অংকুৰিতা ফুকন, সংগীতা বৰা, মধ্য মাজুলী শাখা সাহিত্য সভাৰ উপসভাপতি তথা কবি পাপু বৰা প্ৰমুখ্যে কেইবাজনো সাহিত্যসেৱকে কথা-কবিতাৰে সাহিত্য অকাডেমি বঁটাপ্ৰাপক নমস্য সাহিত্য কাণ্ডাৰীগৰাকীক অনন্য ৰূপত সোঁৱৰণ কৰে।
