দৈনন্দিন বাৰ্তা ডেস্ক :
গঁড়, হাতী, পহুৰ অবাধ বিচৰণ কাজিৰঙা ৰাষ্ট্ৰীয় উদ্যান। বয়ষ্ক অসুস্থ গঁড়ৰ অৱস্থা ৰাষ্ট্ৰীয় পথৰ কাষত খাদ্যৰ অভাৱত কাজিৰঙা ৰাষ্ট্ৰীয় উদ্যানৰ জীৱকূল এতিয়া দিশহাৰা। খাদ্য বিচাৰি জীৱকূলৰ জনাঞ্চলত অবাধ বিচৰণ।বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যান আৰু ব্যঘ্ৰ প্ৰকল্পৰ অন্তৰ্ভাগৰ জলস্তৰ হ্ৰাস হৈছে যদিও কমা নাই জীৱকূলৰ বিপদ। বিশেষকৈ পহু, হাতী আৰু গঁড় ৰাষ্ট্ৰীয় উদ্যানখনত খাদ্যৰ অভাৱ হোৱাৰ বাবে উদ্যানখনৰ দক্ষিণ সীমাৰে পাৰ হৈ যোৱা ৩৭ নং ৰাষ্ট্ৰীয় ঘাইপথৰ আশে-পাশে অৱস্থান লোৱা দেখা গৈছে।শনিবাৰে পুৱাৰে পৰা কুঠৰী অঞ্চলৰ বাঘমাৰীত ৰাষ্ট্ৰীয় পথৰ গাতে লাগি থকা জলাশয়ত এটা গঁড়ে অৱস্থান লৈ আছে। ভোকাতুৰ বয়ষ্ক আৰু অসুস্থ গঁড়টোৰ বাবে খাদ্য আৰু ভিটামিনৰ যোগান ধৰাৰ লগতে নিৰীক্ষণ কৰি আছে ৰাষ্ট্ৰীয় উদ্যান কৰ্তৃপক্ষই। গঁড়টোৰ সুৰক্ষাৰ বাবে যান-বাহন নিয়ন্ত্ৰণত বনৰক্ষী আৰু আৰক্ষী প্ৰশাসন ব্যস্ত হৈ পৰিছে। বিয়লি বেলালৈ গঁড়টো কিছু সুস্থ হৈ ঘাঁহ খাইছে যদিও সেই ঠাইৰ পৰা আঁতৰি যোৱা নাই।উল্লেখযোগ্য যে, ঠিক একে স্থানতে স্থানীয় বাসিন্দাৰ পাকঘৰৰ পৰা এজনী ঢেকীয়াপটীয়া বাঘ উদ্ধাৰ কৰাৰ পিছত শুকুৰবাৰে বিয়লি দেওচুৰত এটা প্ৰকাণ্ড গঁড় ৰাষ্ট্ৰীয় পথত বিচৰণ কৰিছিল।