কৰ্ণাটকৰ বিজেপি চৰকাৰৰ বিৰুদ্ধে ২০০০ কোটি টকাৰ ক’ভিড কেলেংকাৰীৰ অভিযোগ
দৈনন্দিন বাৰ্তা ডেস্ক :
২০০০ কোটি টকাৰ ক’ভিড কেলেংকাৰীৰ অভিযোগ উঠিছে কৰ্ণাটকৰ বিজেপি চৰকাৰৰ বিৰুদ্ধে৷ হাতত প্ৰমাণৰ নথিপত্ৰ আছে বুলি দাবী কৰিছে কংগ্ৰেছ নেতা চিদ্দাৰামাইয়াই৷ অভিযোগ মতে বজাৰৰ দামতকৈ বেছি দামত ভেণ্টিলেটৰ কিনা হৈছে৷ সাংবাদিকক বহু চৰকাৰী কাগজপত্ৰ আৰু নথি তুলি দিছে কংগ্ৰেছ নেতাজনে৷ এই নথিত চৰকাৰী বিষয়াই সেই সামগ্ৰী কিনিছে৷ তেওঁ জনায়, ক’ৰোনা ৰোগীৰ চিকিৎসাৰ বাবে ১০০০ টা ভেণ্টিলেটৰ কিনাৰ কথা আছে নথিপত্ৰত৷ প্ৰতিটো ভেণ্টিলেটৰৰ দাম ৪ লাখকৈ ধৰিলে কৰ্ণাটক চৰকাৰৰ মুঠ ৪০ লাখ টকা খৰচ হোৱাৰ কথা৷ কিন্তু ইয়েদুৰাপ্পা চৰকাৰে ১২০ কোটি টকাৰে সেই ভেণ্টিলেটৰ কিনিছে বুলি চিদ্দাৰামাইয়াই দাবী কৰে৷ ইয়াৰ লগতে বহু বিসংগতি ধৰা পৰিছে৷ তিনিটা বেলেগ তাৰিখত তিনিটা বেলেগ দামত ভেণ্টিলেটৰ কিনা হৈছে৷ নথিপত্ৰবোৰ চাই কৰ্ণাটকৰ প্ৰাক্তন মুখ্যমন্ত্ৰীয়ে কয়, ভেণ্টিলেটৰে প্ৰতি এবাৰ ৫.৬ লাখ, আন এবাৰ ১২.৩২ লাখ আৰু বেলেগ এবাৰত ১৮.২ লাখ টকা দাম দিয়া হৈছে৷ তদুপৰি মাস্ক, ছেনিটাইজাৰ, বিচনা, পিপি কিট আৰু থাৰ্মেল স্কেনাৰৰ দামতো বিসংগতি ধৰা পৰিছে৷ কংগ্ৰেছ নেতাজনে দাবী কৰি কয়, ক’ভিড চিকিৎসাত চৰকাৰৰ কি খৰচ হৈছে সেয়া জানিবলৈ ২০খনৰো বেছি চিঠি পঠোৱা হৈছে৷ এখন চিঠিৰো উত্তৰ দিয়া নাই চৰকাৰে৷ যদি হিচাপ পৰিষ্কাৰ আছে তেনে লুকুৱাবলৈ কি আছে৷ দেখুৱাই দিয়ক বুলি কংগ্ৰেছ নেতাজনে দাবী কৰে৷ কংগ্ৰেছৰ এই অভিযোগ অস্বীকাৰ কৰিছে বিজেপি চৰকাৰে৷ চিদ্দাৰামাইয়াৰ সংবাদ মেলৰ পাছতে তৎক্ষণাত কৰ্ণাটকৰ ৫জন মন্ত্ৰীয়ে সংবাদ মেলৰ আয়োজন কৰে৷