টিংখাঙৰ ৰাজগড়ত বলিন্দ্ৰ শইকীয়াৰ মুক্তিৰ দবীত চিপিআই (এল-এম) আৰক্ষী চকী ঘেৰাও

টিংখাং : ডিব্ৰুগড় জিলাৰ ৰাজগড়ত সোমবাৰে আৰক্ষীয়ে গ্ৰেপ্তাৰ কৰা চিপিআই (এম এল)ৰ নেতা বলিন্দ্ৰ শইকীয়াৰ মুক্তিৰ দাবীত আজি পাঁচ শতাধিক লোকে ৰাজগড় আৰক্ষী চকী ঘেৰাও কৰে। ৰাজগড় চৰকাৰী চিকিৎসালয়ৰ সমীপত থকা চিপিআই(এম এল)ৰ কাৰ্যালয়ৰ পৰা ৰাজগড় আৰক্ষী চকীলৈকে প্ৰায় দুই কিল’মিটাৰ দৈৰ্ঘৰ পথ হাতে হাতে প্লে’কাৰ্ড, দলীয় পতাকা লৈ খোজেৰে গৈ আৰক্ষী চকী ঘেৰাও কৰে। তেওঁলোকে চৰকাৰ বিৰোধী বিভিন্ন শ্ল’গান দিয়াৰ লগতে বলিন্দ্ৰ শইকীয়াক অতিশীঘ্ৰে মুক্তিৰ দাবী কৰে। জানিব পৰা মতে মৰাণ-নাহৰকটীয়া ৰাজ্যিক ঘাইপথৰ পৰা ৰাজগড় সৰোজনী চিলিং গ্ৰান্ট হৈ ধমন চেঁচা নেপালী গাঁৱত সংযোগ হোৱা প্ৰায় ৩০ কি:মি: দৈৰ্ঘ্য এটা পকীপথ নিৰ্মাণক কেন্দ্ৰ কৰি বলিন্দ্ৰ শইকীয়াৰ লগত স্থানীয় ৰাইজৰ সংঘাত সৃষ্টি হয়। এই সংঘাতৰ বাবেই অঞ্চলটোৰ কেবা শতাধিক লোকে সোমবাৰে বলিন্দ্ৰ শইকীয়াৰ বিৰুদ্ধে প্ৰতিবাদী শোভাযাত্ৰা কৰি গ্ৰেপ্তাৰৰ দাবী কৰিছিল। তদুপৰি প্ৰতিবাদী দলটোৱে ৰাজগড় নভকতীয়া গাঁৱত থকা বলিন্দ্ৰ শইকীয়াৰ বাসগৃহ ঘেৰাও কৰি তেওঁৰ বিৰুদ্ধে বিভিন্ন শ্ল”গান দিছিল। দলটোৰ জনৈক বিশ্বকৰ্মা উপাধিৰ এজন লোকে বলিন্দ্ৰ শইকীয়াৰ বিৰুদ্ধে পথ নিৰ্মাণত বিধি পথালি দিয়াৰ অভিযোগ তুলি আৰক্ষীক এখন এজাহাৰ দাখিল কৰা বুলি জানিব পৰা গৈছে। জনা মতে ইয়াৰ পিছতে আৰক্ষীয়ে এজাহাৰখনৰ ভিত্তিতে সোমবাৰৰ বিয়লি বলিন্দ্ৰ শইকীয়াক আটক কৰি নিশা গ্ৰেপ্তাৰ কৰে। আজি পুৱা বলিন্দ্ৰ শইকীয়াক ডিব্ৰুগড় জিলা কাৰাগাৰলৈ প্ৰেৰণ কৰে। বলিন্দ্ৰ শইকীয়াৰ বিৰুদ্ধে ১৯৫/২০ নম্বৰ এটা গোচৰ ৰুজু হোৱাৰ বিপৰীতে ইউ/এছ ১২০ বি/১৮৬/১৮৯/৩৫৩/৫০৬ ধাৰা প্ৰয়োগ কৰা হৈছে। ‘ কা’ বিৰোধী আন্দোলনৰ লগতে বলিন্দ্ৰ শইকীয়া চিপিআই (এম এল) আৰু কৃষক মহাসংঘৰ লগতো সক্ৰিয়ভাৱে জড়িত।