উচ্চতম ন্যায়ালয়ৰ ৰায় : পৈতৃক সম্পত্তিৰ ওপৰত কন্যা সন্তানৰো আছে সমান অধিকাৰ

অনলাইন বাৰ্তা, ১১ আগষ্ট : পৈতৃক সম্পত্তিৰ ওপৰত কন্যা সন্তানৰো সমান অধিকাৰ আছে ৷ মঙলবাৰে এই কথা জনালে উচ্চতম ন্যায়ালয়ে ৷ উচ্চতম ন্যায়ালয়ে জনায় যে ২০০৫ চনৰ আগতে অৰ্থাৎ হিন্দু উত্তৰাধিকাৰী আইনৰ সংশোধনী কাৰ্যকৰী হোৱাৰ আগতে পিতৃ-মাতৃ মৃত্যু হ’লেও তেওঁলোকৰ সম্পত্তিৰ উত্তৰাধিকাৰী হ’ব পাৰে কন্যা সন্তান ৷ ফলত এতিয়াৰ পৰা পিতৃ-মাতৃৰ মৃত্যুৰ পাচত কন্যাৰ বাবে সম্পূৰ্ণ আইনী অধিকাৰ প্ৰতিষ্ঠা হ’ল ৷ ২০০৫ চনৰ হিন্দু উত্তৰাধিকাৰী আইন কাৰ্যকৰী হয় ৷ কিন্তু এই আইন কাৰ্যকৰী হোৱাৰ আগতে যাৰ পিতৃ-মাতৃৰ মৃত্যু হৈছে তেওঁলোকে সম্পত্তিৰ সমান অধিকাৰ পাবনে সেই কথা থাকি গৈছিল ৷ মঙলবাৰে ন্যায়াধীশ অৰুণ মিশ্ৰৰ নেতৃত্বতাধীন তিনি সদস্যৰ বিচাৰপীঠে জনায় যে ২০০৫ চনৰ হিন্দু উত্তৰাধিকাৰী আইনৰ ছয় নম্বৰ ধাৰা অনুযায়ী কন্যা সন্তানে সম্পত্তিৰ ওপৰত সমান অধিকাৰ পাব৷ সেই অধিকাৰৰ পৰা তেওঁলোকক বঞ্চিত কৰিব নালাগে ৷ এই ৰায়দানৰ সময়ত ন্যায়াধীশ অৰুণ মিশ্ৰই কয়, পৈতৃক সম্পত্তিৰ ওপৰত কন্যাৰো পুত্ৰৰ সমান অধিকাৰ আছে ৷ এগৰাকী কন্যা সমগ্ৰ জীৱন পিতৃ-মাতৃৰ আদৰৰ৷ এজমালি সম্পত্তিৰ গৰাকী বাচি থাকক বা নাথাকক সম্পত্তিৰ ওপৰত কন্যাৰ সমগ্ৰ জীৱন অধিকাৰ আছে ৷ হিন্দু উত্তৰাধিকাৰী আইন (সংশোধীত) ২০০৫ চনৰ ৯ ছেপ্টেম্বৰত কাৰ্যকৰী হয়৷ সেই সময়ত জীৱিত পিতৃ আৰু কন্যাৰ বাবে এই আইন প্ৰযোজ্য৷ ২০০৫ চনৰ আগতে পিতৃৰ মৃত্যু হ’লেও কন্যাই এই অধিকাৰ পাব ৷