দৈনন্দিন বাৰ্তা ডেস্ক : বৈঠকত যোগ দিয়া মানুহে হিন্দী ক’ব নোৱাৰিলে তেওঁলোকক বৈঠক এৰি যাবলৈ ক’লে আয়ুষৰ সচিব বৈদ্য ৰাজেশ কোটেচাই ৷ সম্প্ৰতি এই ঘটনা ঘটিছে আয়ুষ মন্ত্ৰালয়ৰ এক ভাৰ্চুৱেল প্ৰশিক্ষণমূলক বৈঠকত৷ উল্লেখ্য যে কোটেচাই নিজে ফটফটীয়াকৈ ইংৰাজী ক’ব নোৱাৰে ৷ তেওঁ এই প্রশিক্ষণমূলক বৈঠকত অংশগ্ৰহণকাৰীক উদ্দেশ্যি কয়, যিসকলে হিন্দী ক’ব নোৱাৰে, তেওঁলোকে বৈঠক এৰি যাব পাৰে ৷ তেওঁৰ এনে মন্তব্য বিয়পি পৰাত দেশজুৰি বিতৰ্ক আৰম্ভ হয় ৷ তামিলনাডুৰ থুট্টুকুড়িৰ ডিএমকেৰ সাংসদ কানিমোঝিয়ে লগে লগে ছচিয়েল মিডিয়াত এই ঘটনাৰ তীব্ৰ সমালোচনা কৰি কোটেচাক বৰ্খাস্ত আৰু তেওঁৰ বিৰুদ্ধে ব্যৱস্থা ল’বলৈ দাবী জনাইছে ৷ সাংসদজনে টুইটাৰত লিখে, কোটেচাৰ বিবৃতিয়ে জনাই দিছে হিন্দীৰ আধিপত্য বিস্তাৰৰ চেষ্টা চলিছে ৷ ই অতি নিন্দনীয় ৷ তামিলনাডুৰ শিৱগংগা লোকসভা সমষ্টিৰ সাংসদ কাৰ্তি চিদাম্বৰমে এই ঘটনাক নিন্দা কৰি কয়, হিন্দীত আয়ুষৰ প্ৰশিক্ষণত তামিল প্ৰতিনিধিক অবহেলা কৰা হৈছে ৷
