বালা চাহেব থাকৰেৰ সপোনৰ ” শিৱ সেনা” এতিয়া বঙহৰ যুজঁত বিধস্ত। একনাথ সিন্দে আৰু উদ্ধব থাকৰেৰ ক্ষমতাকেন্দ্ৰিক যুজঁত শিৱ সেনাই ক্ৰমে হেৰুৱাই পেলাইছে পূৰ্বৰ গৌৰৱোজ্জ্বল দিনবোৰ। মুখ্যমন্ত্ৰীৰ চকী হেৰোৱাৰ পিছত উদ্ধব থাকৰেৰ হাতৰ পৰা ওলাই গ’ল প্ৰতীক। শেহতীয়াকৈ কেন্দ্ৰীয় নিৰ্বাচনী আয়োগে শিৱসেনা একনাথ সিন্দে গোটক অৰ্পণ কৰাৰ পিছত থৰকাচুটি হেৰুৱাইছে একালৰ প্ৰবল প্ৰতাপী বালা চাহেব থাকৰেৰ উত্তৰাধিকাৰী উদ্ধব থাকৰেই। শেহতীয়াকৈ একনাথ সিন্দেই চকু দিছে শিৱ সেনাৰ ১৯১ কোটি আৰু ৩৬২ টা কাৰ্যালয়ৰ ওপৰত। দাদৰাত থকা শিৱসেনাৰ ভৱনটো সম্প্ৰতি আছে উদ্ধব থাকৰেৰ দখলত। আনহাতে উদ্ধব থাকৰেৰ অধিবক্তা কিপাল শিৱালে উচ্চতম ন্যায়ালয়ত অবগত কৰামতে শিৱসেনাৰ পন আৰু সম্পত্তি অধিগ্ৰহণ কৰিবলৈ চেষ্টা অব্যাহত ৰাখিছে।
একেদৰে সিন্দে ফৈদে শিৱসেনাৰ কোষাধ্যক্ষ নিযুক্তি দিলে সংবিধান অনুসৰি সকলো সা-সম্পত্তি আৰু ধন সিন্দে ফৈদলৈ হস্তান্তৰ হব বুলি ঘোষনা কৰিছে। আনহাতে ২৭ ফেব্ৰুৱাৰীত অনুষ্ঠিত হব বাজেট অধিবেশন। উদ্ধব থাকৰেৰ হাতত আছে ১০ গৰাকী বিধায়ক আৰু দুই তিনিগৰাকী সাংসদ। যদি সিন্দেগোটে হুইপ জাৰি কৰে এইসকলে উদ্ধব থাকৰেৰ সংগ ত্যাগ কৰাৰ সম্ভবনা নুই কৰা নাই ৰাজনৈতিক বিশ্লেষক সকলে। বালা চাহাব থাকৰেৰ “শিৱসেনা” পূৰ্বৰ দৰে জিলিকি উঠে নে নাই সেয়া সময়ত সকলো পোহৰলৈ অহাটো নিশ্চিত।