সংসদৰ পৰা অযোগ্য হোৱাৰ পিছত শনিবাৰে কংগ্ৰেছ নেতা ৰাহুল গান্ধীয়ে নিজৰ চৰকাৰী বাংলো খালী কৰাৰ সময়তে কয় যে সঁচা কথা কোৱাৰ বাবে তেওঁ যিকোনো মূল্য দিবলৈ সাজু। ৰাহুল গান্ধীয়ে কয় যে এই বাংলো দেশবাসীয়ে তেওঁক দিছিল আৰু তেওঁ ১৯ বছৰ তাতেই আছিল। ৰাহুল গান্ধীয়ে নিজৰ টুগলাক লেন বাংলোৰ চাবি আনুষ্ঠানিকভাৱে গতাই দি কয় যে, “মই থাকিব নিবিচাৰো। ১৯ বছৰ বাস কৰা ঠাইখন মোৰ পৰা কাঢ়ি লোৱাটো কোনো সমস্যা নাই।” ৰাহুলে ১৯ বছৰীয়া ঠিকনা এৰি যোৱাৰ সময়ত ৰাহুল গান্ধীৰ মাতৃ ছোনিয়া গান্ধী, ভগ্নী প্ৰিয়ংকা গান্ধী ভাদ্ৰাও তাত উপস্থিত আছিল।
ৰাহুল গান্ধীয়ে কয় যে সঁচা কথা কোৱাৰ মূল্য আছে।মই মূল্য দিছো।
যোৱাৰ আগতে ৰাহুল গান্ধীয়ে ষ্টাফৰ লগত হাত মিলাই নিজে দুৱাৰখন বন্ধ কৰি চাবিটো আগবঢ়াই দি সাংবাদিক আৰু ফটোগ্ৰাফাৰৰ কাষ চাপিছিল।
প্ৰিয়ংকা গান্ধী ভাদ্ৰাই কয়, “মোৰ ভাইটিয়ে যি কৈছে সেয়াই সত্য। তেওঁ চৰকাৰৰ বিষয়ে সঁচা কথা কৈছিল আৰু সেইবাবেই এই সকলোবোৰ ঘটি আছে। কিন্তু তেওঁ অতি সাহসী, তেওঁ কেতিয়াও ভয় নকৰে। তেওঁ নিজৰ যুঁজখন আগুৱাই নিব।”
“ঘৰ এৰি যোৱাটো ৰাহুল গান্ধীৰ বাবে কোনো ইছ্যু নহয়, কিন্তু সঁচা কথা কোৱাৰ বাবে মোডী চৰকাৰে ৰাহুল গান্ধীক যিদৰে লক্ষ্য কৰি লৈছে সেয়া ৰাজনৈতিক প্ৰতিশোধ। প্ৰত্যেক ভাৰতীয়ই এতিয়া এইটো দেখিব পাৰিব — দুবছৰৰ কাৰাদণ্ড, তাৎক্ষণিক অযোগ্য ঘোষণা, তাৎক্ষণিক জাননী ঘৰ খালী কৰক।’- এই মন্তব্য কংগ্ৰেছৰ সাধাৰণ সম্পাদক কে চি ভেনুগোপালৰ।
২৩ মাৰ্চত চুৰাটৰ আদালতে ২০১৯ চনৰ মানহানিৰ গোচৰত ৰাহুল গান্ধীক দোষী সাব্যস্ত কৰিছিল ‘কেনেকৈ সকলো চোৰৰ মাজত মোডী উপাধি মিল আছে’। যিহেতু এই গোচৰত তেওঁক দুবছৰৰ কাৰাদণ্ড বিহা হৈছিল, সেয়েহে ততাতৈয়াকৈ তেওঁক লোকসভাৰ পৰা অযোগ্য ঘোষণা কৰি চৰকাৰী বাংলো খালী কৰিবলৈ কোৱা হৈছিল। ৰাহুল গান্ধীয়ে চুৰাট আদালতৰ নিৰ্দেশৰ বিৰুদ্ধে উচ্চ ন্যায়ালয়ত আবেদন জনোৱাৰ সময়তে তেওঁ ১৪ এপ্ৰিলৰ পৰা স্থানান্তৰ প্ৰক্ৰিয়া আৰম্ভ কৰে। ২০ এপ্ৰিলত অধিবেশন আদালতে ৰাহুল গান্ধীৰ দোষী সাব্যস্ত হোৱাৰ ওপৰত স্থগিতাদেশৰ আবেদন নাকচ কৰে।
দলটোৱে এই গোচৰত অন্য আইনী বিকল্পৰ সুবিধা ল’ব বুলি জানিবলৈ দিয়ে যদিও ইয়াৰ মাজতে ৰাহুল গান্ধীয়ে নিজৰ বাংলো খালী কৰে।
২০০৪ চনত প্ৰথমবাৰৰ বাবে সাংসদ হৈছিল ৰাহুল গান্ধীয়ে পৰিয়ালৰ আমেথি আসনৰ পৰা। ২০১৯ চনত ৰাহুল গান্ধীয়ে বিজেপিৰ স্মৃতি ইৰাণীৰ হাতত আমেথিক হেৰুৱাইছিল যদিও কেৰালাৰ ৱায়ানাদৰ পৰা জয়লাভ কৰি লোকসভাৰ সদস্যপদ অক্ষুণ্ণ ৰাখিছিল।