ভোটদানৰ বাবে মাত্ৰ ১০ দিন বাকী থকা সময়ত কৰ্ণাটকত আৰম্ভ হৈছে প্ৰধানমন্ত্ৰী মোডীৰ সভা। ৰাজ্যৰ ২২৪খন আসনৰ বিধানসভাৰ বাবে একক পৰ্যায়ত ভোটগ্ৰহণ অনুষ্ঠিত হ’ব।অহা ১০ মে’ত কৰ্ণাটকত অনুষ্ঠিত হ’ব বিধানসভা নিৰ্বাচন। কৰ্ণাটকত পুনৰবাৰ বিজেপিয়ে পদুমক জয় কৰাবলৈ আৰম্ভ কৰিছে প্ৰচাৰ। এই সময়ছোৱাত প্ৰধানমন্ত্ৰীয়ে দুদিনত ৬খন ৰেলী আৰু দুটা ৰোড শ্ব’ অনুষ্ঠিত কৰিব। প্ৰধানমন্ত্ৰী মোডীৰ উপৰিও কৰ্ণাটকত বিজেপিৰ প্ৰবীণ নেতা অমিত শ্বাহ, জগত প্ৰকাশ নড্ডা, ৰাজনাথ, শিৱৰাজ সিং চৌহান আৰু যোগী আদিত্যনাথেও ৰোড শ্ব’ আৰু ৰেলী অনুষ্ঠিত কৰিব।
শনিবাৰে দুদিনীয়া ভ্ৰমণসূচীৰে কৰ্ণাটকত উপস্থিত হৈছে প্ৰধানমন্ত্ৰী মোডী। নিজৰ সময়সূচী অনুসৰি শনিবাৰে পুৱা ১১ বজাত হুমনাবাদত উপস্থিত হ’ব প্ৰধানমন্ত্ৰী। তাৰ পিছত দিনৰ ১ বজাত বিজয়াপুৰাত আৰু দুপৰীয়া ২.৪৫ বজাত কুদাচীত সম্বোধন কৰিব ৰেলী। এই সমাৱেশৰ পিছত সন্ধিয়া বাংগালুৰুলৈ যাব প্ৰধানমন্ত্ৰী মোডী, য’ত তেওঁ মেগা ৰোড শ্ব’ কৰিব। নিৰ্বাচনলৈ মাত্ৰ ১০ দিন বাকী।
৩০ এপ্ৰিলৰ পুৱা ১১.৩০ বজাত কোলাৰত প্ৰধানমন্ত্ৰী মোডীৰ ৰাজহুৱা সভা। ইয়াৰ পিছত ৰামনগৰ জিলাৰ চন্নাপট্নাত দিনৰ ১.৩০ বজাত এখন ৰেলী অনুষ্ঠিত হ’ব। ৰামনগৰৰ পাছত হাছানৰ বেলুৰলৈ যাব প্ৰধানমন্ত্ৰী য’ত বিয়লি ৩.৪৫ বজাত ৰাইজক সম্বোধন কৰিব। দেওবাৰে সন্ধিয়া টিপু চুলতানৰ চহৰ মহীশূৰত উপস্থিত থাকিব প্ৰধানমন্ত্ৰী মোডী। মহীশূৰত প্ৰধানমন্ত্ৰীয়ে ৰোডশ্ব’ৰ জৰিয়তে বিজেপিৰ বাবে ভোট বিচাৰিব।ভোটদানৰ বাবে মাত্ৰ ১০ দিন বাকী থকা সময়তে কৰ্ণাটকত প্ৰধানমন্ত্ৰী মোডীৰ সমাৱেশ আৰম্ভ হৈছে। এনে পৰিস্থিতিত বিজেপি আশাবাদী যে তেওঁলোকৰ এই ট্ৰাম্প কাৰ্ডে এইবাৰো নিৰ্বাচনী যুঁজখন নিজৰ পক্ষত ঘূৰাই আনিব। কৰ্ণাটকৰ ২২৪খন আসনৰ বিধানসভাৰ বাবে একক পৰ্যায়ত ভোটগ্ৰহণ অনুষ্ঠিত হ’ব। অহা ১৩ মে’ত ঘোষণা কৰা হ’ব নিৰ্বাচনৰ ফলাফল।