গোসাঁইগাঁও মহকুমাৰ খাদ্য আৰু অসামৰিক যোগান বিভাগৰ অধীনস্থ বিন্যাখাতা সমবায় সমিতিৰ ২০২৩-২৮ বৰ্ষৰ বাবে গঠন হ’ব লগীয়া সঞ্চালক মণ্ডলীৰ অহা ১৩ মে’ তাৰিখে সাধাৰণ নিৰ্বাচন অনুষ্ঠিত হ’ব। সেই উপলক্ষে আজি মনোনয়ন দাখিল পৰ্বত বি পি এফ দলৰ ১৫ প্ৰাৰ্থী , ইউ পি পি এল দলৰ ১২ প্ৰাৰ্থী আৰু বিজেপি দলৰ ১০ গৰাকী প্ৰাৰ্থীয়ে ৰিটাৰ্নিং বিষয়া গৌতম সৰকাৰৰ হাতত মনোনয়ন পত্ৰ দাখিল কৰে৷
বিন্যাখাতা সমবায়ৰ সমিতিৰ ১৫ টা সঞ্চালক মণ্ডলীৰ পদৰ বাবে সৰ্বমুঠ ৩৭ গৰাকী প্ৰাৰ্থীয়ে মনোনয়ন দাখিল কৰে। ইউ পি পি এল দলৰ প্ৰাৰ্থী সকলে ঢোল খোল বজাই ইউ পি পি এল জিন্দাবাদ ,প্ৰমোদ বড়ো জিন্দাবাদ ধ্বনি দি বিন্যাখাতা সমবায় সমিতিৰ কাৰ্যালয়ত উপস্থিত হৈ মনোনয়ন পত্ৰ দাখিল কৰে ৷
মনোনয় পত্ৰ দাখিল পৰ্বত ইউ পি পি এলৰ গোসাইগাঁও জিলা সমিতিৰ সভাপতি অলিন্দ বসুমাতাৰী ,ইউ পি পি এলৰ যুৱ নেতা তথা অধিবক্তা মাফিজুৰ ৰহমান উপস্থিত আছিল৷ বিজেপি আৰু বি পি এফ দলেও দলে বলে উপস্থিত হৈ মনোনয়ন পত্ৰ দাখিল কৰে৷ বিজেপি দলৰ গুমা মণ্ডল সমিতিৰ সভাপতি নীলেশ্বৰ ৰায়, বিজেপি দলৰ যুৱ নেতা কাইন হেম্বম মনোনয়ন পত্ৰ দাখিল পৰ্বত উপস্থিত আছিল৷
বি পি এফ দলৰ নেতা অশোক মাৰাণ্ডীৰ লগতে ভালে কেইজন বি পি এফ দলৰ নেতাই মনোনয় পত্ৰ দাখিল পৰ্বত উপস্থিত থাকে ৷ উল্লেখনীয় বিষয় যে ৩৮ খন গাঁও সাঙুৰি লৈ গঠিত হোৱা সমবায় সমিতিখনৰ অংশীদাৰ ভোটাৰ আছে ৩,২৩১ গৰাকী৷ আজিৰ এই মনোনয় পত্ৰ দাখিল কাৰ্যৰ পৰ্যবেক্ষক হিচাপে উপস্থিত থাকে সমবায় বিভাগৰ জ্যেষ্ঠ পৰিদৰ্শক ছানাৰাম ব্ৰক্ষ৷