চুবুৰীয়াৰ বাৰীৰ পৰা আম চুৰি কৰাৰ অভিযোগত এজন যুৱকক নৃশংসভাৱে প্ৰহাৰ কৰা হয় ৰাজস্থানৰ কোটাত। ছুৰীৰে আঘাত কৰি তেওঁৰ মৃত্যু কৰা বুলি অভিযোগ উত্থাপন হৈছে। সৰু আম এটাৰ বাবে এজন যুৱকৰ মৃত্যুৰ ঘটনাই অঞ্চলটোত চাঞ্চল্য বিয়পাইছে। ইতিমধ্যে আৰক্ষীয়ে একাংশ অচিনাকি ব্যক্তিৰ বিৰুদ্ধে গোচৰ ৰুজু কৰি তদন্ত আৰম্ভ কৰিছে।
আৰক্ষীৰ সূত্ৰ অনুসৰি মৃত লোকজনৰ নাম সুৰজ কৰণ মীনা। বৃহস্পতিবাৰে দুপৰীয়া তেওঁ নন্দলাল বাইৰাৰ বাৰীত প্ৰৱেশ কৰে। অভিযোগ মতে, কাকো নোকোৱাকৈয়ে তেওঁ গছজোপাৰ পৰা আম ছিঙিছিল। সেই সময়ত তেওঁক ঘেৰি ধৰিছিল বাগিচাৰ মালিক আৰু তেওঁৰ পৰিয়ালৰ কেইজনমান সদস্যই। কথা-বতৰা আৰম্ভ হ’ল। স্থানীয় ৰাইজে সুৰজক পথাৰত পেলাই দি লাঠিৰে কোবাবলৈ ধৰিলে। আঘাতৰ বাবে তেওঁ অচেতন হৈ পৰে।
পিছত ৫-৬ জন ব্যক্তিয়ে সুৰজক মটৰ চাইকেলত উঠাই পুনৰ প্ৰহাৰ কৰাৰ অভিযোগ।
পিছত গাঁওবাসীৰ লগতে স্থানীয় ৰাইজৰ পৰা তথ্য লাভ কৰি ঘটনাস্থলীলৈ আহিছিল আৰক্ষী। ৰক্তাক্ত আৰু অচেতন হৈ পৰা সুৰজক স্থানীয় চিকিৎসালয়লৈ লৈ যোৱা হয়। কিন্তু শুকুৰবাৰে পুৱা চিকিৎসকে সুৰজক মৃত ঘোষণা কৰে।
আৰক্ষীয়ে জনোৱা মতে, সুৰজৰ মৃত্যুৰ সঠিক পদ্ধতি এতিয়াও স্পষ্ট হোৱা নাই। মৰণোত্তৰ পৰীক্ষাৰ ৰিপৰ্ট আহিলে সবিশেষ দিয়া হ’ব। অৱশ্যে সেই ঘটনাত কেইবাজনো লোকৰ বিৰুদ্ধে গোচৰ ৰুজু কৰিছে আৰক্ষীয়ে। অভিযুক্তৰ সন্ধান অব্যাহত আছে। সমগ্ৰ ঘটনাৰ তদন্ত অব্যাহত আছে।