দৰঙৰ ধুলাত ঘৰুৱা কাজিয়াৰ সূত্ৰপাতত দুই ফৈদৰ মাজত মাৰপিট : হাতে হাতে দা, কুঠাৰলৈ আক্ৰমণ, আহত ১১

খাৰুপেটীয়া

দৰঙৰ ধুলাত দুই ফৈদৰ মাজত সংঘটিত হোৱা তুমুল কাজিয়াই অঞ্চলজুৰি তীব্ৰ চাঞ্চল্যৰ সৃষ্টি কৰিছে। ঘৰুৱা কাজিয়াৰ সূত্ৰপাতত দুই ফৈদৰ মাজত সংঘটিত হোৱা কাজিয়াত ১১জনকৈ লোক গুৰুতৰভাৱে আহত হয়। ঘটনা সংক্ৰান্তত জানিব পৰা মতে দৰং জিলাৰ ধুলা থানাৰ অন্তৰ্গত আটাকাটা গাঁৱত মঙলবাৰে পুৱাই হাতে হাতে দা, কুঠাৰ, লাঠি লৈ আবু শ্বাহা নামৰ ব্যক্তি গৰাকীৰ ঘৰত গৈ আক্ৰমণ কৰে একেখন গাঁৱৰ ৮ জনীয়া গুণ্ডা বাহিনীৰ দল এটাই৷ এজাহাৰত উল্লেখ কৰা মতে দীৰ্ঘদিনীয়া ঘৰুৱা বিবাদৰ বাবেই আটাকাটা গাঁৱৰ হাবেজ আলী নামৰ যুৱকজনৰ লগত ৮ জনীয়া গুণ্ডা বাহিনীৰ দলটোৱে হাতে হতে দা, কুঠাৰলৈ একেখন গাঁৱৰ আবু শ্বাহা নামৰ ব্যক্তি গৰাকীৰ ঘৰত অনাধিকাৰে প্ৰৱেশ কৰি পৰিয়ালবৰ্গৰ ওপৰত আক্ৰমণ কৰিবলৈ ধৰে। দা আৰু কুঠাৰৰ আক্ৰমণত আবু শ্বাহাৰ লগতে আজিত আলী, হাবিবুৰ ৰহমান, আজগৰ আলী, নজৰুল হক, মজিবুৰ ৰহমান,  সদাগৰ আলী, মতিবৰ ৰহমান, ছাহাৰা খাতুন, আছিয়া বেগম আদি পুৰুষ-মহিলাসহ কেইবাজনো ব্যক্তি গুৰুতৰভাৱে আহত হয়। স্থানীয় ৰাইজৰ সহযোগত আহত লোকসকলক মঙলদৈ অসামৰিক চিকিৎসালয়লৈ প্ৰেৰণ কৰা হয়। ঘটনা সংক্ৰান্তত ছাহাৰা খাতুনে হাবেজ আলী, ইব্ৰাহিম আলী, জয়নাল আব্দিন, ইউনুছ আলী, শ্বৰীফ উদ্দিন, আবু কালাম, আব্দুল আজিত, ছাবেদ আলীৰ বিৰূদ্ধে ধুলা আৰক্ষী থানাত এখন এজাহাৰ দাখিল কৰে। ঘটনা সংঘটিত কৰি গুণ্ডা বাহিনীৰ দলটোৱে ঘটনাস্থলীৰ পৰা পলায়ন কৰে যদিও আবুল কালাম নামৰ ব্যক্তিজনক ধুলা আৰক্ষীয়ে আটক কৰিবলৈ সক্ষম হয়। উল্লেখ্য যে ঘৰুৱা কাজিয়াৰ সূত্ৰপাতত হাবেজ আলীৰ লগত অহা ৮ জনীয়া দলটোৰ এজনৰ হাতত পিষ্টল লৈ আক্ৰমণ কৰিবলৈ গৈছিল বুলি এজাহাৰকাৰী ছাহাৰা খাতুনে অভিযোগ কৰে৷ ঘটনা সন্দৰ্ভত আৰক্ষীৰ তদন্ত আৰম্ভ হৈছে ৷