প্ৰমোদ বড়োৰ বাজেট দুটা । এটা ৰাইজক দেখুওৱা বাজেট আৰু আনটো তেওঁৰ গোপন বাজেট। সেইকাৰণে তেওঁ দিছপুৰক হিচাপ দিব নোৱাৰে — এই ভাষ্য বিপিএফ দলৰ সভাপতি তথা প্ৰাক্তন বিটিচি প্ৰধান হাগ্ৰামা মহিলাৰীৰ । তামুলপুৰ জিলা বিপিএফৰ অন্তৰ্গত দৰঙাজুলি আৰু নাগ্ৰীজুলি ব্লক বিপিএফৰ উদ্যোগত কুমাৰীকাটা দুৰ্গা মন্দিৰ বাকৰিত অনুষ্ঠিত এক যোগদান সভাত অংশগ্ৰহণ কৰি মহিলাৰীয়ে এই মন্তব্য আগবঢ়ায় । মহিলাৰীয়ে পুনৰ কয় প্ৰমোদ বড়োৱে ৰাইজৰ উন্নয়নৰ বাবে ধন খৰছ নকৰে । নিজৰ পকেটত সোমোৱাৰ বাবেহে চিন্তা কৰে । ভাষণত তেওঁ আকৌ কয় আমাৰ চৰকাৰ যেতিয়া হব প্ৰথম উচ্ছেদৰ জাননী বিটিআৰৰ বন বিভাগৰ কাৰ্যবাহী সদস্য ৰঞ্জিত বসুমতাৰীক দিয়া হব। তামুলপুৰ জিলা বিপিএফৰ সভাপতি তথা বিটিচিৰ প্ৰাক্তন কাৰ্যবাহী সদস্য মহেশ্বৰ বসুমতাৰীয়ে আঁত ধৰা সভাখনত তেওঁ কয় যে আজি বিপিএফ দলত যোগদান কৰা লোকসকলক মই উষ্ম আদৰণি জনাইছোঁ ।
আজি যোগদান কৰা সৰহ সংখ্যক লোক ইউপিপিএল দলৰ । সাম্প্ৰতিক সময়ত বিপিএফ দল শক্তিশালী হৈ উঠা বুলি মন্তব্য কৰি মহিলাৰীয়ে
আগন্তুক লোকসভা নিৰ্বাচনত দৰং-ওদালগুৰি আৰু কোকৰাঝাৰত নিজাববীয়াকৈ প্ৰাৰ্থীত্ব প্ৰদান কৰিব বুলি পুনৰ স্পষ্ট কৰি দিয়ে । তেওঁ কয় কেন্দ্ৰীয় কাৰ্যনিৰ্বাহকত আমাৰ দলীয় সিদ্ধান্ত লোৱা হৈছে যে আমি কাৰো লগতেই মিত্ৰতা নকৰো।
ইপিনে সভাৰ অন্তত সাংবাদিকৰে হোৱা এক আছুতীয়া সাক্ষাৎকাৰত বিপিএফ দলৰ প্ৰাক্তন সাধাৰণ সম্পাদক ইমানুৱেল মুছাহাৰী বিপিএফ দললৈ প্ৰত্যাৱৰ্তন কৰাৰ সম্ভাৱনাৰ খবৰ চলি থকা বুলি সাংবাদিকে সোধা এক প্ৰশ্নৰ উত্তৰত হাগ্ৰামা মহিলাৰীয়ে কয় কেৱল ইমানুৱেল মুছাহাৰীয়েই নহয় এনে বহু শীৰ্ষ নেতা অচিৰেই বিপিএফ দলত পুনৰ যোগদান কৰিব । সভাত উপস্থিত থাকি বিপিএফ দলৰ উপ সভাপতি তথা বিটিচিৰ প্ৰাক্তন মুখ্য কাৰ্যবাহী সদস্য খামফা বৰগয়াৰীয়ে কয় বিটিচিৰ ৪০ টা পৰিষদীয় সমষ্টিত বিপিএফ দলত যোগদান চলি আছে । বিভিন্ন দল ত্যাগ কৰি বহু লোকে বিপিএফ দলত যোগদান কৰি আছে । বিটিচিত হাগ্ৰামা মহিলাৰীৰ চৰকাৰ দৰকাৰ বাবেই এনেধৰণে বিপিএফ দলত বিভিন্ন দল সংগঠন ত্যাগ কৰি যোগদান কৰিছে ।
ৰাইজে এতিয়া উপলব্ধি কৰিছে যে বিটিচিত হাগ্ৰামা মহিলাৰীৰ চৰকাৰ অতি প্ৰয়োজন । ভাষণত তেওঁ পুনৰ কয় বিপিএফ দলেই একমাত্ৰ দল যি দলে কোনো ধৰ্মক বেয়া নাপায় কোনো ভাষাক বেয়া নাপায় । বিপিএফ দলৰ ধৰ্ম এক — ভাষা এক । ভাষণত তেওঁ বৰ্তমানৰ চৰকাৰখনক সমালোচনা কৰি কয় বিগত তিনিটা বছৰত এইখন চৰকাৰে বিটিচিৰ একো উন্নয়নমূলক কাম কৰিব নোৱাৰিলে । সভাত বিপিএফ দলৰ সংখ্যালঘু কোষৰ সভাপতি চুলতান আলমেও ভাষণ ৰাখে । সভাত বিপিএফ দলৰ সাধাৰণ সম্পাদক তথা প্ৰাক্তন বিধায়ক মনেশ্বৰ বড়ো , দলৰ উপ সভাপতি ৰবিলোচন মোছাহাৰী , বিটিচিৰ প্ৰাক্তন কাৰ্যবাহী সদস্য জগদীশ চৰকাৰ , গণেশ কছাৰী , দলৰ সম্পাদক প্ৰবীণ দাস , প্ৰদীপ দত্ত আদিকে ধৰি কেইবাজনো নেতা আৰু সহস্ৰাধিক ৰাইজ উপস্থিত থাকে । আজিৰ এই সভাতেই দৰঙাজুলি পৰিষদীয় সমষ্টিৰ ৮২৪ আৰু নাগ্ৰীজুলি পৰিষদীয় সমষ্টিৰ ৭৭০ মুঠ ১৫৯৪ জনে আনুষ্ঠানিকভাৱে বিপিএফ দলত যোগদান কৰে ।