আজি বোকখাত পুৱতি সভা ভৱনত বোকাখাত পুৱতি সাহিত্য সভাৰ উদ্যোগত জনসুহৃদ, আধুনিক বোকখাতৰ অন্যতম নিৰ্মাতা, বোকখাত পুৱতি সাহিত্য সভাৰ প্ৰতিষ্ঠাপক সভাপতি তথা বিশিষ্ট সাহিত্যিক প্ৰয়াত চিদানন্দ শইকীয়াৰ ১০৩ সংখ্যক জন্ম জয়ন্তী আৰু জনসুহৃদ চিদানন্দ শইকীয়া সাহিত্য বঁটা প্ৰদান অনুষ্ঠান অনুষ্ঠিত হৈ যায়। অনুষ্ঠান আৰম্ভনিতে চিদানন্দ শইকীয়াৰ প্ৰতিচ্ছবিত বন্তি প্ৰজ্বলন কৰে বোকখাত সন্ধানী লেখিকা সমাৰোহ সমিতিৰ সভানেত্ৰী পুতলী খাউণ্ডে, চিদানন্দ শইকীয়াৰ প্ৰতিচ্ছবিত মাল্যাৰ্পন কৰে চিদানন্দ শইকীয়া ন্যাস পৰিচালনা সমিতিৰ সভাপতি তথা বোকাখাত জে ডি এচ জি মহাবিদ্যালয়ৰ অৱসৰপ্ৰাপ্ত অধ্যাপক গোপিকানন্দ শইকীয়াই। ইয়াৰ পাছতে স্মৃতি তৰ্পণ কৰে ক্ৰমে বোকাখাত সন্ধানী লেখিকা সমাৰোহ সমিতিৰ সম্পাদিকা চন্দ্ৰপ্ৰভা শইকীয়া ডেকা, বোকাখাত পুৱতি সাহিত্য সভাৰ উপ সভাপতি মিনতি দলে, বোকাখাত মহকুমা সাংবাদিক সংস্থাৰ সভাপতি বুবুল দত্ত, ইমজা বোকখাতৰ সভাপতি সঞ্জীৱ হাজৰিকাৰ লগতে উপস্থিত সকলে।
মূল সভাৰ আৰম্ভণিতে বৰগীত পৰিৱেশন কৰে অৱসৰপ্ৰাপ্ত শিক্ষয়িত্ৰী বোধেশ্বৰী বৰাই। বোকাখাত পুৱতি সাহিত্য সভাৰ সম্পাদক গীতাঞ্জলি কলিতাই আঁত ধৰা সভাৰ সভাপতিত্ব কৰে বোকাখাত পুৱতি সাহিত্য সভাৰ সভাপতি অপূৰ্ব বৰদলৈয়ে। সভাত আপকুৰ প্ৰতিষ্ঠাপক সভাপতি তথা চিদানন্দ শইকীয়াৰ কনিষ্ঠ ভাতৃ প্ৰয়াত ভৱেশ শইকীয়াৰ আত্মাৰ চিৰশান্তি কামনা কৰি মৌন প্ৰাৰ্থনা কৰে আৰু সদ্যপ্ৰয়াত বোকাখাতৰ পুৰণি খতিয়াখলি নিবাসী বিশিষ্টা মহিলা পুতলী হাজৰিকাৰ লগতে চিকিমৰ বানত মৃত্যু বৰণ কৰা লোকসকল আৰু জ্ঞাত অজ্ঞাত বিভিন্ন গৰাকী প্ৰয়াত ব্যক্তিৰ আত্মাৰ চিৰশান্তি কামনা কৰি শোকপ্ৰস্তাৱ লোৱা হয়। অনুষ্ঠানত সাম্প্ৰতিক সময়ৰ বিশিষ্ট অসমীয়া কবি, আঁশীৰ দশকত অসমৰ এমেচাৰ নাট জগতক নতুন দিশ প্ৰদান কৰা বোকাখতীয়া শিপাৰ বিশিষ্ট নাট্যকাৰ-পৰিচালক তথা সাহিত্যক পেঞ্চনাৰ ৰফিকুল হোছেইনলৈ ২০২৩ বৰ্ষৰ জনসুহৃদ চিদানন্দ শইকীয়া সাহিত্য বঁটা প্ৰদান কৰা হয়। এখনি ফুলাম গামোচা, চেলেং, সম্বৰ্ধনা পত্ৰ, নগদ ধন আৰু এখনি সঁফুৰাৰে বঁটা প্ৰদান কৰা হয়। বঁটা প্ৰদান অনুষ্ঠানৰ আঁত ধৰে সদৌ অসম লেখিকা সমাৰোহ সমিতিৰ সভানেত্ৰী সূৱৰ্ণ শইকীয়া বৰদলৈয়ে। বঁটা প্ৰাপক ৰফিকুল হোছেইনে শুভেচ্ছামূলক বক্তব্য প্ৰদান কৰে। সভাত বিশিষ্ট অতিথি হিচাপে অংশগ্ৰহণ কৰি বক্তব্য প্ৰদান কৰে ক্ৰমে বোকাখাতৰ প্ৰাক্তন বিধায়ক অৰুণ ফুকন, অৱসৰপ্ৰাপ্ত অতিৰিক্ত উপায়ুক্ত তথা বিশিষ্ট কবি উৎপল দলে, বোকাখাত প্ৰেছ ক্লাবৰ সভাপতি ভৱানন্দ কলিতা, পুতলী খাউণ্ড, চন্দ্ৰপ্ৰভা শইকীয়া ডেকা, বুবুল দত্ত, বোকাখাত পুৱতি সাহিত্য সভাৰ প্ৰাক্তন সভাপতিদ্বয় ক্ৰমে মনোৰঞ্জন সেন আৰু কল্পনা চেতিয়াই। অৱসৰপ্ৰাপ্ত শিক্ষক জীৱন শইকীয়া আদিয়েও বক্তব্য ৰাখে।
অনুষ্ঠানত বিশিষ্ট বেহেলা বাদক ৰাণী বৰদলৈয়ে বেহেলা বাদন কৰি উপস্থিত সকলক আহ্লাদিত কৰে। উল্লেখ্য যে বিগত সময়ত এই বঁটা বিশিষ্ট সাহিত্যিক শোভন চন্দ্ৰ শইকীয়া, বিশিষ্ট কবি-লেখক, অৱসৰপ্ৰাপ্ত শিক্ষক তথা গোলাঘাট জিলা সাহিত্য সভাৰ প্ৰাক্তন সম্পাদক দিলীপ শৰ্মা, বিশিষ্ট লেখিকা তথা বোকাখাত জে ডি এচ জি মহাবিদ্যালয়ৰ অৱসৰপ্ৰাপ্ত অধ্যাপিকা ড° বিভা বৰাক প্ৰদান কৰা হৈছে। বোকাখাত সন্ধানী লেখিকা সমাৰোহ সমিতিৰ হৈ মৃদুষ্মিতা শৰ্মা, বোকাখাত মহকুমা সাংবাদিক সংস্থাৰ হৈ সভাপতি বুবুল দত্ত, বোকাখাত মহকুমা কবি সন্মিলনৰ হৈ সম্পাদক অজন্তা তালুকদাৰ, ব্যক্তিগতভাৱে বিশিষ্ট কবি-লেখিকাদ্বয় মিনতি দলে আৰু হিম কৰ্মকাৰৰ লগতে বিভিন্ন দল-সংগঠন, ব্যক্তিয়ে বঁটা প্ৰাপক ৰফিকুল হোছেইনক সম্বৰ্ধনা জ্ঞাপন কৰে। ন্যাসৰ হৈ ধন্যবাদ সূচক বক্তব্য প্ৰদান কৰে ন্যাসৰ সভাপতি গোপিকানন্দ শইকীয়াই। অনুষ্ঠানত বোকাখাত পুৱতি সাহিত্য সভাৰ বিষয় ববীয়া, সদস্য, প্ৰয়াত চিদানন্দ শইকীয়াৰ পৰিয়ালবৰ্গ, ন্যাসৰ সদস্য, বোকাখাতৰ বিভিন্ন দল-সংগঠনৰ আমন্ত্ৰিত প্ৰতিনিধি সকল, আমন্ত্ৰিত বিশিষ্ট ব্যক্তি সকলৰ লগতে ছঁপা আৰু বৈদ্যুতিন মাধ্যমৰ বোকখাতৰ একাংশ সাংবাদিক উপস্থিত থাকে। শলাগৰ শৰাই আগবঢ়ায় সম্পাদক গীতাঞ্জলি কলিতাই।