হাওঁফাওঁৰ স্বাস্থ্য বৃদ্ধিঃ আমাৰ উশাহ-নিশাহ থকালৈকে জীৱনটো চলি থাকে। আমাৰ হাওঁফাওঁৱে শ্বাস-প্ৰশ্বাস প্ৰক্ৰিয়াত যথেষ্ট অৰিহণা যোগায়, যাৰ বাবে আমি হাওঁফাওঁৰ স্বাস্থ্য ভাল দৰে বজাই ৰাখিব লাগে। হাওঁফাওঁ কিদৰে ভালে ৰাখিব পাৰে জানো আহক…
নিয়মিত শাৰীৰিক কাৰ্যকলাপ কেৱল হৃদযন্ত্ৰৰ স্বাস্থ্যৰ বাবেই উপকাৰী নহয়, হাওঁফাওঁৰ কাৰ্য্যক্ষমতা বৃদ্ধিতো ই গুৰুত্বপূৰ্ণ ভূমিকা পালন কৰে। খোজ কঢ়া, সাঁতোৰ আৰু চাইকেল চলোৱাৰ দৰে ব্যায়ামে হাওঁফাওঁ ভালে ৰাখিব পাৰে।
ঘৰৰ ভিতৰৰ বায়ুৰ গুণাগুণে হাওঁফাওঁৰ স্বাস্থ্যৰ ওপৰত ভাল বা বেয়া প্ৰভাৱ পেলাব পাৰে। ঘৰৰ ভিতৰৰ সাধাৰণ বায়ু প্ৰদূষক যেনে ধঁপাতৰ ধোঁৱা, ছাই, ধূলিৰ কণা আৰু অস্বাভাৱিক জৈৱিক যৌগসমূহে শ্বাস-প্ৰশ্বাসতন্ত্ৰক বিৰক্ত কৰিব পাৰে আৰু হাঁপানীৰ দৰে অৱস্থাক আৰু অধিক ভয়াৱহ কৰি তুলিব পাৰে। এয়াৰ পিউৰিফায়াৰ ব্যৱহাৰ কৰা আৰু ঘৰৰ ভিতৰত ধূমপান পৰিহাৰ কৰিব লাগে।
এন্টিঅক্সিডেন্ট, ভিটামিন আৰু খনিজ পদাৰ্থৰে সমৃদ্ধ সুষম খাদ্য হাওঁফাওঁৰ স্বাস্থ্যৰ বাবে অতি প্ৰয়োজনীয়। ফলমূল, শাক-পাচলি, গোটা শস্যই হাওঁফাওঁত প্ৰদাহ আৰু অক্সিডেটিভ চাপ হ্ৰাস কৰাত সহায় কৰা প্ৰয়োজনীয় পুষ্টিকৰ উপাদান প্ৰদান কৰে।
অতিৰিক্ত ওজন বা কম ওজনৰ বাবে হাওঁফাওঁৰ স্বাস্থ্যৰ ওপৰত নেতিবাচক প্ৰভাৱ পৰিব পাৰে। অতিৰিক্ত ওজনে হাওঁফাওঁক সংকোচন কৰি উশাহ-নিশাহ লোৱাটো অধিক প্ৰত্যাহ্বানজনক কৰি তুলিব পাৰে।
হাওঁফাওঁ ভালে ৰাখিবলৈ উশাহ-নিশাহৰ ব্যায়াম কৰা, ধূমপান ত্যাগ কৰা, টিকা লোৱা, নিয়মীয়াকৈ পৰীক্ষা কৰা, প্ৰদূষণৰ পৰা আঁতৰি থকা আৰু প্ৰয়োজন হ’লে এজন ভাল পালমোন’লজিষ্টৰ পৰামৰ্শ ল’ব পাৰে।