সোমবাৰৰ পৰা আৰম্ভ হৈছে সংসদৰ শীতকালীন অধিবেশন। অধিবেশনৰ প্ৰথম দিনটোতে লোকসভা দুপৰীয়া ১২ বজালৈ স্থগিত ৰখা হয়৷ সংসদত তিনি ৰাজ্যত বিজপিৰ জয়কলৈ একাংশ বিজেপি সাংসদ অধিক আনন্দিত হৈ পৰা দেথা যায়। একাংশ বিজেপি সাংসদে পুনৰ মোদীৰ চৰকাৰেই হ’ব বুলি সংসদত ধ্বনি দিয়ে। ইয়াকেলৈ শাসক আৰু বিৰোধী সাংসদসকলৰ মাজত কিছু উত্তপ্ত পৰিস্থিতিৰ সৃষ্টি হয়। প্রধানমন্ত্ৰী নৰেন্দ্ৰ মোদীয়ে কয় যে সংসদ হৈছে গণতন্ত্ৰৰ মন্দিৰ আৰু জনগণৰ আশা আকাংক্ষা আৰু উন্নত ভাৰতৰ ভেটি সুদৃঢ় কৰাৰ বাবে এখন অতি গুৰুত্বপূর্ণ মঞ্চ। শীতকালীন অধিবেশন আৰম্ভ হোৱাৰ পূৰ্বে সংসদৰ বাহিৰত সংবাদ মাধ্যমৰ সৈতে হোৱা কথা-বতৰাত প্ৰধানমন্ত্ৰী মোদীয়ে সকলো সাংসদক সদনত দাখিল কৰা যিকোনো বিধেয়কৰ বাবে গভীৰ আলোচনা কৰিবলৈ সম্পূৰ্ণ প্রস্তুতি চলাই আহিবলৈ আহ্বান জনায়। তেওঁ কয়, যেতিয়া এই নতুন সংসদ ভৱনটো উদ্বোধন কৰা হৈছিল, তেতিয়া এখন সৰু অধিবেশন পতা হৈছিল আৰু এটা ঐতিহাসিক সিদ্ধান্ত লোৱা হৈছিল। প্রধানমন্ত্ৰীয়ে কয়, এইবাৰ কিন্তু এই সদনত কাম কৰাৰ এক বৃহৎ আৰু ব্যাপক সুযোগ আহিব।
তেওঁ কয় যে, মহিলা, যুৱক-যুৱতী, কৃষক আৰু দৰিদ্ৰসকলৰ সবলীকৰণেই হৈছে দেশৰ উজ্জ্বল ভৱিষ্যতৰ মূল চাবি-কাঠি।সদনত বিৰোধীৰ সহযোগিতাৰ বাবে প্রধানমন্ত্ৰীয়ে আহ্বান জনায়। তেওঁ কয় যে বিৰোধীৰ ভাৱমূৰ্তি নেতিবাচক আৰু ঘৃণাৰে পৰিপূৰ্ণ হ’লে গণতন্ত্ৰৰ বাবে উপযুক্ত নহয়। প্রধানমন্ত্ৰীগৰাকীয়ে কয়, গণতন্ত্ৰৰ বাবে বিৰোধী পক্ষও সমানেই গুৰুত্বপূৰ্ণ আৰু ই সমানে সক্ষম হোৱাটো উচিত। ইপিনে মহুৱা মৈত্ৰৰ বিৰুদ্ধে এথিক্স কমিটিয়ে আজি লোকসভাত কোনো প্ৰতিবেদন উত্থাপন নকৰিলে। মহুৱাৰ বিৰুদ্ধে ধনৰ বিনিময়ত সংসদত প্ৰশ্ন সোধাৰ অভিযোগ আছে। লোকসভাৰ শীতকালীন অধিৱেশনৰ প্ৰথম দিনটোত তৃণমূলৰ সাংসদ মহুৱা মৈত্ৰৰ বিৰুদ্ধে এথিক্স সমিতিয়ে প্ৰতিবেদন উপস্থাপনক লৈ পৰিবেশ গৰম হোৱাৰ সম্ভাৱনা আছিল। কিন্তু মহুৱাৰ বিষয়ত সোমবাৰে কোনো প্ৰতিবেদন দাখিল কৰা নহ’ল। প্ৰতিবেদনখন লোকসভা অধিৱেশনৰ প্ৰথম দিনাই উত্থাপন কৰা হ’ব বুলি বহুতে ধাৰণা কৰিছিল। ইপিনে ৰাঘৱ চাদ্ধাৰ নিসম্বন আজি ৰাজ্যসভাই প্ৰত্যাহাৰ কৰে। ৰাজ্যসভাই আপ নেতা ৰাঘৱ চাধাৰ নিলম্বন প্ৰত্যাহাৰ কৰে ।আম আদমী পাৰ্টি ৰাঘৱ চাদ্ধাক ৰাজ্যসভাৰ পৰা নিলম্বন কৰা হৈছিল যদিও ৰাজ্যসভাৰ অধ্যক্ষ জগদীপ ধনখৰে সেই নিলম্বন সোমবাৰে প্ৰত্যাহাৰ কৰে । সংসদৰ বৰ্ষাকালীন অধিৱেশনৰ সময়তে চাদ্ধাৰ সদস্যপদ স্থগিত ৰখা হৈছিল। বিজেপিৰ সাংসদ জিভিএল নৰসিংহ ৰাওৰ দ্বাৰা উত্থাপন কৰা প্ৰস্তাৱৰ পিছত চাদ্ধাৰ নিলম্বন প্ৰত্যাহাৰ কৰা হয়।