হোজাইৰ নীলবাগানত কোৱাৰেন্টাইন হৈ থকা লোকসকলৰ এক প্ৰশংসনীয় পদক্ষেপ ।
ডবকা : যি সময়ত ৰাজ্যৰ বিভিন্ন প্ৰান্তত কোৱাৰেন্টাইন কেন্দ্ৰ/হোম কোৱাৰেন্টাইন হৈ থকা লোক সকলৰ একাংশই স্বাস্থ্য কৰ্মী আৰু আৰক্ষীক দুৰ্ব্যৱহাৰ কৰি অহাৰ অভিযোগ উত্থাপিত হৈ আহিছে, তেনে সময়তে হোজাই জিলাৰ নীলবাগান দাৰুল উলুম মেথিগাঁও মাদ্ৰাছা চৌহদত মায়ানগৰী মুম্বাইৰ পৰা আহি কোৱাৰেন্টাইন হৈ থকা ব্যক্তি সকলে অন্য এক মানৱীয় নিদৰ্শন দাঙি ধৰিবলৈ সক্ষম হৈছে৷ লকডাউনৰ ফলত মছজিদ-মাদ্ৰাছাৰ চৌহদত জাৱৰৰ দমে ভৰি পৰাত বহি:ৰাজ্যৰ পৰা আহি কোৱাৰেন্টাইন হৈ থকা লোকসকলে মাদ্ৰাছা চৌহদত চাফাই অভিযান কৰাৰ লগতে বৃক্ষৰোপণো কৰি সকলোৰে মন জয় কৰিবলৈ সক্ষম হয়৷ এই সকলৰ আচৰণত সন্তুষ্টি প্ৰকাশ কৰি এই লোকসকলক স্থানীয় যুৱ সমাজ, চৰকাৰী গাঁওবুঢ়া, ভিডিপি আদিৰ বিষয়ববীয়াসকলে ধন্যবাদ জনোৱাৰ লগতে কোৱাৰেন্টাইন হৈ থকা এই ব্যক্তিসকলে স্থানীয় প্ৰশাসনৰ লগতে অসম চৰকাৰকো ধন্যবাদ জনায়৷