গুৱাহাটী, ২৪ অক্টোবৰ –উপ নিৰ্বাচনত ৰাজ্যৰ দুটাকৈ বিধান সভা সমষ্টিত আম আদমী পাৰ্টিয়ে প্ৰতিদ্বন্দ্বিতা কৰিব। দলৰ ৰাষ্ট্ৰীয় নেতৃত্বই ৭৭ নং বিহালী বিধান সভা সমষ্টিত অনন্ত গগৈ আৰু ৮৮ নং চামগুৰি বিধান সভা সমষ্টিত নুৰুল আমিন চৌধুৰীক প্ৰাৰ্থিত্ব প্ৰদান কৰিছে। (AAP)
কাইলৈ মনোনয়ন দাখিলৰ অন্তিম দিনা আম আদমী পাৰ্টিৰ মনোনীত প্ৰাৰ্থী দুগৰাকীয়ে মনোনয়ন পত্ৰ দাখিল কৰিব। আজি গণেশগুৰিস্থিত দলৰ ৰাজ্যিক কাৰ্যালয়ত অনুষ্ঠিত সংবাদমেলত সমষ্টি দুটাৰ বাবে দলীয় প্ৰাৰ্থীৰ নাম ঘোষণা কৰে আপৰ উত্তৰ পূৰ্বাঞ্চলৰ তত্বাৱধায়ক ৰাজেশ আৰু ৰাজ্যিক সভাপতি মনোজ ধানোৱাৰে।
দলীয় প্ৰাৰ্থীৰ নাম ঘোষণা কৰি ৰাষ্ট্ৰীয় নেতা ৰাজেশ শৰ্মাই কয়, “অসমত দুৰ্নীতিমুক্ত প্ৰশাসন, উন্নয়ন আৰু কামৰ ৰাজনীতিৰ শ্লোগান লৈ আপে নিৰ্বাচনত প্ৰতিদ্বন্দ্বিতা কৰিব। দুয়োটা সমষ্টিতে দলীয় কৰ্মী – সমৰ্থক সকলৰ উপৰি সৰ্বস্তৰৰ ৰাইজৰ পৰা আমি অকুণ্ঠ সমৰ্থন আৰু সহযোগিতা কামনা কৰিছোঁ।” সংবাদমেলত ৰাজ্যিক সভাপতি মনোজ ধানোৱাৰে দলৰ প্ৰতিগৰাকী স্বেচ্ছাসেৱকক বিহালীত অনন্ত গগৈ আৰু চামগুৰিত নুৰুল আমিন চৌধুৰীক জয়যুক্ত কৰিবৰ বাবে সৰ্বতোপ্ৰকাৰে চেষ্টা কৰি যাবলৈ আহ্বান জনায়।
