সুলভ মূল্যৰ দোকানীক মুখ্যমন্ত্ৰীয়ে মুকলি ভাবুকি প্ৰদান কৰাৰ পাছতেই পাছতেই তৎপৰ হৈ পৰিছে অসম আৰক্ষী ৷ তদন্ত আৰু অনুসন্ধানৰ পাছত বোকাখাত আৰক্ষীৰ হাতত গ্ৰেপ্তাৰ হ’ল এজন সুলভ মূল্যৰ ব্যৱসায়ী ৷ বোকাখাতৰ বৰজুৰিৰ সন্দীপ কুমাৰ চৌধুৰী নামৰ সুলভ মূল্যৰ ব্যৱসায়ীজনে দীৰ্ঘদিন ধৰি হিতাধিকাৰীক অনুমোদিত অনুসৰি সুলভ মূল্যৰ চাউল বিতৰণত কমকৈ কৰি ক’লা ব্যৱসায় চলোৱাৰ অভিযোগ আছিল সন্দীপ কুমাৰ চৌধুৰীৰ বিৰুদ্ধে । খাদ্য আৰু অসামৰিক যোগান বিভাগৰ লগতে বোকাখাতৰ মহকুমাধিপতি ডাঃ নেহা যাদৱে চৰজমিন তদন্ত কৰি সুলভ মূল্যৰ চাউল বিতৰণত অনিয়ম পোৱাত ব্যৱস্থা গ্ৰহণৰ বাবে যোগান বিভাগৰ পৰিদৰ্শকক নিৰ্দেশ দিয়ে ৷ খাদ্য আৰু অসামৰিক যোগান বিভাগৰ পৰিদৰ্শকে বোকাখাত আৰক্ষী থানাত এজাহাৰ দাখিল কৰাৰ পাছতেই বোকাখাত আৰক্ষীয়ে ১৮৩/২১ নম্বৰৰ গোচৰ ৰুজু কৰি বৰজুৰিৰ সন্দীপ কুমাৰ চৌধুৰীক গ্ৰেপ্তাৰ কৰিছে ৷ আজি বোকাখাতৰ মহকুমা ন্যায়িক দণ্ডাধীশৰ আদালতত হাজিৰ কৰোৱাৰ পাছত জেল হাজোতলৈ প্ৰেৰণ কৰে অভিযুক্ত চৌধুৰীক ৷ তিনিদিন পূৰ্বে নিদিষ্ট অভিযোগৰ ভিত্তিত বোকাখাতৰ মহকুমাধিপতি ডাঃ নেহা যাদৱে সন্দীপ কুমাৰ চৌধুৰীৰ সুলভ মূল্য দোকানখনৰ অনুজ্ঞা পত্ৰ বাতিল কৰিছিল ৷ তেনে অসাধু সুলভ মূল্যৰ ব্যৱসায়ীৰ বিৰুদ্ধে আৰক্ষীৰ অভিযান অব্যাহত থাকিব ৷ বোকাখাত মহকুমাৰ সমূহ ৰাইজক কোনো সুলভ মূল্য দোকানৰ ওপৰত অভিযোগ থাকিলে (যেনে, সামগ্রী কম পৰিমাণে পোৱা, সামগ্রী সমূহ উচিত দামতকৈ অধিক দামত বিক্ৰী কৰা, কোনো লোকে ৰেচন কাৰ্ড বনোৱাৰ নামত টকা বিচাৰে ) ৯৭০৭৪১৪০৫৫ নম্বৰত অভিযোগ দাখিল কৰিবলৈ আহ্বান জনাইছে মহকুমা প্ৰশাসনে ৷
