নাজিৰা
প্ৰায় ৯ টা বৰ্ষ বিৰতিৰ পিছত ঐতিহ্যমণ্ডিত গড়গাঁও মহাবিদ্যালয়ত চলিত বৰ্ষৰ পৰা পুনৰ আৰম্ভ হ’ব উচ্চতৰ মাধ্যমিকৰ পাঠদান । ইয়াৰ বাবে মহাবিদ্যালয়ৰ কৰ্তৃপক্ষই ইতিমধ্যে পাঠদানৰ প্ৰস্তুতি সম্পূৰ্ণ কৰিছে । মহাবিদ্যালয়ৰ অধ্যক্ষ ড : সব্যসাচী মহন্তই জানিবলৈ দিয়া মতে , ২০১১-১২ বৰ্ষতে মহাবিদ্যালয়খনত উচ্চতৰ মাধ্যমিক শাখাৰ পাঠদান বন্ধ হৈছিল আৰু অধ্যক্ষগৰাকীয়ে দায়িত্ব লৈয়েই উচ্চতৰ মাধ্যমিক শাখাৰ পাঠদান পুনৰ আৰম্ভ কৰাৰ প্ৰস্তুতি চলাই আৰু চলিত বৰ্ষৰ পৰা ক’লা , বিজ্ঞান আৰু বাণিজ্য শাখাত ইতিমধ্যে নামভৰ্তি মুকলি কৰি দিয়া হৈছে । চৰকাৰে বান্ধি দিয়া নীতি – নিয়ম অনুসৰি নামভৰ্তি সম্পূৰ্ণ বিনামূলীয়া হোৱাৰ লগতে ছাত্র-ছাত্ৰী নিৱাসৰ ব্যৱস্থাও থাকিব । অধ্যক্ষগৰাকীয়ে উল্লেখ কৰা মতে , অহা ১৫ জুনৰ পৰা ৩০ জুনলৈ ছাত্র – ছাত্ৰী সকলে অনলাইন যোগে প্ৰ-পত্ৰ পূৰণ কৰিব পাৰিব । অনলাইন প্ৰ-পত্ৰ মহাবিদ্যালয়ৰ ৱেবচাইত www.gargaoncollege.org ত উপলব্ধ হ’ব । প্ৰ-পত্ৰ পূৰণৰ পিছত মহাবিদ্যালয় তৰফে নিৰ্দিষ্ট কৰি দিয়া তাৰিখত মেধা ভিত্তিত নামভৰ্তি হ’ব । শিৱসাগৰ জিলা তথা উজনি অসমৰ এখন আগশাৰীৰ উচ্চ শিক্ষা অনুষ্ঠান হিচাপে পৰিগণিত ঐতিহ্যমণ্ডিত গড়গাঁও মহাবিদ্যালয়ত পুনৰ উচ্চতৰ মাধ্যমিক শাখাৰ পাঠদান আৰম্ভ কৰিবলৈ লোৱা সিদ্ধান্তক শিক্ষানুৰাগী মহলে আদৰণি জনাইছে ।