বৰপেটাত শক্তি প্ৰদৰ্শণৰ যৎপৰোনাস্তি প্ৰচেষ্টা অগপৰ

নিৰ্বাচনৰ দিন কাষ চাপি অহাৰ লগে লগে প্ৰতিটো ৰাজনৈতিক দলে বিশেষ তৎপৰতা দেখুওৱা পৰিলক্ষিত হৈছে । অন্যান্য দলৰ দৰে বৰপেটাতো অগপই নিজৰ শক্তি প্ৰদৰ্শণৰ বাবে যৎপৰোনাস্তি চেষ্টা অব্যাহত ৰাখিছে । ভোটাৰ ৰাইজক আকৃষ্ট কৰি বিপৰীত পক্ষক ভেটিবলৈ অগপই কঁকালত বান্ধিছে টঙালি । কাইলৈ দিনৰ ১১ বজাত বৰপেটা জিলা ক্ৰীড়া সন্থাৰ খেলপথাৰত অসম গণ পৰিষদে ” জাতীয় ঐক্য সমাৰোহ ” নামেৰে এক বিশাল সমাৰোহৰ আয়োজন কৰা হৈছে। অগপৰ কেন্দ্ৰীয় সমিতিৰ উদ্যোগত আৰু বৰপেটা বিধানসভা সমষ্টি সমিতিৰ সহযোগত অনুষ্ঠিত হব লগা এই সমাৰোহত অগপৰ কেন্দ্ৰীয় সভাপতি তথা অসম চৰকাৰৰ কৃষিমন্ত্ৰী অতুল বৰা, কাৰ্যকৰী সভাপতি তথা জল সম্পদ আৰু বিজ্ঞান আৰু তথ্য প্ৰযুক্তি বিভাগৰ মন্ত্ৰী কেশৱ মহন্ত, যোগান মন্ত্ৰী ফণীভূষণ দাসৰ লগতে দলটোৰ কেইবাগৰাকী জ্যোষ্ঠ নেতাই অংশগ্ৰহন কৰিব। উক্ত নেতৃবৃন্দক বৰপেটাৰ ভেল্লাৰ পৰা ৫০০ শ বাইকেৰে আদৰি আনিব বুলি জানিব পৰা গৈছে। উক্ত সমাৰোহৰ পিছতে বৰপেটা জিলাৰ জনিয়া বিধানসভা সমষ্টিৰ অন্তৰ্গত কাদং বজাৰত উপস্থিত হব মন্ত্ৰী কেশৱ মহন্তই । তাত উপস্থিত হৈ মন্ত্ৰী গৰাকীয়ে ৰাজ্য চৰকাৰৰ স্ব‌অগ্ৰাধিকাৰ প্ৰাপ্ত আঁচনিৰ বানপানীত হোৱা ক্ষয়ক্ষতি মেৰামতি শিতানৰ ১৬.৩১ কোটি টকা ব্যয় সাপেক্ষ এখন আঁচনিৰ কামৰ আনুষ্ঠানিকভাৱে শুভাৰম্ভ কৰিব । এই আঁচনিখনৰ জৰিয়তে মৰাচাউলখোৱা নদীৰ ৫.৬০ কিলোমিটাৰ দৈৰ্ঘ্যৰ মথাউৰি মেৰামতিৰ কৰা কামৰ আধাৰশিলা স্থাপন কৰিব তেওঁ । ইয়াৰ সৈতে সংগতি ৰাখি  আবেলি ৩ বজাত উক্ত স্থানতে এখন ৰাজহুৱা সভাও অনুষ্ঠিত হব।