বঙাইগাঁও, ৫ নৱেম্বৰঃ হাতী আজি ক’তো নাই৷ হাতীৰ প্ৰতি মানুহৰ এতিয়া মৰম নাই৷ এতিয়া অগপ(AGP) মানে মাত্র তিনিজন মানুহ৷ ইয়াৰে এজন অতুল বৰা, এজন কেশৱ মহন্ত আৰু এজন হ’ল ফণীভুষণ চৌধুৰী(Nabou)৷
তিনিজন মানুহৰ ব্যক্তিগত ৰাজনৈতিক উচ্চাকাংক্ষাক জীয়াই ৰাখিবৰ কাৰণে এই দলটোকে তিনিজনে মিলি পেলাই ড° হিমন্ত বিশ্ব শর্মাৰ ওচৰত বন্ধকত দি থৈ দিছে৷ এওঁলোক তিনিজনে বন্ধকটো আছে(Assam Sonmilita Morcha)৷
এই অভিযোগ অসম প্ৰদেশ কংগ্ৰেছ কমিটিৰ সভাপতি ভূপেন বৰাৰ(APCC)৷ সমাগত বঙাইগাঁও বিধানসভা সমষ্টিৰ উপ-নির্বাচনৰ প্রাক্ক্ষণত দলীয় প্ৰাৰ্থী ব্ৰজেনজিৎ সিংহৰ হৈ সমষ্টিটোৰ পঞ্চপুৰত মঙলবাৰে আয়োজিত এখন নির্বাচনী প্রচাৰ সভাত অংশগ্ৰহণ কৰি এই মন্তব্য কৰে৷
অতুল বৰা, কেশৱ মহন্ত আৰু ফণীভুষণ চৌধুৰীয়ে ব্যক্তিগত ৰাজনৈতিক উচ্চাকাংক্ষাক জীয়াই ৰাখিবৰ কাৰণে অগপ দলটোকে ড° হিমন্ত বিশ্ব শর্মাৰ ওচৰত বন্ধকত থৈছেঃ ভূপেন বৰা
প্রদেশ কংগ্রেছৰ সভাপতি ভূপেন বৰাই কংগ্রেছ দলে বঙাইগাঁও সমষ্টিত প্রার্থিত্ব প্রদান কৰা ব্ৰজেনজিৎ সিংহই যদি জিকে আমাৰ কি হ’ব বুলি কৈ কয় যে গণতন্ত্রত প্রতিবাদৰ ভাষা আছে৷ প্রতিবাদৰ ভাষা হৈছে উপ নির্বাচনৰ ১৩ তাৰিখৰ ভোটটো৷ মই এনেকৈ নকও যে ব্ৰজেনজিৎ সিংহ জিকাৰ লগে লগে আপোনাৰ সকলো সমস্যা সমাধান হৈ যাব৷
কিন্তু তেখেতক জিকোৱাৰ লগে লগে আপুনি চৰকাৰক এটা প্রতিশোধ, চৰকাৰক এটা বার্তা দিব যে তোমালোকে আমাক যেনেকে ঠগিব পাৰা, তোমালোকে যেনেকে কথাবিলাক লুটি বাগৰ মাৰিব পাৰা, তোমালোকে যেনেকে আমাক মিছা কথা কব পাৰা, সেয়ে আমি এই বঙাইগাঁৱত হৰুৱাই পেলাই দিছো৷
বঙাইগাঁৱত কংগ্ৰেছ দলৰ বিজয় নিশ্চিত, মিত্ৰজোঁটৰ হৈ মন্ত্ৰী-বিধায়কে প্ৰচাৰত নামি পৰিলেও ইয়াত প্ৰভাৱ নপৰেঃ ব্রজেনজিৎ সিংহ
ইপিনে মূল্যবৃদ্ধিৰ প্ৰসংগ টানি আনি প্ৰদেশ কংগ্ৰেছৰ সভাপতি বৰাই কয় যে বিজেপি-অগপ শাসন কালত গেছৰ চিলিণ্ডাৰ, আলু, পিঁয়াজকে ধৰি সকলো সামগ্ৰীৰ মূল্যবৃদ্ধি পালে৷ মূল্যবৃদ্ধিয়ে সাধাৰণ ৰাইজক জুৰুলা কৰি তুলিছে৷ গতিকে ইয়াৰ পিছতো যদি আমি অগপ-বিজেপিক ভোট দিও আৰু পুনৰ চিলিণ্ডাৰ, আলু, পিঁয়াজ, মিঠাতেলৰ দাম বৃদ্ধি পায় তেতিয়া চৰকাৰৰ গাত দোষ নপৰে, দোষটো আমাৰ সকলোৰে গাত পৰিব৷
কাৰণ হাতী যেতিয়া মাতাল হয়, হাতীয়ে যেতিয়া মাউতৰ কথা নুশুনা হয় তেতিয়া মাউতে অংকুশলৈ হাতীৰ মূৰত খোচে৷ এতিয়া হাতীৰ অৰ্থাৎ অগপৰ সমৰ্থনলৈ থাকি বিজেপিও মাতাল হৈছে৷ এতিয়া আপোনালোকে মাউতৰ নিচিনাকৈ অংকুশলৈ হাতীৰ মূৰত খুচিব নোৱাৰে৷
‘নবৌৰ ৰাজনৈতিক অভিজ্ঞতাই নাই’
কিন্তু তেৰ তাৰিখে বেলট বাকচত বুঢ়া আঙুলিৰ টিপাটো জোৰকৈ হাতৰ চিনত দিয়ে তেতিয়াহলে কিন্তু হিমন্ত বিশ্ব শৰ্মাৰো বুকু কঁপি যাব আৰু ফণীভূষণ চৌধুৰীৰো বুকু কঁপি যাব৷ আপোনালোকে বুকু কঁপাই দিব পাৰে৷ গণতন্ত্ৰত ৰাইজ হৈছে ভাগ্যনিয়ন্তা৷ আমাৰ ক্ষমতা আছে আমি বিধায়ক বনাবও পাৰো, বদলাবও পাৰো৷
ৰাইজৰ ক্ষমতা আছে মুখ্যমন্ত্ৰী বনাবও পাৰে ভাঙিবও পাৰে৷ কিন্তু ক্ষমতা আপুনি বেছি সময়ৰ কাৰণে নেপায়৷ তেৰ তাৰিখে সাত বজাত আপোনাৰ ক্ষমতাটে আৰম্ভ হ’ব আৰু চাৰিমান বজালৈকে টিপা মৰাৰ পিছত ক্ষমতা গুচি যাব৷ অৰুণোদয়কে ধৰি বিভিন্ন চৰকাৰী আঁচনিৰ সামালোচনা কৰি সভাপতি বৰাই কয় যে এতিয়া কেৱল পদুম ফুল৷
বিজেপিৰ বাজপেয়ী ভৱনত যিটো পদুম ফুল লগোৱা আছে সেইটোও লাগে লাগে শেতা পৰিবলৈ ধৰিছে৷ আনহাতে সভাত সাংসদ প্ৰদ্যুৎ বৰদলৈয়ে নিজৰ ভাষণত কয় যে অইন অইন ঠাইবিলাক যিমান আগবাঢ়ি গ’ল তাৰ বিপৰীতে কিন্তু বঙাইগাঁৱৰ সিমান উন্নতি হোৱা দেখা পোৱা নাই৷ কংগ্ৰেছৰ শাসনকালতে বিদ্ৰোহীৰ লগত আলাপ আলোচনা কৰি তেওঁলোকক আলোচনাৰ মাজলৈ আনি সমাজত শান্তি স্থাপিত কৰিলো৷ কংগ্ৰেছৰ দিনতে কোচ ৰাজবংশীসকলক অধ্যাদেশৰ জৰিয়তে জনজাতিকৰণ কৰা হৈছিল৷
কিন্তু দুৰ্ভাগ্যৱত সেই সময়ত কিছুমান তথ্য পাতিৰ অভাৱ থকাৰ কাৰণে কৰ্টে সেইটো মানি নললে৷ পিছত কোচ ৰাজবংশীকে ধৰি ছয় জনগোষ্ঠীৰ জনজাতিকৰণৰ স্বীকৃতি দিবৰ কাৰণে আমি প্ৰয়োজনীয় সকলো তথ্য পাতি গোটাই অধ্যয়ণ কৰি ভাৰত চৰকাৰলৈ পঠিয়াইছিলো৷ কিন্তু এই সকলো কাম-কাজ কৰাৰ পিছতে ২০১৪ চনত দিল্লীত বিজেপি চৰকাৰ আহিল৷ তেওঁলোকে সকলো তথ্য পাতি থৈ দিলে৷ সৰ্বানন্দ সোণোৱাল আদি সকলোৱে মিছা প্ৰতিশ্ৰুতি দিলে৷
সেইদৰে ফণীভূষণ চৌধুৰীয়ে সৰ্বানন্দ সোণোৱালৰ মিলি আমাৰ থলুৱা মানুহখিনিক কেৱল ফাঁকিয়ে দিলে৷ সেয়ে যদিহে আপোনালোকে বিজেপিৰ অপ শাসন উৎখাত কৰি যদি ২০২৬ ত কংগ্ৰেছৰ নেতৃত্বত এখন জনদৰদী, এখন গোটেই অসমৰ ভাষা-ভাষী, জনগোষ্ঠীৰ মানুহক সন্মান প্ৰদৰ্শন কৰা, মৰ্যদা দিয়া, সকলোৰে দুখ দুৰ্দশা বুজি পায়, অসমখনক সুদুৰ প্ৰসাৰিভাবে, ব্যৱহাৰিকভাবে আগুৱাই লৈ যাবৰ কাৰণে এখন চৰকাৰ বিচাৰিছে আৰু বিজেপি-অগপৰ ফাঁকিবাজ, প্ৰতাৰণাৰ চৰকাৰক উৎখাত কৰিব বিচাৰিছে তেতিয়াহলে এই ছেমি ফাইনেল খেলখনত আমি জিকিব লাগিব৷
যদি ছেমি ফাইনেলখনত জিকিব নোৱাৰো তেতিয়াহলে আমি ‘২৬ৰ ফাইনেলত জিকিব নোৱাৰিম৷ গতিকে আমাৰ দলৰ প্ৰাৰ্থীগৰাকীক বিজয়ী কৰি আমাক ফাইনেললৈ আগবঢ়াই দিয়ক বুলিও ৰাইজক আহ্বান জনায়৷ ইপিনে সাংবাদিকৰ সৈতে হোৱা বার্তালাপত প্রদেশ কংগ্রেছৰ সভাপতি ভূপেন বৰাই কয় যে যিদিনাখন ‘কা’খনক সমৰ্থন জনাই বিজেপিৰ মন্ত্ৰীসভাত প্ৰৱেশ কৰিছিল সিদিনাখনেই অগপ দলে আঞ্চলিকতাবাদী চৰিত্ৰ হেৰুৱাইছে আৰু অসমৰ জাতীয় স্বাৰ্থক সিদিনাখনেই তেওঁলোকে বিসৰ্জন দিছে৷
মই সমগ্ৰ বঙাইগাঁওবাসীক অনুৰোধ জনাইছো যে আমি যিজন ব্যক্তিক প্ৰাৰ্থিত্ব দিছো তেখেত এজন আঞ্চলিকতাবাদী সত্তাৰ সৈতে ওতঃপ্ৰোতভাবে জড়িত৷ আছুৰ ৰাজ্যিক সহ সম্পাদক আছিল৷ অবিভক্ত গোৱালপাৰা জিলা আছুৰ সাধাৰণ সম্পাদক আছিল৷ লগতে দীঘলীয়া সময় ধৰি অসমৰ এজন প্ৰশাসনীয় বিষয়া হিচাপে, আৰক্ষী বিষয়া হিচাপে ৰাজ্যখনত তেখেতৰ অৱদান সকলোৱে জানে৷
এজন অভিজ্ঞ, উচ্চ শিক্ষিত আৰু এই বঙাইগাঁৱৰ বোকা পানী গচকি ইয়াৰ বতাহ পানী খাই ডাঙৰ হোৱা আৰু বিধানসভাৰ মজিয়াত বঙাইগাঁৱক আহি থকা সময়ত শক্তিশালীভাবে প্ৰতিনিধিত্ব কৰাৰ স্বাৰ্থত ব্ৰজেনজিৎ সিংহৰ সপক্ষে যি হাৰত ৰাইজ ওলাই আহিছে এয়া ২০২৬ৰ কাৰণে এটা নতুন চিন্তা আৰু বাৰ্তা যে তেৰ নবেম্বৰত দিব সেইটো মই নিশ্চিত৷
ইপিনে অগপত্যাগ কৰি নিৰ্দলীয় প্ৰাৰ্থী হিচাপে প্ৰতিদ্বন্দ্বিতাত নমা শৈলেন্দ্ৰ সৰকাৰৰ কাৰণে কংগ্ৰেছ ক্ষতিগ্ৰস্ত হ’ব নেকি বুলি সাংবাদিকে সোধাত সভাপতি বৰাই কয় যে আজিৰ তাৰিখত ইয়াত দুটা কথা ওলাই আছে৷ কাৰণ অগপ-বিজেপিয়ে যিগৰাকী প্ৰাৰ্থিক প্ৰক্ষেপ কৰিছে সেইগৰাকী প্ৰাৰ্থী আৰু কংগ্ৰেছ দলে যিগৰাকী প্ৰাৰ্থীৰ প্ৰক্ষেপ কৰিছে কোনগৰাকী প্ৰাৰ্থীৰ লগত বঙাইগাঁৱৰ আত্মসন্মান আৰু বঙাইগাঁৱৰ স্বাভিমানে বিধানসভাৰ মজিয়াত গুৰুত্ব প্ৰকাশ পাব সেইটো হৈছে মূল ইচ্ছ্যু৷
তাৰোপৰি সকলোবে জানে যে ‘২৬ত দিছপুৰত বিজেপি নাথাকে৷ কংগ্ৰেছ ক্ষমতালৈ আহিব৷ ব্ৰজেনজিৎ সিংহ জিকি যোৱা মানে ২৬ লৈকে এগৰাকী জ্যেষ্ঠ বিধায়ক হ’ব৷ এই অঞ্চলৰ ৰাইজে কৈছে যে বহু কাম বাকী আছে৷ বাকী থকা কামখিনিক ৪০ বছৰে যিজন মানুহে কৰিব নোৱাৰিলে সেইজন মানুহৰ মানুহগৰাকীয়ে কৰিব পাৰিব নেকি? ৪০ বছৰে বঙাইগাঁৱত যিবিলাক কাম এজন মানুহৰ নেতৃত্বত সমাধান নহ’ল তেওঁৰ অৰ্ধাংগিণী যাক আমি গৃহিণী বুলি কওঁ৷
মই নবৌৰ কথাত বিৰোধীতা কৰিবলগীয়া নাই৷ কিন্তু মোৰ দাদাৰ নবৌয়ে সেই কাম কেনেকৈ কৰিব পাৰিব? কাৰণ নবৌৰ ৰাজনৈতিক অভিজ্ঞতাই নাই৷ নবৌক গোটেই ৪০ বছৰ ঘৰতে সুমুৱাই থলে৷ দাদাৰ অভিজ্ঞতা আছিল, কিন্তু নোৱাৰিলে৷ নবৌয়ে অভিজ্ঞতা লবলৈ ৰাজনীতিৰ পথাৰলৈ অহাই নাই৷ গতিকে সিংহৰ কথাটো ৰাইজে উপলব্ধি কৰিছে৷ সন্ধিয়া হিমন্ত বিশ্ব শৰ্মাইও টিভিত ফটো দেখিলে গম পাব যে কংগ্ৰেছৰ সপক্ষে কোন ওলাই আহিছে৷
আনহাতে পৰিয়ালকেন্দ্ৰিক ৰাজনীতি সন্দৰ্ভত কয় যে মই পৰিয়ালতন্ত্ৰৰ কথা কোৱা নাই৷ মই নবৌৰ কথা কৈছোঁ৷ নবৌ ৰাজনৈতিকভাবে, সামাজিকভাবে বঙাইগাঁৱৰ মানুহৰ লগত, বঙাইগাঁৱৰ স্বাৰ্থৰ লগত প্ৰত্যক্ষভাবে কেতিয়াও জড়িত হোৱা নাই বুলি ইয়াৰ ৰাইজে কৈছে৷ যিহেতু নবৌ জড়িত নাছিল, গতিকে যি সুদক্ষতা আৰু পাৰদৰ্শিতা লাগে সেইখিনি কংগ্ৰেছ প্ৰাৰ্থী ব্ৰজেনজিৎ সিংহৰ আছে৷ তেওঁ এছ পি হিচাপে এখন জিলা চলাইছিলে, আইজিপি হিচাপে এটা জ’ন চলাইছিলে৷
যিজন মানুহে আইন শৃংখলাৰ ক্ষেত্ৰত পাঁচখন ছয়খন জিলাৰ নেতৃত্ব ল’ব পাৰে, যিজন মানুহে অসমৰ এখন ডাঙৰ ডাঙৰ জিলাৰ দায়িত্ব ল’ব পাৰে তেওঁ অভিজ্ঞ৷ কাৰণ ৰাজনীতিত অভিজ্ঞতা লাগিব৷ এইটো প্ৰশিক্ষণৰ কেন্দ্ৰ নহয়৷ বিধানসভা প্ৰশিক্ষণ কেন্দ্ৰ নহয়৷ এইবাৰ মই গৈ প্ৰশিক্ষণ ল’ম অহাবাৰৰ পৰা মই কাম কৰিম৷ আমি এজন প্ৰশিক্ষিত আৰু অভিজ্ঞ ব্যক্তিক প্ৰাৰ্থিত্ব দিছো আৰু বঙাইগাঁৱৰ শিক্ষিত – সংস্কৃতিবান ৰাইজে এটা সুন্দৰ সিদ্ধান্ত যে ল’ব মই নিশ্চিত৷
সেইদৰে সভাত চামুচেৰে দি বেলচা মাৰি নিছে বুলি বিজেপিৰ বিৰুদ্ধে কৰা কটাক্ষ সন্দৰ্ভত সভাপতি বৰাই কয় যে- মই ৰাইজক কৈছো যে পিঁয়াজৰ দাম যেতিয়া এটকা বাঢ়িছিলে, আলুগুটিৰ দাম এটকা বাঢ়িছিলে, গেছৰ চিলিণ্ডাৰৰ দাম বিশ টকা বাঢ়িছিলে তেতিয়া চিলিণ্ডাৰ মূৰতলৈ যিসকলে আন্দোলন কৰিছিলে, পিঁয়াজ, আলুগুটিৰ মালা পিন্ধি যিসকলে আন্দোলন কৰিছিলে সেইসকল এতিয়া মূল্যবৃদ্ধিৰ সময়ত নিমাত৷ তেওঁলোকক সুধিলে এতিয়া কয় যে ১,২৫০ টকা অৰুণোদয় দিছো৷
সভাত মই অৰুণোদয় কোনে কোনে পাইছে হাত দাঙিবলৈ কৈছিলো৷ কিন্তু কোনেও হাত দঙা নাই৷ অৰুণোদয়ে পোৱা নাই৷ কিন্তু চিলিণ্ডাৰ বাৰশ টকা হৈ গ’ল, কৰবাত এঘাৰশ টকা হ’ল দৰৱৰ দাম তিনি গুণ হ’ল, লাইটৰ বিল তিনি গুণ বাঢ়িল৷ স্মাৰ্ট মিটাৰৰ নামত লুণ্ঠন৷ সেই কাৰণে মই কৈছো গান ওলাইছে৷ বিজেপি চৰকাৰৰ দিনত এই বুলি গান ওলাইছে যে- কিনো তোমাৰ লীলা মামা, কিনো তোমাৰ লীলা, চামুচেৰে দিছা তুমি বেলচা মাৰি নিছা৷ ৰাইজৰ মনৰ কথা গানত ওলাইছে৷
সেইটো মই ৰাইজক কৈছো আৰু ৰাইজে কৈছে সঁচা গান ৷ ইপিনে বঙাইগাঁও সমষ্টিত কংগ্রেছ দলে প্রক্ষেপিত ব্রজেনজিৎ সিংহই নিৰ্বাচনী প্ৰচাৰ ভাল দৰে চলি থকা বুলি সাংবাদিক সকলৰ সৈতে হোৱা বার্তালাপত উল্লেখ কৰে। তেওঁ কয় যে ৰাইজৰ মাজত কংগ্ৰেছক লৈ ব্যাপক উৎসাহ আৰু উদ্দীপনা দেখা গৈছে৷ অগপ নেতা ফণীভূষণ চৌধুৰীৰ বিৰুদ্ধে ৰাইজ স্বতঃস্ফূৰ্তভাৱে ওলাই আহিছে৷ গতিকে ৰাইজৰ সঁহাৰিৰ প্ৰতি লক্ষ্য ৰাখি বঙাইগাঁৱত কংগ্ৰেছ দল নিশ্চিত হৈ পৰিছে।
আনহাতে মিত্ৰজোঁটৰ হৈ মন্ত্ৰী-বিধায়কে প্ৰচাৰত নামি পৰিলেও ইয়াত প্ৰভাৱ নপৰে বুলি উল্লেখ কৰি তেওঁ কয় যে নিৰ্বাচনী প্ৰচাৰৰ বাবে জাকে জাকে মন্ত্ৰী-বিধায়ক আহিলেও লাভ নাই। ৰাইজে কাম কাজ, নীতি-আদৰ্শ, প্ৰাৰ্থিত্ব সম্পৰ্কে চালি জাৰি চাইহে ভোট দিব৷ গতিকে মন্ত্ৰী আহিলেও বিশেষ ইয়াত প্ৰভাৱ নপৰে। লক্ষ্যণীয় যে মঙলবাৰে অনুষ্ঠিত নিৰ্বাচনী সভাত অগপ আৰু বিজেপিৰ পৰা কেইবাগৰাকীও কৰ্মী তথা সমৰ্থক কংগ্ৰেছ দলত যোগ দিয়ে বুলি তেওঁ জানিব দিয়ে।
উল্লেখ্য যে বঙাইগাঁও সমষ্টিৰ পঞ্চপুৰ, আটুগাঁও, টেঙাইগাঁও, ডেকেলিমাৰী, বঙাইগাঁও চহৰৰ বহুকেইটা ৱার্ডকে ধৰি বিভিন্ন প্রান্তত কংগ্রেছ দলৰ নির্বাচনী প্রচাৰ সভাত প্রদেশ কংগ্রেছৰ সভাপতি ভূপেন বৰাৰ সৈতে সংগ দিয়ে সাংসদ প্রদ্যুৎ বৰদলৈ, বিধায়ক আব্দুল বাতিন খন্দকাৰ, বিধায়ক প্ৰদীপ সৰকাৰ, বঙাইগাঁও জিলা কংগ্রেছৰ সভাপতি আবুল কাশেম, উপ-সভাপতি গিৰিশ বৰুৱা, অসম প্ৰদেশ কংগ্ৰেছ কমিটিৰ সম্পাদক তথা মুখপাত্ৰ জ্যোর্তিময় বৈশ্য আদিয়ে৷