দৈনন্দিন বাৰ্তা ডেস্ক : কেৰালাৰ কোজিকোড বিমানবন্দৰত এয়াৰ ইণ্ডিয়া এক্সপ্ৰেছ বিমান বিধ্বস্ত হোৱাৰ পাছ দিনা অৰ্থাৎ আন এক দুৰ্ঘটনাৰ পৰা ৰক্ষা পৰিল এয়াৰ এছিয়া ইণ্ডিয়াৰ বিমান ৷ এইখন বিমানত চৰায়ে আঘাত কৰাত শনিবাৰে পুৱাই যাত্ৰা বাতিল কৰে ৷ এয়াৰ লাইনটোৰ মুখপাত্ৰই কয়, মুম্বাই অভিমুখী বিমানখনে ৰাঁচীৰ বীৰচা মুন্দা বিমানবন্দৰৰ পৰা যাত্ৰা কৰিবলৈ লৈছিল ৷ এয়াৰ এছিয়া ইণ্ডিয়া বিমান ভিটি-এইচজিজি ৰাঁচীৰ পৰা মুম্বাইলৈ নিৰ্দ্ধাৰিত সময় ১১.৫০ বজাত যাত্ৰা কৰিছিল ৷ তেতিয়াই বিমানখনত চৰায়ে খুন্দা মাৰে বুলি এয়াৰ লাইনটোৰ মুখপাত্ৰই কয় ৷ তেতিয়া পাইলটে জৰুৰীকালীন ব্ৰেক মাৰে ৷ ফলত এক ভয়ানক বিপদৰ পৰা ৰক্ষা পৰে যাত্ৰীসকল ৷ বিমানখনত থকা ১৭৬ জন যাত্ৰী বিপদৰ পৰা ৰক্ষা পৰে ৷
