ঐশ্বৰ্য ৰায় ছবিজগতৰ এখ পৰিচিত নাম, ৫১ বছৰ বয়সতো দেখাত এগৰাকী যুৱতীতকৈ কম নহয় অভিনেত্ৰীগৰাকী। ঐশ্বৰ্য ৰায়ে ১৯৯৪ চনৰ ১৯ নৱেম্বৰৰ দিনটোক ভাৰতীয় ইতিহাসত বিশেষ কৰি তুলিছিল। (Aishwarya Rai)সেই দিনটোতে দক্ষিণ আফ্ৰিকাত অনুষ্ঠিত হোৱা মিছ ৱৰ্ল্ড প্ৰতিযোগিতাত ভাৰতৰ পতাকা উত্তোলন কৰি মুকুট পিন্ধিছিল। এই প্ৰতিযোগিতাত ৮৭খন দেশৰ প্ৰতিযোগীয়ে অংশগ্ৰহণ কৰিছিল যদিও ঐশ্বৰ্যই সকলোকে পিছ পেলাই এই খিতাপ দখল কৰে। মিছ ৱৰ্ল্ড হোৱাৰ পিছত যেতিয়া তেওঁ ভাৰতলৈ উভতি আহিছিল, তেতিয়া তেওঁক যি আদৰণি, সন্মান পাইছিল সেয়া অতি সন্মানীয় আছিল।
শেহতীয়াকৈ ছ’চিয়েল মিডিয়াত ৩০ বছৰ পূৰ্বৰ এটা ভিডিঅ’ ক্ৰমান্বয়ে ভাইৰেল হৈ পৰিছে, যিটো ভিডিঅ’ক এটা পেজে নিজৰ ইনষ্টাগ্ৰামত শ্বেয়াৰ কৰিছে। মিছ ৱৰ্ল্ডৰ মুকুট লাভ কৰি ভাৰতলৈ উভতি অহা ঐশ্বৰ্য ৰায়ৰ উষ্ম আদৰণিৰ থ্ৰ’বেক ভিডিঅ’ এই ভিডিঅ’টো। ভিডিঅ’টোত দেখা গৈছে যে মিছ ৱৰ্ল্ডৰ মুকুট লাভ কৰাৰ পিছতো ঐশ্বৰ্যক কপালত বিন্দি আৰু খোলা চুলিৰে সাধাৰণ নীলা ৰঙৰ পোছাক পিন্ধা দেখা গৈছে। ফুলেৰে সজাই থোৱা ফুলৰ থোপা দিও তেওঁক আদৰণি জনোৱা হয়।
ভিডিঅ’টোত ঐশ্বৰ্যৰ হাঁহিৰ লগতে ঐশ্বৰ্যৰ সৰল ৰূপটো দেখি লাখ লাখ মানুহে তেওঁৰ প্ৰেমত পৰিছিল। এই ভিডিঅ’টো ছচিয়েল মিডিয়াত ক্ৰমান্বয়ে ভাইৰেল হৈ পৰিছে। মানুহে তেওঁৰ সৌন্দৰ্য্যক প্ৰশংসা কৰিছে। বহুতে তেওঁৰ হাঁহিটোক ‘পৃথিৱীৰ আটাইতকৈ মৰমলগা হাঁহি’ বুলি অভিহিত কৰিছে।
১৯৯৪ চনত মিছ ৱৰ্ল্ডৰ খিতাপ লাভ কৰা ঐশ্বৰ্য ৰায় এতিয়াও ভাৰতীয় চিনেমা আৰু ফেশ্বনৰ অন্যতম পৰিচিত ব্যক্তিত্ব। মিছ ৱৰ্ল্ডৰ মুকুট পিন্ধা ঐশ্বৰ্য ৰায়ে ১৯৯৭ চনত মণিৰত্নমৰ তামিল ছবি ‘ইৰুৱৰ’ৰ জৰিয়তে নিজৰ কেৰিয়াৰ আৰম্ভ কৰে। সেই বছৰতে তেখেতে হিন্দী ছবি ‘আউৰ প্যাৰ হো গয়া’ৰ জৰিয়তেও আত্মপ্ৰকাশ কৰে। এই পৰ্যন্ত ৪০ খনতকৈও অধিক ছবিত কাম কৰিছে। ২০০৭ চনত ঐশ্বৰ্যই অভিষেক বচ্চনক সংগী হিচাপে বাছি লৈ ২০১১ চনত আৰাধ্যাক জন্ম দিয়ে।