মধ্যপ্ৰদেশৰ ভূপালত চাৰিদিনীয়াকৈ অনুষ্ঠিত হোৱা এ আই ইউ জ’নেল ইন্টাৰ ইউনিভাৰ্চিটি উডবল (পুৰুষ আৰু মহিলা)-২৪ ত সফলতা লাভ কৰিছে মহাপুৰুষ শ্ৰীমন্ত শংকৰদেৱ বিশ্ববিদ্যালয়ে। প্ৰতিযোগিতাখনত মিক্সড ডাবলচ শাখাত দৃষ্টি চেতিয়া আৰু আছিক আহমেদে সোণৰ পদক লাভ কৰে৷ তদুপৰি ছাকিল আহমেদ আৰু উৰ্বৰ দাসে পুৰুষৰ ডাবলচ শাখাত ব্ৰঞ্জৰ পদক লাভ কৰাৰ লগতে একক শাখাত দিল মহম্মদে ব্ৰঞ্জৰ পদক লাভ কৰি সফলতা কঢ়িয়াই আনিবলৈ সক্ষম হৈছে৷ উল্লেখ্য যে, এই টুৰ্নামেণ্টত দেশৰ ২৫ খনতকৈও অধিক বিশ্ববিদ্যালয়ে অংশগ্ৰহণ কৰিছিল৷
দলটিৰ নেতৃত্ব বহন কৰিছিল উদবল সন্থা, অসমৰ সাধাৰণ সম্পাদক প্ৰাণ প্ৰতিম চলিহা (মুখ্য প্ৰশিক্ষক), ৰিতু ৰঞ্জন গগৈ (মেনেজাৰ), ড° মাধন বৰা (ৱ’মেন মেনেজাৰ) ই৷ উদবল টুৰ্নামেণ্টত অংশ লৈ সফলতা লাভ কৰাৰ বাবে দলটিলৈ শুভেচ্ছা জনাইছে বিশ্ববিদ্যালয়খনৰ উপাচাৰ্য অধ্যাপক মৃদুল হাজৰিকা, পঞ্জীয়ক(ভা:) ড° নয়নমনি শইকীয়া প্ৰমুখ্যে বিষয়া-কৰ্মচাৰী, অধ্যাপক-অধ্যাপিকা আৰু ছাত্ৰ-ছাত্ৰী তথা বিশ্ববিদ্যালয়খনৰ শুভাকাংক্ষী সকলে।