বিৰোধীক অমিত শ্বাহৰ সকিয়নীঃ ইডিৰ মুৰব্বী যিয়েই নহওক, অভিযান চলি থাকিব। উচ্চতম ন্যায়ালয়ে ইডিৰ মুৰব্বীৰ কাৰ্যকাল বৃদ্ধি নাকচ কৰাৰ পিছতে কেন্দ্ৰীয় গৃমন্ত্ৰী অমিত শ্বাহে বিৰোধীক এইবুলি সকিয়নী দিয়ে যে ইডিৰ মুৰব্বী যিয়েই নহওঁক, অভিযান বন্ধ নহ‘ব৷ উল্লেখ্য ইডিৰ সঞ্চালকৰ কাৰ্যকাল বৃদ্ধিৰ বাবে কেন্দ্ৰই গ্ৰহণ কৰা সিদ্ধান্ত খাৰিজ কৰিছিল উচ্চতম ন্যায়ালয়ে৷ ন্যায়ালয়ৰ এনে পদক্ষেপৰ পিছতে শ্বাহে বিৰোধীক এনেদৰে ভাবুকি দিয়ে৷ তেওঁ কয় যে কোনো কাৰণতে ইডিৰ অভিযান বন্ধ কৰা নহ‘ব৷ বিৰোধীয়ে চৰকাৰে বিৰোধী নেতাৰ বিৰুদ্ধে ইডিক ব্যৱহাৰ কৰি আহিছে বুলি কৰি অহা অভিযোগৰ মাজতে উচ্চতম ন্যায়ালয়ৰ শেহতীয়া ৰায়্যো গুৰুত্বপূৰ্ণ বিবেচিত হৈছিল৷ ইয়াৰ মাজতে অমিত শ্বাহে বিষয়টোকলৈ বিৰোধীক সকিয়নী দিয়ে৷ উচ্চতম ন্যায়ালয়ে ইডি সঞ্চালকৰ কাৰ্যকাল বৃদ্ধিৰ ক্ষেত্ৰত কেন্দ্ৰীয় চৰকাৰক সমালোচনা কৰি কয় যে সঞ্চালক সঞ্জয় কুমাৰ মিশ্ৰৰ কাৰ্যকাল বৃদ্ধি কৰা উচিত নহয়। উচ্চতম ন্যায়ালয়ে প্ৰৱৰ্তন সঞ্চালকালয়ৰ (ইডি) সঞ্চালক সঞ্জয় কুমাৰ মিশ্ৰৰ কাৰ্যকাল বৃদ্ধিক অবৈধ বুলিও অভিহিত কৰে। ন্যায়ালয়ে মিশ্ৰৰ কাৰ্যকালৰ সম্প্ৰসাৰণক অবৈধ বুলি অভিহিত কৰাৰ পাছতো কয় যে ইডিৰ সঞ্চালকে ৩১ জুলাই, ২০২৩ লৈকে এই পদত অব্যাহত থাকিব পাৰিব।
ন্যায়াধীশ বি আৰ গাভাই, বিক্ৰম নাথ আৰু সঞ্জয়ৰ বিচাৰপীঠে কয় যে মিশ্ৰাৰ সম্প্ৰসাৰণ উচ্চতম ন্যায়ালয়ৰ খণ্ড বিচাৰপীঠৰ ২০২১ চনৰ সিদ্ধান্তৰ বিৰুদ্ধে আছিল। আদালতে পূৰ্বে ২০২১ চনৰ নৱেম্বৰৰ পিছত তেওঁৰ কাৰ্যকাল বৃদ্ধি নকৰিবলৈ কৈছিল।আদালতে কয় যে সংসদৰ ইডি সঞ্চালকৰ কাৰ্যকাল বৃদ্ধি কৰাৰ ক্ষমতা আছে। আইনসভাই এখন আদালতৰ সিদ্ধান্ত সলনি কৰাৰ কাৰণ থাকিব লাগিব। মিশ্ৰক প্ৰদান কৰা কাৰ্যকালৰ সম্প্ৰসাৰণ আইনৰ দৃষ্টিত ভুল আছিল। মিশ্ৰক ২০১৮ চনৰ নৱেম্বৰত ইডিৰ সঞ্চালকৰ হিচাপে নিযুক্ত কৰা হৈছিল। তেওঁৰ কাৰ্যকাল ২০২০ চনৰ নৱেম্বৰত সমাপ্ত হৈছিল। ২০২০ চনৰ মে’ মাহত তেওঁ অৱসৰৰ বয়স ৬০ বছৰ অতিক্ৰম কৰে। অৱশ্যে, ২০২০ চনৰ ১৩ নৱেম্বৰত কেন্দ্ৰীয় চৰকাৰে এক নিৰ্দেশনা জাৰি কৰি কয় যে ৰাষ্ট্ৰপতিয়ে দুবছৰীয়া কাৰ্যকাল তিনি বছৰলৈ সলনি কৰাৰ বাবে ২০১৮ চনৰ আদেশ সংশোধন কৰিছে। চৰকাৰৰ এনে সিদ্ধান্তক এনজিঅ’ কমন কজৰ দ্বাৰা উচ্চতম ন্যায়ালয়ত প্ৰত্যাহ্বান জনোৱা হৈছিল। শ্বাহে কয় দুৰ্নীতিৰ বিৰুদ্ধে অভিযান চলি থাকিব৷ কাকো আইনৰ বাহিৰত কাম কৰিবলৈ দিয়া নহ‘ব৷ ধনৰ অবৈধ সৰবৰাহ বন্ধ কৰা হ‘ব আৰু এনে কামত জড়িতসকলৰ বিৰুদ্ধে ব্যৱস্থা গ্ৰহণ কৰা হ‘ব৷