নাজিৰা, ২৩ নৱেম্বৰ : নাজিৰা নগৰৰ মাজমজিয়াত তথা ৮নং ৱাৰ্ডত থকা ঐতিহ্যমণ্ডিত বৰপুখুৰীত নাজিৰা জিলা সাঁতোৰ সন্থাৰ উদ্যোগত “সাঁতোৰ প্ৰশিক্ষণ কেন্দ্ৰ” স্থাপন কৰিব বিচৰা কাৰ্য্যৰ তীব্ৰ বিৰোধিতা কৰি স্থানীয় ৰাইজে এই পুখুৰীৰ ঐতিহ্য ৰক্ষাৰ বাবে নাজিৰাৰ মহকুমা প্ৰশাসনৰ লগতে শিৱসাগৰ জিলাৰ উপায়ুক্ত আৰু ৰাজ্যিক মন্ত্ৰী যোগেন মহনক অনুৰোধ জনোৱাৰ পিছত ২২ নবেম্বৰ তাৰিখে অসম চৰকাৰৰ পুৰাতত্ত্ব বিভাগৰ উপ সঞ্চালক নৱজিত দেউৰীৰ নেতৃত্বত পুৰাতত্ত্ব বিভাগৰ লোকে এই পুখুৰীটো পৰিদৰ্শন কৰি বিভাগীয় ভাবে এই ঐতিহাসিক সম্পদ সংৰক্ষিত কৰাৰ প্ৰচেষ্টা চলোৱা হ’ব বুলি স্থানীয় ৰাইজক অৱগত কৰে ৷ পৰিদৰ্শনকাৰী দলটোত শিৱসাগৰ জিলাৰ পুৰাতত্ত্ব বিষয়া কংকনজ্যোতি শইকীয়া, ৰাজহ মন্ত্ৰী যোগেন মহনৰ বিশেষ কৰ্তব্যৰত বিষয়া সহ পুৰাতত্ত্ব বিভাগৰ আন বহুকেইজন লোক উপস্থিত আছিল ৷ উল্লেখ্য যে আহোম ৰজাৰ স্মৃতি বিজড়িত ঐতিহাসিক জয়খামদাঙ খাট পথাৰৰ দুৱাৰমুখত অৱস্থিত এই ঐতিহাসিক পুখুৰীটো বজাৰ পুখুৰী, কুঁৱৰী পুখুৰী বা বৰপুখুৰীৰ নামেৰেও জনাজাত ৷ এই পৌৰাণিক পুখুৰীৰ ঐতিহ্য বিনষ্ট কৰি ইয়াত চুইমিং পুল স্থাপনৰ বিৰোধিতা কৰি সংশ্লিষ্ট অঞ্চলৰ ৰাইজে গঠন কৰা ” বৰপুখুৰী সংৰক্ষণ আৰু সৌন্দৰ্যবৰ্দ্ধন সমিতি”য়ে এই পুখুৰীটোৰ সংৰক্ষণৰ বাবে চলাই অহা নিৰন্তৰ প্ৰচেষ্টাৰ ফলশ্ৰুতিত ৰাজহ মন্ত্ৰীৰ উদ্যোগত ৰাজ্যিক পুৰাতত্ত্ব বিভাগৰ বিষয়াই পুখুৰীটো সংৰক্ষণ কৰাৰ আশ্বাস দিয়াৰ বাবে স্থানীয় ৰাইজে মন্ত্ৰী যোগেন মহনৰ এই ইতিবাচক পদক্ষেপৰ শলাগ লৈছে ৷
