গহপুৰ, ১৪ ডিচেম্বৰঃ ‘৪২ৰ গণ আন্দোলনৰ সক্ৰিয় কৰ্মী, কংগ্ৰেছ সেৱা বাহিনীৰ সেনানী মুক্তিযোদ্ধা বগাৰাম দিহিঙীয়াৰ জন্ম শতবৰ্ষৰ লগত সংগতি ৰাখি সামৰণি অনুষ্ঠানটি কাইলৈ অনুষ্ঠিত হ’ব।(Art and Literature Awards)
অসম নাট্য সন্মিলনৰ অন্তৰ্ভুক্ত বিশ্বনাথ জিলা নাট্য সন্মিলনৰ মধ্যকালীন অধিৱেশনখনৰ লগত সংগতি ৰাখি বিষ্ণু-জ্যোতি নাট্য সন্মিলনৰ সহযোগত গঠিত মুক্তিযোদ্ধা বগাৰাম দিহিঙীয়া স্মৃতি ন্যাসৰ দ্বাৰা পোনপ্ৰথমবাৰৰ বাবে এটি বঁটা আগবঢ়োৱা হয়।
কাইলৈ দিনৰ ১২ বজাত পূব ডুবিয়া হাইস্কুল প্ৰেক্ষাগৃহত অনুষ্ঠিত হ’বলগীয়া মুকলি সভাত শিশু সাহিত্যিক তথা বিশিষ্ট কাৰ্টুনিষ্ট তপন বৰুৱাক ‘মুক্তিযোদ্ধা বগাৰাম দিহিঙীয়া শিল্প-সাহিত্য বঁটা-২০২৪’ প্ৰদান কৰা হ’ব। (Freedom Fighter Bagaram Dihingia Memorial Trust)
ন্যাসৰ সভাপতি দেৱেশ্বৰ বৰুৱা আৰু সম্পাদক বেণুধৰ দিহিঙীয়াই এক প্ৰেছ বিজ্ঞপ্তিৰ জৰিয়তে এই কথা ঘোষণা কৰে। উল্লেখ্য যে স্বাধীনতা আন্দোলনৰ সক্ৰিয় কৰ্মী হিচাপে গণ আন্দোলনত জপিয়াই পৰা মুক্তি যুঁজাৰু বগাৰাম দিহিঙীয়া এগৰাকী শংকৰী সংস্কৃতিৰো সাধক আছিল। ইয়াৰ উপৰি সেই গৰাকী মুক্তিযোদ্ধাই কাব্য চৰ্চাও কৰিছিল।
১৯১৯ চনত জন্মগ্ৰহণ কৰা এইগৰাকী মুক্তিযোদ্ধাৰ উদ্ধাৰ হোৱা এখনি দিনলিপিৰ পৰা কিছু নিৰ্বাচিত কৰি ‘মাটিৰ গান'(song of the soil) নামৰ এখনি কাব্য সংকলনো কাইলৈ উন্মোচিত হ’ব বুলি জানিব পৰা গৈছে। ১৯৮৭চনত পৰলোকপ্ৰাপ্তি ঘটা মুক্তিযোদ্ধা বগাৰাম দিহিঙীয়াৰ জন্ম শতবৰ্ষ যোৱা ২০১৫ চনত আৰম্ভ কৰাৰ পাছত আনুষ্ঠানিকভাৱে কাইলৈ সামৰণি পৰিব।
ইফালে পোন প্ৰথমবাৰৰ বাবে শিল্প-সাহিত্য বঁটা লাভ কৰা তপন বৰুৱাৰ ইতিমধ্যে বহুকেইখন শিশু গ্ৰন্থ প্ৰকাশ পাইছে। উল্লেখ্য, বিশিষ্ট কথাশিল্পী, কথাছবি পৰিচালক তথা বিশিষ্ট শিশু সাহিত্যিক ড০ ভৱেন্দ্ৰনাথ শইকীয়াৰ সম্পাদনাত প্ৰকাশ পোৱা ‘সঁফুৰা’ত শিশু উপযোগী পদ্য চৰ্চাৰে সাহিত্যিক জীৱন আৰম্ভ কৰা গহপুৰৰ তপন বৰুৱাই অসমীয়া শিশু সাহিত্যক জীপাল কৰি আহিছে।
ড০ ভৱেন্দ্ৰনাথ শইকীয়াৰো প্ৰিয়ভাজন হৈ পৰা এইগৰাকী শিশু সাহিত্যিকে গহপুুুৰ মহকুমাৰ ঘাঁহিগাঁও তেলেনী প্ৰাথমিক বিদ্যালয়ত ১৯৮৭ চনত শিক্ষক হিচাপে কৰ্মজীৱন আৰম্ভ কৰে। এইগৰাকী শিক্ষকে ছাত্ৰ জীৱনৰ পৰাই সাহিত্য চৰ্চা কৰি আহিছিল যদিও শিক্ষক হিচাপে যোগদান কৰাৰ পাছতেই শৈক্ষিক ক্ষেত্ৰখনৰ লগতে সাহিত্যৰ ক্ষেত্ৰখনটো সক্ৰিয় হৈ পৰে।
শৈক্ষিক ক্ষেত্ৰখনৰ লগত জড়িত হৈ এইগৰাকী শিল্পী মনৰ গৰাকীয়ে হাতত কলম তুলি লৈ শিশুৰ মনোজগতৰ আলেখলেখ সূক্ষ্ম দৃষ্টিৰে পদ্যৰ মাজেৰে প্ৰকাশ কৰাত মনোনিৱেশ কৰে। বৰ্তমান জকাপৰা প্ৰাথমিক বিদ্যালয়ৰ সহকাৰী শিক্ষক হিচাপে কৰ্মৰত তপন বৰুৱাই ‘সঁফুৰা’, ‘মুকুতা’, ‘মৌচাক’, ‘আমাৰ সাৰথি’, ‘অকণিৰ অগ্ৰদূত’, ‘নতুন ৰংমেলা’, ‘অকণিৰ জেউতি’ আদি অনেক শিশু উপযোগী আলোচনীত শিশুৰ মনোজগতৰ সৈতে খেলিলে আখৰৰ মাজেৰে।
১৯৮৭ চনতে ‘সঁফুৰা’ত শিশু পদ্য চৰ্চাৰে আত্মপ্ৰকাশ কৰা বৰুৱা সেই সময়ত অসমৰ ইমূৰৰ পৰা সিমূৰলৈ অকণিসকলৰ এজন প্ৰিয় হৈ পৰে। মাহৰ প্ৰথম দিনত মাহেকীয়া আলোচনীত তেওঁৰ পদ্য পঢ়িবলৈ আগ্ৰহেৰে বাট চাই থাকে অকণি। ইয়াৰ উপৰি তপন বৰুৱাই হাস্য-ব্যংগ মাহেকীয়া আলোচনী বৰ্তমান অধুনালুপ্ত ‘অবিকল’, ‘চিচিংফাক’ত ধাৰাবাহিকভাৱে লিমাৰিক, কাৰ্টুন অংকন কৰি জনপ্ৰিয়তা অৰ্জন কৰিবলৈ সক্ষম হয়।
তাৰ পাছতে তেওঁ বিশাল প্ৰকাশনৰ দ্বাৰা সাম্প্ৰতিক সময়ত প্ৰকাশ পাই থকা অসমৰ একমাত্ৰ হাস্য-ব্যংগ মাহেকীয়া আলোচনী ‘গিৰজনি’ত ধাৰাবাহিকভাৱে লিমাৰিক আৰু কাৰ্টুন অংকন কৰি ব্যংগ সাহিত্যকো সমৃদ্ধ কৰি আহিছে। ইয়াৰোপৰি এইগৰাকী লেখকে ‘প্ৰান্তিক’ আলোচনীটো নিয়মীয়াকৈ ‘আপদীয়া পদ্য’ চৰ্চা কৰি আহিছে।
গহপুুুৰ মহকুমাৰ কৃতী শিক্ষকৰ বঁটা প্ৰাপক শিক্ষক তথা শিশু সাহিত্যিক তপন বৰুৱাৰ প্ৰথমখনি গ্ৰন্থ প্ৰকাশ পাই ২০০৮ চনত। গোলাঘাটৰ পুথিতীৰ্থ প্ৰকাশনে প্ৰকাশ কৰা ‘অকণিহঁতৰ সৰু সৰু কবিতা’ গ্ৰন্থৰ জৰিয়তে তপন বৰুৱাই অকণিৰ মাজত বিপুল জনপ্ৰিয়তা লাভ কৰে। তাৰ পাছতে এইগৰাকী শিশু সাহিত্যিকৰ ‘কঠালগুটিয়া’ নামৰ শিশু গ্ৰন্থখনি অকণিৰ সাহিত্য সভাই প্ৰকাশ কৰে।
গহপুৰৰ সৃষ্টি প্ৰকাশৰ দ্বাৰা ‘ডেমপেহা’, ‘আপদীয়া’ আৰু ‘পালোৱান’ নামৰ তিনিখন শিশু পদ্য পুথি প্ৰকাশ পায়। যোৰহাটৰ ৰংমেলা প্ৰকাশনৰ দ্বাৰা ‘সৰু সৰু পদ্য’ নামৰ অন্য এখন শিশু গ্ৰন্থ প্ৰকাশ পোৱাৰ লগতে গুৱাহাটীৰ ‘পুথি প্ৰকাশ’ নামৰ প্ৰকাশন গোষ্ঠীয়ে তপন বৰুৱাৰ ‘ডেৰকুৰি ৰসাল পদ্য’ আৰু ‘মইনাৰ পদ্য’, ‘আপদীয়া পদ্য মালা’ প্ৰকাশ কৰি অসমীয়া শিশু সাহিত্যক সমৃদ্ধিশালী কৰিছে।
‘গুটাচেৰেক সাধু’ নামৰ এটি শিশু পাণ্ডুলিপিৰ বাবে গুৱাহাটীৰ ‘হিয়াৰ ৰামধেনু’য়ে ২০১৬ চনত ‘শিশু সাহিত্য বঁটা’ প্ৰদান কৰি শিশু সাহিত্যিকগৰাকীক উৎসাহিত কৰি তুলিছে। ইয়াৰ উপৰি এইগৰাকী শিশু সাহিত্যিক তথা বিশিষ্ট কাৰ্টুন শিল্পীক ২০২১ চনত ‘নতুন ৰংমেলা’ আলোচনীৰ তৰফৰ পৰা সন্মানিত কৰা হৈছে।
এইগৰাকী বিশিষ্ট কাৰ্টুন শিল্পীয়ে বৰ্তমান সামাজিক মাধ্যম ‘ফেচবুক’ত ধাৰাবাহিকভাৱে সময়, সমাজ আৰু দেশৰ পৰিৱেশ-পৰিস্থিতিক প্ৰতিনিধিত্ব কৰি কাৰ্টুন অংকন কৰি অন্য এক খোৰাক যোগাই অহাৰ লগতে নিজৰ প্ৰতিবাদী সত্তাক উজ্জীৱিত কৰি আহিছে।
নেচনেল বুক ট্ৰাষ্টৰ উদ্যোগত আৰু শিশু আলোচনী ‘মৌচাক’ৰ সহযোগত যোৱা ২৩ অক্টোবৰৰ পৰা অনুষ্ঠিত পাঁচ দিনীয়া অনুবাদ কৰ্মশালাত অংশগ্ৰহণ কৰি দেশৰ বিখ্যাত তিনিখন শিশু গ্ৰন্থ অনুবাদ কৰিও অনুবাদ সাহিত্যক সমৃদ্ধিশালী কৰে।