কিতাপৰ স্পৰ্শত উমাল খানপাৰাৰ বাকৰি

লেখক-প্ৰকাশক-বিক্ৰেতাৰ মনত আশাৰ সঞ্চাৰ

চলচ্চিত্ৰ হৈছে কাহিনী কোৱা কলাঃ মনোজ শ্ৰীৱাস্তৱ

আলু-পিঁয়াজৰ ব্যৱসায় আৰু চিনেমাৰ ব্যৱসায়ৰ মাজত পাৰ্থক্য আছেঃ নয়ন প্ৰসাদ

“চলচ্চিত্ৰৰ প্ৰচাৰ আৰু ব্যৱসায়” শীৰ্ষক আলোচনা সত্ৰ

আজি প্ৰদান কৰিব অসম প্ৰকাশন পৰিষদ সাহিত্য বঁটা-২৪

গুৱাহাটী, ৩০ ডিচেম্বৰঃ Assam Book Fair । চতুৰ্থ দিনটোত গ্ৰন্থপ্ৰেমীৰ সমাৱেশে উমাল কৰি তোলে অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থাই যৌভভাৱে খানাপাৰাস্থিত পশুচিকিৎসা মহাবিদ্যালয় খেলপথাৰত আয়োজন কৰা অসম গ্ৰন্থমেলা, গুৱাহাটী ৷ লেখক-সাহিত্যিক আৰু পঢ়ুৱৈৰ উপস্থিতিয়ে এই গ্ৰন্থোৎসৱলৈ আশা বতৰা কঢ়িয়াই আনিছে ৷ আজিলৈ ২কোটি ২০ লাখ টকাৰ কিতাপ বিক্ৰী হোৱা বুলি জনাইছে অসম গ্ৰন্থমেলাৰ উদ্যোক্তাসকলে ৷

ইপিনে প্ৰতিদিনে গ্ৰন্থমেলা প্ৰাংগণত আয়োজন কৰা হৈছে বিভিন্ন গুৰুত্বপূৰ্ণ বিষয়ৰ আলোচনা সত্ৰ ৷ আজি বিয়লি অসম প্ৰকাশন পৰিষদে গন্থমেলাৰ বাকৰিত আয়োজন কৰে “চলচ্চিত্ৰৰ প্ৰচাৰ আৰু ব্যৱসায়” শীৰ্ষক আলোচনা সত্ৰ ৷ ইয়াত বিশিষ্ট অতিথিৰূপে অংশগ্ৰহণ কৰে নতুন দিল্লীৰ বিশিষ্ট চলচ্চিত্ৰ প্ৰযোজক, পৰিচালক, লেখক মনোজ শ্ৰীৱাস্তৱে ৷ তেওঁ বিষয় প্ৰসংগত কয় —“ চলচ্চিত্ৰ হৈছে কাহিনী কোৱা কলা ৷ কাহিনীৰ গাঁথনি শক্তিশালী হ’লে সেই চিনেমাও শক্তিশালী হয় ৷ মূল কথাটো হ’ল চিনেমাও এটা উৎপাদিত পণ্য ৷ গতিকে ইয়াক বিক্ৰী কৰিব পাৰিব লাগিব ৷” তেওঁ লগতে কয় যে বিক্ৰী কৰিবলৈ হ’লে উৎপাদিত পণ্যৰ মানো গুণসম্পন্ন হ’ব লাগিব ৷ গতিকে ভাল চিনেমা নিৰ্মাণ কৰাটো হ’ল প্ৰথম চৰ্ত ৷ ভাল চিনেমাৰ প্ৰচাৰ কৰিবলৈও ভাল আৰু ইয়াৰ বাণিজ্যও ভাল ৷ প্ৰচাৰে বাণিজ্যিক সফলতা কঢ়িয়াই আনে ৷ আলোচক অতিথি, বিশিষ্ট পৰিচালক, চলচ্চিত্ৰ সমালোচক নয়ন প্ৰসাদে কয়—“ মানুহক সদায় নতুন কিবা এটা লাগে ৷ এই নতুন কিবাটো যিয়ে দিব পাৰে সেই চিনেমা বা নাটক সফল হয় ৷ নতুনত্ব বহন কৰা চলচ্চিত্ৰৰ প্ৰচাৰ কৰিবলৈ ভাল ৷ আগতে বিভিন্ন চলচ্চিত্ৰ উৎসৱত মালায়ালম চিনেমাৰ সমানে অসমীয়া চিনেমাৰ নাম উচ্চাৰিত হৈছিল ৷ সেই পৰ্যায়লৈ যোৱাৰ বাবে কষ্ট কৰাৰ প্ৰয়োজন আছে ৷ আলু-পিঁয়াজৰ ব্যৱসায় আৰু চিনেমাৰ ব্যৱসায়ৰ মাজত পাৰ্থক্য আছে ৷ এই কথাটো আমি বুজিব পাৰিব লাগিব ৷” আন এগৰাকী আলোচক , বিশিষ্ট পৰিচালক কেনি বসুমতাৰীয়ে কয় যে চিনেমা এখন নিৰ্মাণ কৰা হয় চলোৱাৰ বাবে ৷ চিনেমা এখন ভালদৰে চলা মানেই ব্যৱসায়িক সফলতা লাভ কৰা ৷ গতিকে ইয়াৰ বাবে কি কাহিনীক কেনেকৈ কেনেধৰণৰ ৰুচিৰ দৰ্শকৰ ওচৰলৈ লৈ যাব লাগিব এই কথাবোৰ চালিজাৰি চাবই লাগিব ৷

আকৰ্ষণীয় আৰু প্ৰভাৱশালী প্ৰচাৰ কৌশলে চিনেমাক বাণিজ্যিক সফলতা দিয়ে ৷ একেদৰে বিশিষ্ট প্ৰযোজক শ্যাম বৰাই ইয়াত আলোচকৰূপে উপস্থিত থাকি কয় যে প্ৰচাৰৰ ক্ষেত্ৰত প্ৰযোজকৰ দায়িত্ব সাধাৰণতে বেছি ৷ চলচ্চিত্ৰৰ প্ৰচাৰো “টীম ৱৰ্ক” ৷ নিৰ্দিষ্ট দৰ্শক সমষ্টিক লক্ষ্য হিচাপে লৈ প্ৰচাৰ কৌশল অৱলম্বন কৰিব পাৰিলে চলচ্চিত্ৰই সফলতা অৰ্জন কৰিব পাৰে ৷ আলোচক, বিশিষ্ট পৰিচালক অচিন্ত শংকৰৰ মতে প্ৰচাৰ ভাল নোহোৱাটো চলচ্চিত্ৰই বাণিজ্যিক সফলতাৰ মুখ নেদেখাটো অন্যতম কাৰণ ৷ অসমীয়া চলচ্চিত্ৰৰ উদ্যোগৰ পৰিসৰো সীমিত ৷ ভাষিক-সামাজিক বৈচিত্ৰ্য আন এক কাৰক ৷ এটাৰ পাছত আন এটা উৎসৱ, আন্দোলনৰ কাৰ্যসূচীয়েও সমস্যাৰ সৃষ্টি কৰে ৷ তদুপৰি দৰ্শকে কি বিচাৰে বা আশা কৰে সেই বিষয়েও আমাৰ পদ্ধতিগত অধ্যয়ন প্ৰযোজকে কৰাৰ পৰম্পৰা গঢ়ি উঠা নাই ৷ ইয়াত আলোচকৰূপে অংশগ্ৰহণ কৰি জনপ্ৰিয় অভিনেতা কমললোচনে বিষয় সন্দৰ্ভত এইদৰে কয়—“বৰ্তমানৰ অসমীয়া চিনেমাৰ প্ৰচাৰক লৈ সন্তুষ্ট বুলি কব নোৱাৰি ৷ বৰঞ্চ এয়া আতি সস্তীয়া পৰ্যায়ত আছে ৷ সেয়ে অসমীয়া চলচ্চিত্ৰই আশাব্যঞ্জক প্ৰসাৰ লাভ কৰিব পৰা নাই ৷ এইক্ষেত্ৰত নতুনকৈ চিন্তা কৰাৰ প্ৰয়োজন আছে ৷ বিশেষকৈ চলচ্চিত্ৰৰ বজাৰ অধ্যয়ন কৰি নিখুঁত প্ৰচাৰ কৰাটো জৰুৰী ৷” তেওঁ লগতে কয় যে অসমীয়া মানুহে টিকট ক্ৰয় কৰি চিনেমা চাবলৈ টান পায় কিন্তু খ্ৰীষ্টমাচৰ দিনা অদৰকাৰী হৈ চৈ কৰিবলৈ ভাল পায় ৷ তদুপৰি আমাৰ কেঁকোৰা চৰিত্ৰ চলচ্চিত্ৰ উদ্যোগতো প্ৰতিফলিত হয় ৷ এইবোৰো আমাৰ হেঙাৰ ৷ আন এগৰাকী আলোচক, চিনেমাৰ প্ৰচাৰৰ সৈতে জৰিত প্ৰিয়ংকা বৰুৱাই কয় যে আমাৰ ইয়াত ৩ কোটি মানুহ আছে ৷ ইয়াৰে ৩৫ শতাংশ মানুহে হয়তো চিনেমা চাই ৷ গতিকে নতুন দৰ্শক গঢ়ি তোলাটো এক প্ৰত্যাহ্বান ৷ আমাৰ স্কুল-কলেজতো এই ধৰণৰ কোনো কাৰ্যসূচী নাই ৷ এই বিষয়বোৰৰ সমাধান সূত্ৰ উলিয়াব পাৰিলে নিশ্চয় সুদিন আহিব ৷ ইয়াৰ ফলত এখন সুন্দৰ কৰ্মক্ষেত্ৰও গঢ়ি উঠাৰ সম্ভাৱনা আছে ৷ আমাৰ ইয়াত ব্যৰ্থতাৰ পাছতো প্ৰযোজক-পৰিচালকসকলে ধৈৰ্যশীলতাৰ পৰিচয় দি চিনেমা নিৰ্মাণ কৰি আছে ৷ এয়া নিশ্চয় ভাল দিশ ৷ আলোচনা সত্ৰখন পৰিচালনা কৰে কবি-চলচ্চিত্ৰ সমালোচক অপৰাজিতা পূজাৰীয়ে ৷ তেওঁ কয় যে বজাৰ ব্যৱস্থা অধ্যন চলচ্চিত্ৰৰ বাবে অতি জৰুৰী ৷ দৰ্শকো গ্ৰাহক ৷ গতিকে দৰ্শকৰ মনৰ চাহিদা বিচাৰ কৰি প্ৰচাৰৰ পৰিকল্পনা কৰাটো অত্যন্ত জৰুৰী ৷ এখন চিনেমাই কেনেদৰে ঠাই উলিয়াই ল’ব বা সেই খালী ঠাই ক’ত আছে এয়া সঠিকভাৱে নিৰ্ণয় কৰি ল’ব পাৰিব লাগিব ৷ দৰ্শকে কি বিচাৰে আৰু চিনেমা এখনে কি দিব এই দুয়োটা বিষয় মাৰ্কেটঙৰ বাবে অতি দৰকাৰী কথা ৷ কাৰণ বিচিত্ৰ বিষয়, বিচিত্ৰ ঘটনা, বিচিত্ৰ কাহিনীয়ে মানুহৰ ইচ্ছাক নতুনৰূপত গঢ়ি তোলে ৷ এইবোৰ অধ্যয়ন কৰা বা মানুহৰ মনোজগত বুজি পোৱাটো বাণিজ্যিক সফলতাৰ বাবে অপৰিহাৰ্য ৷ বিশিষ্ট মনোৰোগ বিশেষজ্ঞ, অভিনেতা ডাঃ জয়ন্ত দাসে এই অনুষ্ঠানত দৰ্শকৰ আসন অলংকৃত কৰে ৷ তেওঁ বিষয় প্ৰসংগত কয় যে নতুন দৰ্শক সৃষ্টি কৰিব লাগিব ৷ কাৰণ ক’ভিদ মহামাৰীয়ে মানুহৰ চিন্তধাৰা, মনোজগতত প্ৰভাৱ পেলাইছ ৷ গতিকে চিনেমা এখনৰ বাবে মানুহৰ মনৰ খোৰাক কি সেয়া জানি লৈ সেইমৰ্মে প্ৰয়োগ কৰাৰ প্ৰয়োজন আছে ৷ অনুষ্ঠানত দৰ্শক হিচাপে অংশগ্ৰহণ কৰি ৰাজনৈতিক বিশ্লেষক, লেখক ৰঞ্জিৱ শৰ্মাই কয় যে আমাৰ চিনেমাসমূহে মানুহৰ মনোসংযোগ কৰাত সক্ষম হৈছেনে নাই এয়া বিচাৰ্যৰ বিষয় ৷ হয়তো কৰবাত স্থবিৰ হৈছে ৷ ইয়াক গতি প্ৰদান কৰিব পৰাকৈ নতুন চিন্তা-চৰ্চা কৰাৰ প্ৰয়োজন আছে ৷

অসম প্ৰকাশন পৰিষদ সাহিত্য বঁটা-২৪

বিশিষ্ট কথা-শিল্পী, সাহিত্যিক য়েছে দৰজে ঠংচিক কাইলৈ আনুষ্ঠানিকভাৱে প্ৰদান কৰা হ’ব অসম প্ৰকাশন পৰিষদ সাহিত্য বঁটা-২৪৷ “ধাৰ আৰু অন্যান্য গল্প” পুথিখনৰ বাবে তেওঁলৈ এই বঁটা আগবঢ়োৱা হৈছে ৷ ইপিনে গ্ৰন্থখন প্ৰকাশ কৰাৰ বাবে অসম প্ৰকাশন পৰিষদ সাহিত্য(প্ৰকাশক) বঁটা প্ৰদান কৰা হ’ব “বনলতা” প্ৰকাশনৰ স্বত্তাধিকাৰী অনন্ত হাজৰিকাক ৷ কাইলৈ বিয়লি ৪ বজাত গ্ৰন্থমেলাৰ অস্থায়ী প্ৰেক্ষাগৃহত এই বঁটা প্ৰদান কৰিব শিক্ষামন্ত্ৰী তথা অসম প্ৰকাশন পৰিষদৰ অধ্যক্ষ ডাঃ ৰণোজ পেগুৱে ৷