জাগীৰোড, ৫ নৱেম্বৰঃ জাগীৰোডত মঙলবাৰে ২৭নং ৰাষ্ট্ৰীয় ঘাইপথ অৱৰোধ কৰি উত্তাল প্ৰতিবাদ সদৌ তিৱা ছাত্ৰ সন্থা(Assam Tiwa Students’ Union) আৰু কেইবাটাও জনজাতীয় সংগঠনৰ৷ জাগীৰোড(Jagiroad) টাউন কমিটি গঠনৰ বিৰোধিতা, সংৰক্ষিত ট্ৰাইবেল বেল্ট ব্লক এলেকাত বেদখলকাৰীক উচ্ছেদ কৰা, তিৱা স্বায়ত্ব পৰিষদক ষষ্ঠ অনুসূচীভুক্ত কৰা আদি কেইবাটাও দাবীত সাব্যস্ত কৰে এই প্ৰতিবাদী কাৰ্যসূচী(NH 27)
জাগীৰোডৰ মাজমজিয়াত প্ৰতিবাদকাৰীক বাধা প্ৰদান কৰাৰ পিছতে উত্তপ্ত হৈ পৰে পৰিস্থিতি(Assam)৷ আৰক্ষী আৰু প্ৰতিবাদকাৰী সকলৰ মাজত সৃষ্টি হয় হতাহতিৰ(Sixth Schedule)৷ প্ৰতিবাদী কাৰ্যসূচী ৰূপায়নৰ সময়তে আৰক্ষীয়ে বাধা প্ৰদান কৰাৰ ফলত হোৱা হতাহতিত কেইবাজনো প্ৰতিবাদকাৰীৰ লগতে আৰক্ষী কমবেছি পৰিমানে আঘাটপ্ৰাপ্ত হয়৷
পথ অৱৰোধৰ সময়চোৱাত ৰাজপথ আৱদ্ধ হৈ পৰে উজনি নামনি যানবাহন চলাচল৷ আগন্তুক দিনত মধ্য অসম বন্ধৰ দৰে ধাৰাবাহিক আন্দোলনেৰে পুনৰ মধ্য অসম উত্তপ্ত কৰাৰ হুংকাৰ সদৌ তিৱা ছাত্ৰ সন্থাৰ লগতে সহযোগী জনজাতীয় সংগঠনসমূহে৷
পৰৱৰ্তী সময়ত জাগীৰোড সমজিলা আয়ুক্ত বিমান দাস আৰু মায়ং ৰাজহ চক্ৰ বিষয়া প্ৰিয়ংকা গগৈৰ জড়িয়তে মুখ্যমন্ত্ৰীলৈ দাবী সম্বলিত স্মাৰকপত্ৰ প্ৰেৰণ কৰে৷
সদৌ তিৱা ছাত্র সন্থা, তিৱা যুৱ ছাত্ৰ পৰিষদ, সদৌ তিৱা মহিলা সন্থা আৰু তিৱা সাংস্কৃতিক সমাজৰ এই প্ৰতিবাদত টাটা চেমি কণ্ডাক্টৰ প্রকল্পত স্থানীয় যুৱক-যুৱতীক সংস্থাপন দিয়াৰ বাবে অতিশীঘ্ৰে ব্যৱস্থা গ্রহণ কৰিবলৈ দাবী জনায় সংগঠনকেইটাই৷
তিৱা স্বায়ত্ব পৰিষদক ভাৰতীয় সংবিধানৰ ষষ্ঠ অনুসূচীত অন্তর্ভুক্ত কৰিবলৈ সদৌ তিৱা ছাত্ৰ সন্থা আৰু জাতীয় সংগঠনসমূহে অসম চৰকাৰ আৰু কেন্দ্ৰীয় চৰকাৰক দাবী জনাই আহিছে। কিন্তু কোনোখন চৰকাৰেই বিষয়টো গুরুত্ব প্রদান কৰা নাই।
শেহতীয়াকৈ মূখ্যমন্ত্ৰী হিমন্ত বিশ্ব শৰ্মা নেতৃত্বত অসম চৰকাৰৰ কেবিনেটে তিৱা, ৰাভা, মিচিং স্বায়ত্ব পৰিষদক সাংবিধানিক মর্যাদা প্রদান কৰাৰ বাবে কেবিনেট সিদ্ধান্ত গ্রহণ কৰা বুলি জানিব পৰা গৈছিল যদিও কিন্তু সেই বিষয়ে জাতীয় সংগঠন আৰু পৰিষদৰ বিষয়ববীয়াই আজিলৈকে এই সন্দৰ্ভত অৱগত কৰা পৰিলক্ষিত নহ’ল আৰু কেন্দ্ৰীয় চৰকাৰলৈ সেই সিদ্ধান্ত প্ৰেৰণ কৰা হ’ল নে নাই অৱগত নহয় বুলি অভিযোগ উত্থাপন কৰে সদৌ তিৱা ছাত্ৰ সন্থাৰ সাধাৰন সম্পাদক প্ৰশান্ত মচৰঙে৷
গতিকে এই সন্দর্ভত অসম চৰকাৰৰ জাতীয় সংগঠন আৰু কেন্দ্ৰীয় চৰকাৰৰ লগত অতিশীঘ্ৰে এখন ত্রি-পাক্ষীক বৈঠক অনুষ্ঠিত কৰিবলৈ দাবী জনায় জাতীয় সংগঠন কেইটাই। তিৱা স্বায়ত্ব পৰিষদ আৰু ট্রাইবেল বেল্ট ব্লকৰ অধীনৰ ২০ খন গাঁও সামৰি জাগীৰোড টাউন কমিটী গঠন কৰাৰ বাবে এক সিদ্ধান্ত গ্রহণ কৰিছে।
সদৌ তিৱা ছাত্ৰ সন্থা উন্নয়ন বিৰোধী নহয়, উন্নয়ন লাগিব কিন্তু উন্নয়নৰ নামত ট্রাইবেল বেল্ট ব্লক ধ্বংস কৰি আৰু তিৱা স্বায়ত্ব পৰিষদ এলেকাৰ অস্তিত্ব বিপন্ন কৰি টাউন কমিটী গঠন কৰা সিদ্ধান্তক জাতীয় সংগঠন আৰু স্থানীয় ৰাইজে মানি ল’ব নলয় বুলি ক্ষোভ উজাৰে সদৌ তিৱা ছাত্ৰ সন্থাৰ সভাপতি অনিৰুদ্ধ মিথিয়ে।
গতিকে সময় থাকোতেই মূখ্যমন্ত্ৰীৰ হস্তক্ষেপত জাগীৰোড টাউন কমিটী গঠন কৰা সিদ্ধান্ত বাতিল কৰিবলৈ দাবী জনাইছে ছাত্ৰ সংগঠন সমূহে। মধ্য অসমত ১৭টা ট্রাইবেল বেল্ট ব্লক গঠন কৰা হৈছিল। ইতিমধ্যে অসম চৰকাৰে সাহসিকতাৰে কামৰূপ (মেট্ট’) জিলাৰ ডিমৰীয়া ট্রাইবেল বেল্ট ব্লকৰ অন্তৰ্গত কচুতলীত কেইদিনমানৰ পূৰ্বে অবৈধ বেদখলকাৰীক উচ্ছেদ কৰিছিল।
সদৌ তিৱা ছাত্র আৰু জাতীয় সংগঠনে সেই উচ্ছেদৰ বাবে অসম চৰকাৰক কৃতজ্ঞতা জনাইছে। কিন্তু বর্তমানেও বহু ট্রাইবেল বেল্ট ব্লকত অবৈধভাবে ভূমি বেদখল হৈ আছে। মৰিগাঁও জিলাৰ ৭টা ট্রাইবেল বেল্ট ব্লকত প্রায় ২৮০২২ বিঘা মাটি অবৈধ বেদখল হৈ আছে। ঠিক তেনেকৈ বাকী বেল্ট ব্লকসমূহতো অবৈধ বেদখল হৈ আছে।
গতিকে যেনেদৰে কচুতলীত অবৈধ বেদখলকাৰীক উচ্ছেদ চলাই বেদখলমুক্ত কৰিলে একেলেখীয়াকৈ বাকী ট্রাইবেল বেল্ট ব্লকসমূহকো বেদখলমুক্ত কৰিবলৈ মূখ্যমন্ত্ৰী হিমন্ত বিশ্ব শৰ্মাক দাবী জনায় জাতীয় সংগঠন সমূহে৷
ভাৰতীয় সংবিধান অনুসৰি কাৰ্বি আংলঙত বসবাস কৰা তিৱাসকলক আঞ্চলিক তিৱা পৰিষদ গঠন কৰাৰ বাবে অসম চৰকাৰ আৰু কেন্দ্ৰীয় চৰকাৰক দাবী জনাই আহিছে যদিও কিন্তু আজিলৈকে এই সন্দৰ্ভত কোনোখন চৰকাৰে গুৰুত্ব প্রদান কৰা নাই।
গতিকে অতিশীঘ্ৰে কাৰ্বি আংলঙত বসবাস কৰা তিৱাসকলক আঞ্চলিক তিৱা পৰিষদ গঠন কৰাৰ বাবে ব্যৱস্থা গ্রহণ কৰিবলৈ দাবী জনায় প্ৰতিবাদ সাব্যস্ত কৰে জাতীয় সংগঠন কেইটাই।
উক্ত দাবীসমূহ পুৰন নহ’লে পৰবৰ্ত্তী সময়ত তীব্ৰ গনতান্ত্ৰিক আন্দোলনৰ হুংকাৰ দিয়ে তিৱা জাতীয় সংগঠন সমূহে৷
উক্ত প্ৰতিবাদী কাৰ্যসূচীত সদৌ তিৱা ছাত্ৰ সন্থাৰ উগ-সভাপতি কন্দৰ্প হুকাই, বিত্ত সম্পাদক বিদ্যা মিথি, তিৱা যুৱ-ছাত্ৰ পৰিষদৰ সভাপতি কৃষ্ণ কোঁৱৰ, তিৱা সাংস্কৃতিক সমাজৰ সভাপতি ফুকন কাৰ্খ, সম্পাদক বকিন্দ্ৰ মছৰং, তিৱা মহিলা সন্থাৰ সভানেত্ৰী জোনালী মিথি, সম্পাদিকা জয়শ্ৰী দেউৰীৰ লগতে তিৱা সংগঠনৰ নেতৃস্থানীয় লোক আৰু প্ৰায় সহস্ৰাধিক তিৱা ৰাইজ প্ৰতিবাদত অংশগ্ৰহণ কৰে৷