দৈনন্দিন বাৰ্তা ডেস্ক : গৰিষ্ঠ সংখ্যক সমৰ্থন লৈ থকা বুলি দাবী কৰি আস্থা ভোটৰ সন্মুখীন হ’বলৈ আপত্তি নাই বুলি মুখ্যমন্ত্ৰী অশোক গেহলটে ৰাজস্থানৰ ৰাজ্যপালক জনাইছে ৷ শচীন পাইলট আৰু তেওঁৰ অনুগামী ১৮ জন বিধায়কৰ বিৰুদ্ধে এতিয়াই পদক্ষেপ গ্ৰহণ কৰা নহ’ব বুলি শুকুৰবাৰে ৰাজস্থান উচ্চ ন্যায়ালয়ে জনাইছে ৷ তাৰ পাছতে ৰাজ্যপাল কলৰাজ মিশ্ৰৰ বিৰুদ্ধে অভিযোগ তুলি এনেদৰে কয় মুখ্যমন্ত্ৰী অশোক গেহলটে৷ তেওঁৰ বক্তব্য, ওপৰৰ পৰা কি ইমান চাপ পৰিছে, যাৰ বাবে ৰাজ্যপালে বিধানসভাৰ অধিৱেশন আয়োজন কৰাত চিন্তা কৰিছে, সেয়া বুজি পোৱা নাই ৷ উচ্চ ন্যায়ালয়ে ৰাজস্থানত স্থিতাৱস্থা বাহাল ৰখাৰ নিৰ্দেশ দিয়াৰ পাছত ৰাজ্যপাল কলৰাজ মিশ্ৰক সাক্ষাৎ কৰিবলৈ গৈছিল মুখ্যমন্ত্ৰী অশোক গেহলট ৷ ৰাজভৱনৰ বাহিৰত সংবাদ মাধ্যমৰ মুখামুখি হৈ তেওঁ কয়, ক’ৰোনা আৰু বৰ্তমান ৰাজনৈতিক পৰিস্থিতিকলৈ বিধানসভাৰ অধিৱেশনত আমি আলোচনা কৰিব বিচাৰো ৷ কিন্তু আমাৰ ধাৰণা, ওপৰৰ পৰা চাপ দিয়া হৈছে ৷ তাৰ বাবেই অধিৱেশন আহ্বান কৰা নাই ৰাজ্যপালে ৷ সম্ভৱ হ’লে সোমবাৰৰ পৰা অধিৱেশন আৰম্ভ কৰাত আপত্তি নাই বুলি কয় গেহলটে ৷ মুখ্যমন্ত্ৰীজনে লগতে কয়, আমি সোমবাৰৰ পৰাই অধিৱেশন আৰম্ভ কৰাটো বিচাৰো ৷ তাতে সকলো স্পষ্ট হৈ যাব৷ ইয়াকে লৈ ৰাজ্যপালৰ সৈতে আমাৰ কথা হৈছে ৷ যিমান পাৰি তৎকালে সিদ্ধান্ত ল’বলৈ অনুৰোধ কৰিছো ৷ বিধানসভা অধিৱেশন আহ্বান নকৰিলে পৰিস্থিতি নিয়ন্ত্ৰণৰ বাহিৰত যাব বুলি হুংকাৰ দিছে গেহলটে ৷ তেওঁ কয়, ৰাজ্যপালৰ সৈতে দেখা কৰিবলৈ যোৱা হৈছে৷ তেওঁ যে চাপত আছে, সেয়া বুজিব পাৰি ৷ তেওঁক অনুৰোধ কৰিব, যাতে অধিৱেশন আহ্বান কৰাক লৈ কোনো ধৰণৰ চাপৰ ওচৰত নতি স্বীকাৰ নকৰে৷ নহ’লে ৰাজ্যৰ মানুহে যদি ৰাজভৱন ঘেৰাও কৰিবলৈ আহে, তেতিয়া আমাৰ কোন দায়িত্ব নাথাকিব ৷ বিদ্ৰোহী কংগ্ৰেছ বিধায়কসকলক বিজেপিয়ে হাৰিয়ানাত পনবন্দী কৰি ৰাখিছে বুলিও গেহলটে দাবী কৰে ৷ তেওঁৰ অভিযোগ, এইটো খেলা ৷ তাৰ নেতা এই ষড়যন্ত্ৰত লিপ্ত ৷ আমাৰ বিধায়কসকলক পনবন্দী কৰি ৰখা হৈছে৷ কৰ্ণাটক আৰু মধ্য প্ৰদেশত ঠিক যি ঘটিছিল, তেওঁলোকে ৰাজস্থানত তাকে ঘটাবলৈ চাইছে ৷ কিন্তু সকলো বিধায়ক আৰু সাধাৰণ মানুহ আমাৰ কাষত আছে৷ আস্থাভোট হ’লে তেওঁৰ চৰকাৰ জিকিব, তাক প্ৰমাণ কৰিবলৈ শুকুৰবাৰে সমৰ্থক বিধায়ককলৈ ৰাজভৱনৰ উদ্দেশ্যে গেহলট ৰাওনা হৈছিল ৷ তৎকালে বিধানসভাৰ অধিৱেশন আৰম্ভ কৰাৰ দাবীত ৰাজভৱনৰ সমুখত ধৰ্ণাত বহে এই বিধায়কসকল ৷ ইপাৰে আস্থাভোটৰ বাবে গেহলটে হুলস্থূল কৰিছে বুলি বিজেপিয়ে মত প্ৰকাশ কৰে ৷ ৰাজস্থান বিজেপিৰ সভাপতি সতীশ পুনীয়াই কয়, বিধানসভাৰ অধিৱেশন আহ্বান লৈ গেহলটে কিয় জানপ্ৰাণ দিছে? মানুহে ৰাজভৱন ঘেৰাও কৰিব, এনেধৰণৰ মন্তব্য এজন মুখ্যমন্ত্ৰীৰ মুখত শোভা নাপায় ৷
