“প্ৰতিভাৰে জগত জিনো” মন্ত্ৰৰে নৰ্থ ইষ্ট আৰ্টিষ্টিক টেলেণ্ট ক্লাৱৰ উদ্যোগত দ্বি বাৰ্ষিক প্ৰতিষ্ঠা দিৱসৰ লগত সংগতি ৰাখি সমাজৰ বাবে অশেষ কষ্ট আৰু পৰিশ্ৰম কৰি সমাজলৈ যোগাত্মক সুস্থ বাতাৱৰণ কঢ়িয়াই অনাৰ লগতে সমাজক এখোজ আগুৱাই নিয়াত সক্ষম হোৱা ব্যক্তিলৈ “সমাজ ৰত্ন” বঁটা প্ৰদান কৰি আহিছে।এই উদ্দেশ্যেৰে এইবেলিও ২০২২বৰ্ষৰ “সমাজ ৰত্ন সন্মান “বৰপেটাৰ সমাজ সেৱক ৰিংকু আহমেদলৈ আগবঢ়াইছে।কৰ্তব্যনিষ্ঠা,দায়বদ্ধতা নিয়মনিষ্ঠ কৰ্মতৎপৰতাৰে সমাজত সুদূৰ প্ৰসাৰী প্ৰভাব পেলোবলৈ সক্ষম হোৱা চাউলখোৱা মহোৎসৱৰ স্থায়ী সভাপতি বিশিষ্ট সমাজসেৱক ৰিংকু আহমেদক এই বঁটা প্ৰদান কৰি বৰপেটাবাসীক গৌৰৱান্বিত কৰিছে। সাংবাদিক চক্ৰপাণি পৰাশৰে বিশিষ্ট সমাজসেৱক ৰিংকু আহমেদক বঁটাতো প্ৰদান কৰে।
গুৱাহাটী চান্দমাৰীস্থ পেঞ্চনাৰ ভৱনত অনুষ্ঠিত হোৱা এই বঁটা প্ৰদান অনুষ্ঠানৰ আৰম্ভণিতে বন্তি প্ৰজ্বলন কৰে এই ক্লাৱৰ মুখ্য উপদেষ্টা তথা বিশিষ্ট লেখিকা নঞ্জু দত্তই।এই অনুষ্ঠানত দৈনন্দিন বাৰ্তাৰ মুখ্য সম্পাদক শংকৰ গোঁহাই আৰু জনসংযোগ অসমৰ উপ সঞ্চালক পুলিন ডেকাই বিশিষ্ট অতিথি হিচাপে উপস্থিত থাকে।তদুপৰি আৰোহণ ফাউণ্ডেচনৰ প্ৰতিষ্ঠাপক সঞ্চালক ড° সীমা বৰা আৰু এই ক্লাৱৰ উপদেষ্টা ৰুবী শইকীয়া দাসে আমন্ত্ৰিত অতিথি হিচাপে উপস্থিত থাকে।এই ক্লাৱৰ স্মৃতিগ্ৰন্থখন উন্মোচন কৰে জেষ্ঠ সাংবাদিক চক্ৰপাণি পৰাশৰে।এই অনুষ্ঠানতে বৰপেটাৰ জেষ্ঠ সাংবাদিক তথা অগ্ৰদূত কাকতৰ অৰূপজ্যোতি মহন্তকো সংবাদ ক্ষেত্ৰলৈ আগবঢ়োৱা অৱদানৰ বাবে “সংবাদ প্ৰহৰী” সন্মান প্ৰদান কৰে।এই বঁটা প্ৰদান অনুষ্ঠানৰ আৰম্ভণিতে বৰগীত পৰিবেশন কৰে ৰুমী শইকীয়াই।