সাহিত্য-সংস্কৃতিমূলক মাহেকীয়া আলোচনী ‘জোনাক’ৰ উদ্যোগত আৰু ‘উত্তৰ পুৰুষৰ মঞ্চ’ৰ সহযোগত যোৱা ২৯ ডিচেম্বৰ (Babita Borthakur)দেওবাৰে গুৱাহাটী প্ৰেছ ক্লাবত দেৰগাঁৱৰ লেখিকা ববিতা বৰঠাকুৰৰ প্ৰথমখন প্ৰবন্ধ সংকলন “স্বচ্ছ আৰু অস্বচ্ছ দাপোনত নাৰী”ৰ শুভ উন্মোচনী অনুষ্ঠানটো অতি গাম্ভীৰ্যপূৰ্ণ পৰিৱেশত হৈ যায়।
শিক্ষা-সাহিত্য-সংস্কৃতিলৈ অলেখ বৰঙণি আগবঢ়োৱা বিশিষ্টা লেখিকা, সমাজসেৱিকা ড° মন্দিৰা বৰুৱাই গ্ৰন্থ খনৰ শুভ উন্মোচন কৰে আৰু ভাষণত কয় যে– ‘বিশাল মনৰ অধিকাৰী ববিতা বৰঠাকুৰে নাৰীৰ হাঁহিৰ আঁৰৰ দুখবোৰ বুজি পাই, শব্দৰ সু-নিৰ্দিষ্ট গাঁঠনি, ভাষাৰ লালিত্য, নিজস্ব লেখনশৈলীৰে প্ৰবন্ধ সংকলনখনিৰ প্ৰতিটো প্ৰবন্ধত এনেকুৱা ৰস পাঠকৰ বাবে দিছে সেইয়া অভূতপূৰ্ব হৈ উঠিছে, নাৰী জীৱনৰ অধিকাংশ সচৰাচৰ ঘটি থকা ঘটনাক লেখাৰ মাজেৰে আনি প্ৰাণ দিছে; মুঠতে এখন মনোগ্ৰাহী গ্ৰন্থ মই আজি উন্মোচন কৰিলোঁ।” অনাতাঁৰ শিল্পী, লেখিকা শিখামণি দত্তৰ কন্ঠৰ এটি গীতেৰে আৰম্ভণি হোৱা সভাখনত অৱসৰী অধ্যাপিকা, কবি ড° অনিমা বৰা আৰু বিষয় শিক্ষয়িত্ৰী, কবি দীপা বৰঠাকুৰে যুটীয়াভাৱে বন্তি প্ৰজ্বলন কৰে আৰু মনৰ ভাব ব্যক্ত কৰে। সৃষ্টিৰ আঁৰৰ অকথ্য মিঠা কথাবোৰেৰে মনৰ ভাব নিগৰাই আদৰণি ভাষণ দিয়া লেখিকা তথা শিক্ষয়িত্ৰী ববিতা বৰঠাকুৰৰ বক্তব্যৰ পিছতে মুখ্য অতিথিৰ আসন অলংকৃত কৰা সাহিত্যিক, বিশিষ্ট সংগীত শিল্পী ডাঃ অঞ্জনজ্যোতি চৌধুৰীয়ে সুধাকন্ঠৰ এটি গীত গাই আৰু ৰসাল কিছু কথাকৈ অনুষ্ঠানটো ৰসোত্তীৰ্ণ কৰি তোলে।
পূবাঞ্চী দাসৰ কবিতা আবৃত্তি, ৰাগিণী কাশ্যপৰ এটি গীতেৰে সভাৰ সময়খিনি প্ৰাণ পাই উঠা সময়ত দেৰগাঁৱৰ উদয়ন একাডেমীৰ অধ্যক্ষ ভাস্কৰজ্যোতি বৰাই ভাষণত কয় যে–‘ছাত্ৰ-ছাত্ৰীৰ সৈতে শ্ৰেণীকোঠাত অতি একাত্ম হৈ যোৱা ববিতা বৰঠাকুৰ এক বিশেষ সত্বা যাৰ সৃষ্টিৰ পথাৰখন অত্যন্ত সাৰুৱা আৰু পলসুৱা।’ বিশিষ্ট শিশু-সাহিত্যিক সুৰেন্দ্ৰ মোহন দাস আৰু ৰাধাগোবিন্দ বৰুৱা মহাবিদ্যালয়ৰ অৱসৰী অধ্যাপক ড° জ্ঞানজ্যোতি শৰ্মাই বিশিষ্ট অতিথিৰ আসনৰ পৰা শুভেচ্ছামূলক ভাষণ দিয়া অনুষ্ঠানটোত বিশিষ্ট গণিতজ্ঞ, সাহিত্যিক ড° দিব্যজ্যোতি মহন্ত, উত্তৰ পুৰুষৰ মঞ্চৰ কাৰ্যকৰী সভাপতি ৰীনা বুঢ়াগোহাঁই বৰুৱা, সৰগম সংগীত বিদ্যালয়ৰ অধ্যক্ষ নিৰেন চন্দ্ৰ বৈশ্য, প্ৰাক্তন ছাত্ৰনেতা অংকুৰণ ফুকন, সমাজকৰ্মী নৱজ্যোতি শৰ্মাই চমুৱাই দু-আষাৰ কয়। জ্যেষ্ঠ সাংবাদিক অৰুণিমা কলিতা মেধিসহ অনেকজন সুভানুধ্যায়ীক গামোচা, স্মাৰক, ফুলৰ পুলি আৰু এটি সামগ্ৰীৰ টোপোলাৰে আয়োজকে সম্বৰ্ধনা জনায়। মনপৰসা গ্ৰন্থ উন্মোচনী অনুষ্ঠানটোত ‘জোনাক’ৰ মুখ্য সম্পাদক, কবি-লেখক পুলকেশ ৰায় বৰুৱাই আঁত ধৰে তথা শলাগৰ শৰাই আগবঢ়াই ‘উত্তৰ পুৰুষৰ মঞ্চ’ৰ সম্পাদক-লেখক হৰেকৃষ্ণ হালৈয়ে।