অইলৰ বিৰুদ্ধে অৱস্থান ধৰ্মঘটত বহিল বাঘজান গাঁও মিলনজ্যোতি যুৱ সংঘ : বিস্ফোৰণৰ ত্ৰয়োদশ দিনলৈকে অনিয়ন্ত্ৰিত অৱস্থাত বাঘজান তৈলখাদ ।

ডিৰাক সীমান্ত 

বাঘজানত ২৭ মাৰ্চৰ পূৱা বি জি আৰ ৫ নং তৈলখাদ বিস্ফোৰণ হোৱা আজি দ্বাদশ দিনটো অপৰিবৰ্তিত অৱস্থাত নিৰ্গমন হৈ আছে গেছ আৰু তেল ৷ বিপদাপন্ন হৈ পৰা জীৱকুল, মৎস্যকুল তথা জৈৱ-বৈচিত্ৰৰ ভাৰসাম্য ক্ৰমে শেষহৈ গৈছে ৷ আনহাতে আজিলৈকে বিস্ফোৰিত তেলখাদটো নিয়ন্ত্ৰণৰো কোনো বিশেষ ব্যৱস্থা লোৱা নাই অইল ইণ্ডিয়া নতুবা চৰকাৰে ৷ আৰম্ভ নহ’ল বিস্ফোৰিত খাদটো নিয়ন্ত্ৰণলৈ অনা বিশেষ কাৰিকৰী ব্যৱস্থা ৷ অন্যহাতেদি খাদটোৰ পৰা নিৰ্গমণ হৈ থকা তেল সংমিশ্ৰিত গেছে সমগ্ৰ এলেকাটোৰ খেতি-পথাৰ, গছ-লতা, চাহ বাগিছা আদি জ্বলাই সমষ্টে নষ্ট কৰি পেলোৱাৰ পাছতো, অইল আৰু চৰকাৰে আজিলৈকে কেৱল আশ্ৰাস দিয়াৰ বিপৰীতে কোনো কাৰ্যব্যৱস্থা হাতত নোলোৱাত ক্ষতিগ্ৰস্থ লোকসকল ক্ষোভত অগ্নীশৰ্মা হৈ বিভিন্ন প্ৰতিবাদী কাৰ্যসূচী হাতত ল’বলৈ বাধ্য হৈছে ৷ আশ্ৰয় শিবিৰত থকা প্ৰায় পাঁচ শতাধিক লোকে  দুদিনৰ পূৰ্বে প্ৰতিবাদী সমদল বাহিৰ কৰাৰ পিছতো কোনোধৰণৰ সুফল নোপোৱাত কালিৰ পৰা পুনৰ বাঘজান গাঁও মিলন জ্যোতি যুৱক সংঘৰ উদ্যোগত অনিৰ্দিষ্টকালীন অৱস্থান ধৰ্মঘটত বহিছে বাঘজান গাঁৱৰ আশ্ৰয় শিৱিৰত থকা লোকসকলে ৷ তেওলোকৰ মূল দাবী তেওঁলোকৰ জীৱন-সম্পত্তিৰ নিৰাপত্তা, উচিত ক্ষতিপূৰণ আৰু অতি শ্ৰীঘে তেল সংমিশ্ৰিত গেছ নিৰ্গমণ বন্ধ কৰা  ৷ শিৱিৰত অস্বাস্থ্যকৰ পৰিৱেশত ক্ৰমে অসুস্থহৈ পৰা একাধিক শিশুকে ধৰি সকলোৱে উপযুক্ত চিকিৎসা নোপোৱাৰো অভিযোগ উত্থাপিত হৈছে । ৰাইজৰ প্ৰতিবাদৰ ভাষা যদি অইল আৰু চৰকাৰে সময়ত বুজি নাপাই তেন্তে  জনতাই বিস্ফোৰিত তেলখাদটোতে আত্মজাহ দিয়াৰ ভাবুকি প্ৰদান কৰিছে ৷ এনেদৰে পৰিৱৰ্তিতভাবে তেল সংমিশ্ৰিত গেছ নিৰ্গমন হৈ থাকিলে অনাগত দিনত ৰাজপথলৈ ওলাই অহাকে আদি কৰি অধিক জংগী আন্দোলন হ’ব সেয়া নিশ্চিত ৷