| বটদ্ৰৱাত আমাৰ কংগ্ৰেছ দলৰ ভেটি যথেষ্ট শক্তিশালী, সেয়ে বটদ্ৰৱাত আমি নিৰ্বাচন খেলাটো খাটাং, বটদ্ৰৱা এৰি দিয়াৰ প্ৰশ্নই নুঠে”- এই মন্তব্য প্ৰাক্তন মন্ত্ৰী তথা বটদ্ৰৱাৰ প্ৰাক্তন বিধায়ক গৌতম বৰাৰ। আজি গুৰুজনাৰ জন্মস্থান বৰদোৱা থানৰ পৰা নগাঁৱৰ ধিং গেটত পথসভা কৰি উভতাৰ পথত কেন্দ্ৰীয় নেতৃত্বৰ সন্মুখতে এই মন্তব্য নেতা গৰাকীৰ। উল্লেখযোগ্য যে, মিত্ৰজোটে বটদ্ৰৱা আসনখন আঞ্চলিক গণমৰ্চাক এৰি দিয়াৰ কথা প্ৰায় নিশ্চিত হোৱাৰ পিচতো বটদ্ৰৱাত প্ৰাৰ্থিত্ব বিচাৰি অসম প্ৰদেশ কংগ্ৰেছ কমিটিৰ পৰা গৌতম বৰা, শিৱামণি বৰা আৰু অভিজিৎ বৰাই আবেদন দাখিল কৰিছে। সেয়ে বটদ্ৰৱাত প্ৰস্তাৱিত মহাজোটৰ অংকত আউল লগাৰ সম্ভাৱনাই দেখা দিছে। কেন্দ্ৰীয় নেতা তথা অসম প্ৰদেশ কংগ্ৰেছৰ পৰ্য্যবেক্ষক জিতেন্দ্ৰ সিঙ, নগাঁৱৰ সাংসদ প্ৰদ্যুৎ বৰদলৈ, কলিয়াবৰৰ সাংসদ গৌৰৱ গগৈ, প্ৰদেশ কংগ্ৰেছৰ ৰিপুণ বৰা, বিৰোধী দলৰ প্ৰাক্তন দলপতি দেৱব্ৰত শইকীয়াৰ নেতৃত্বত আৰম্ভ হোৱা এই অসম বচাও অভিযানত উপস্থিত থাকে নগাঁৱৰ প্ৰাক্তন বিধায়ক ডা: দুৰ্লভ চমুৱা, চামগুৰিৰ বিধায়ক ৰকিবুল হুছেইন, কংগ্ৰেছ নেতা শান্তনু শৰ্মাৰ লগতে নগাঁও জিলা কংগ্ৰেছৰ বিষয়ববীয়াক |
